ბიოქიმფარმის  გენერალური მენეჯერის, რატი ღოლიჯაშვილი განცხადებით, საქართველო ბაქტერიოფაგების მიმართულებით უნიკალურ ცოდნასა და მრავალწლოვან გამოცდილებას ფლობს, რაც ქვეყანას ბიოტექნოლოგიების სფეროში კონკურენტულ უპირატესობას აძლევს.

მისი თქმით, ფაგებზე დაფუძნებული პრეპარატები ანტიბიოტიკების ეფექტიან ალტერნატივად განიხილება, განსაკუთრებით მაშინ, როცა მსოფლიო ანტიმიკრობული რეზისტენტობის მზარდ გამოწვევას ებრძვის.

„ბიოტექნოლოგიები 21-ე საუკუნეში, ხელოვნურ ინტელექტთან ერთად არის ერთ-ერთი ყველაზე მნიშვნელოვანი სექტორი და ინდუსტრია, სფერო, რომელიც რეალურად განაპირობებს დღევანდელი მოცემულობით მთელ საუკუნეს - ინოვაციების მიმართულებით, ტექნოლოგიური მიმართულებით. და საქართველოში ჩვენ გვაქვს ნიშური ბიოტექნოლოგია. ძალიან დიდი სფეროა, თუმცა გვაქვს ნიშა, მაგალითად, ბაქტერიოფაგების მიმართულება და ფაგების მიმართულება, რომელ სფეროშიც ჩვენი კომპანია არის ჩართული.

ჩვენ ვქმნით და ვაწარმოებთ ანტიბიოტიკების ჯანსაღ ალტერნატივას, ფაგებზე დაფუძნებულ ალტერნატივას და ამ სფეროში გვაქვს ძალიან დიდი უპირატესობა და ვფიქრობ, რომ ისეთ ქვეყანაში, როგორიც საქართველოა ეს არის ძალიან დიდი შესაძლებლობა.

ხშირად ვამბობთ, რომ საქართველო არის არა მხოლოდ ღვინის, არამედ ფაგების სამშობლოც. ახლახან კი ხორბლის შესახებაც დადასტურდა, რომ ჩვენი ქვეყანა მისი სამშობლოა და ეს ყველაფერი 100 წლის წინ დაიწყო.

ისტორია, ისტორიული კონტექსტი, საქართველოში არსებული რეალური თუ პრაქტიკული ნოუ-ჰაუ და ამ პრეპარატებისა და ტექნოლოგიების რეალურ ცხოვრებაში გამოყენება - ეს არის ჩვენი უდიდესი უპირატესობა დღესდღეობით. იქიდან გამომდინარე, რომ მთელი მსოფლიო ეძებს გამოსავალს ანტიბიოტიკორეზისტენტობის წინააღმდეგ, რადგან ანტიბიოტიკები, ანტიმიკრობული რეზისტენტობის გამო, ხშირად ვეღარ კურნავენ ინფექციებს, ფაგები, რომელიც საქართველოში გაგვაჩნია  არის ერთადერთი ხელმისაწვდომი ალტერნატივა გლობალური ჯანდაცვის ამ გამოწვევისა, რომელიც, ფაგების გარეშე, ფაქტობრივად მოუგვარებელია“, - აცხადებს ბიოქიმფარმის გენერალური მენეჯერის, რატი ღოლიჯაშვილი