შინაური ცხოველების მოვლისა და გრუმინგის ინდუსტრია საქართველოში სწრაფად ვითარდება. ამ ფონზე, „ცუგრუმელა“ ბაზარზე პოზიციების შენარჩუნებასა და გაფართოებას განაგრძობს. ოთხწლიანი საქმიანობის განმავლობაში კომპანიამ არაერთი გამოწვევა გადალახა, განავითარა გუნდი, გააუმჯობესა მომსახურების ხარისხი და ახალი კონცეფციის ფილიალიც გახსნა ბაზარი ორბელიანის ტერიტორიაზე. ამის შესახებ, Business Insider Georgia-ს „ცუგრუმელას“ დამფუძნებელმა, მერი ლორთქიფანიძემ განუცხადა.

„შინაური ცხოველების მოვლისა და გრუმინგის ინდუსტრია საქართველოში სწრაფად ვითარდება, თუმცა ამ ბაზარზე ლიდერის პოზიციის შენარჩუნება და სტაბილური ზრდა საკმაოდ რთულია. „ცუგრუმელა“ გრუმინგის სფეროში ერთ-ერთი ყველაზე სწრაფად მზარდი ქსელია, რომელმაც კონკურენციისა და არაერთი სირთულის მიუხედავად, ლიდერის პოზიციის შენარჩუნება შეძლო.

ოთხწლიანი საქმიანობის განმავლობაში არაერთი გამოწვევის წინაშე აღმოვჩნდით და სერიოზული კრიზისული პერიოდის გადალახვაც მოგვიწია, რაც როგორც სალონების ლოკაციების, ისე გუნდის წევრების ცვლილებებს უკავშირდებოდა. თუმცა, სწორმა მენეჯმენტმა და სტრატეგიულმა ხედვამ კომპანიას განვითარების ახალი შესაძლებლობები მისცა. მნიშვნელოვანი პოზიტიური ცვლილებები და წინსვლა პირდაპირ უკავშირდება ჩვენი დირექტორის, თორნიკე მიდელაშვილის მოსვლას, რომელიც უკვე მეორე წელია წარმატებით ხელმძღვანელობს გუნდს. ამ პერიოდში მნიშვნელოვნად გავზარდეთ თანამშრომელთა რაოდენობა და გავაუმჯობესეთ მომსახურების ხარისხი.

მიგვაჩნია, რომ ჩვენი მთავარი წარმატება საქართველოში საუკეთესო გრუმერების ერთ გუნდში გაერთიანებაა. უმაღლესი ხარისხის ინვენტარი, პრემიუმ კლასის კოსმეტიკა და მაღალკვალიფიციური კადრები კი ჩვენი წინსვლის მნიშვნელოვანი საფუძველია. გუნდში პროფესიონალი გრუმერების რაოდენობის ზრდამ და მომსახურების ხარისხის გაუმჯობესებამ პირდაპირი გავლენა მოახდინა ჩვენს ფინანსურ მაჩვენებლებსა და შემოსავლებზეც.

მომსახურების ხარისხის ახალ საფეხურზე გადასვლასთან ერთად, სერვისის ფასებიც გაიზარდა, თუმცა ვინარჩუნებთ დაბალ მარჟას. ეს სტრატეგიული გადაწყვეტილება მივიღეთ იმისთვის, რომ პრემიუმ ხარისხის მომსახურება მაქსიმალურად ხელმისაწვდომი დარჩეს მომხმარებლებისთვის. ამ მიზნით, დავნერგეთ მოქნილი ფასწარმოქმნის მოდელი, რომელიც ღირებულებაზე დაფუძნებულ მიდგომას (Value-based pricing) ითვალისწინებს და მომსახურების სირთულესა და გამოყენებული პრემიუმ მასალების ღირებულებას ეფუძნება. ეს მიდგომა გვეხმარება საოპერაციო ხარჯების დაბალანსებაში, მომხმარებელთა ლოიალურობის შენარჩუნებასა და სტაბილური ფინანსური ნაკადების უზრუნველყოფაში, მარჟების ხელოვნური ზრდის გარეშე.

მიმდინარე წელი ჩვენი ქსელისთვის განსაკუთრებული სიახლით აღინიშნა - ორბელიანის ბაზრის ტერიტორიაზე სრულიად ახალი კონცეფციის ფილიალი გავხსენით, რომლის ანალოგიც, ჩვენი შეფასებით, არა მხოლოდ საქართველოში, არამედ ევროპის ბევრ ქვეყანაშიც არ არსებობს. განსაკუთრებული მადლობა გვინდა გადავუხადოთ ორბელიანის ბაზრის ადმინისტრაციას, რომელმაც უდიდესი წვლილი შეიტანა ამ უნიკალური პროექტის განხორციელებაში.

ახალი ფილიალის მიზანი მხოლოდ მაღალი ხარისხის მომსახურების შეთავაზება არ არის - მას მნიშვნელოვანი საგანმანათლებლო დატვირთვაც აქვს. სწორედ ამ სივრცეში ვგეგმავთ ჩვენ მიერ დაარსებული „პროფესიონალ გრუმერთა ასოციაციის“ ბაზაზე არსებული სასწავლო აკადემიის კიდევ უფრო გაფართოებას.

ჩვენი მიზანია, საქართველოში გრუმინგის სფეროს განვითარებას ახალი იმპულსი მივცეთ. აკადემიის ფარგლებში ვგეგმავთ მსოფლიოს წამყვანი ქვეყნებიდან დარგის პროფესიონალებისა და ექსპერტების მოწვევას, რომლებიც ჩვენს გუნდსა და სხვა დაინტერესებულ პირებს საკუთარ გამოცდილებას გაუზიარებენ. ეს ხელს შეუწყობს ცოდნის გაღრმავებასა და ქართულ ბაზარზე საერთაშორისო სტანდარტების დანერგვას.

ამასთანავე, გაფართოებას ვაგრძელებთ და მიმდინარე წელს კიდევ ერთი ახალი ფილიალის გახსნას ვგეგმავთ. ჩვენი გამოცდილება გვარწმუნებს, რომ კრიზისიდან ახალ შესაძლებლობებამდე ერთი ნაბიჯია, როდესაც ძლიერი გუნდი და მკაფიო მიზნები გაქვს. სწორედ ამ ხედვით ვაგრძელებთ მუშაობას, რათა საქართველოში შინაური ცხოველების მოვლის კულტურის განვითარებასა და მომსახურების ხარისხის გაუმჯობესებაში კიდევ უფრო დიდი წვლილი შევიტანოთ“, - აცხადებს მერი ლორთქიფანიძე.