„აგროლეინი“ საექსპორტო ბაზრების გაფართოებას გეგმავს
Agrolane / აგროლეინი ლურჯი მოცვის ერთ-ერთი უმსხვილესი მწარმოებელი კომპანიაა, რომელიც ბაზარზე 2015 წლიდან ოპერირებს. კომპანიის საქმიანობის მიმდინარე ტენდენციებსა და სამომავლო გეგმებზე Business Insider Georgia თანადამფუძნებელსა და დირექტორს, გიორგი ღვინიაშვილს ესაუბრა.
„მოცვის სეზონი ჯერ არ არის დაწყებული და უახლოეს დღეებში დაიწყება. ცივი ამინდების გამო მოსავლის დამწიფება ცოტათი დაგვიანდა, თუმცა მოლოდინები პოზიტიურია და წელს კარგ მოსავალს ველოდებით. რა თქმა უნდა, ამინდზე ძალიან ვართ დამოკიდებული და თუ ხანგრძლივად გაგრძელდება წვიმები, ეს უკვე სერიოზულ პრობლემებს შეგვიქმნის.
რაც შეეხება მოთხოვნას, ყოველწლიურად იზრდება საქართველოდან მიწოდებების გეოგრაფია. ამის ერთ-ერთი მიზეზი ისაა, რომ ქვეყანაში მოცვის რაოდენობა იზრდება, ასევე უფრო კარგი და ახალი ჯიშები იწყებს მოსავლის მოცემას, რაც ინტერესსაც ზრდის. წელს ძალიან დიდ დაინტერესებას ვხედავთ ევროპიდან და აქტიურად ვგეგმავთ ევროკავშირის მიმართულებით მიწოდებების განხორციელებას“,- აცხადებს გიორგი ღვინიაშვილი.
კომპანია სამომავლოდ საექსპორტი ბაზრების გაფართოებასთან ერთად ახალი ჯიშების განვითარებასაც გეგმავს.
„სამომავლო გეგმების მხრივ, ჩვენთვის მნიშვნელოვანია ახალი ბაზრების ათვისება, თუმცა პარალელურად ვაპირებთ აქტიურად ვიმუშაოთ ახალი ჯიშების განვითარებაზე - ამ მიმართულებით არ დავიშურებთ დროს, ენერგიასა და რესურსს, რათა ჩვენს ბაღებში კიდევ უფრო ახალი და გაუმჯობესებული ჯიშები გვქონდეს წარმოდგენილი“,- აცხადებს კომპანიის დირექტორი.
სხვა სიახლეები
10 000-ზე მეტი მომხმარებელი ერთ თვეში - როგორ ცვლის JAVIC ავტომობილის მოვლის წესს
16.11.2026.10:00
JAVIC ქართული ავტოტექ პლატფორმაა, რომელიც ავტომობილის მართვასა და მოვლასთან დაკავშირებულ სერვისებს ერთ ციფრულ სივრცეში აერთიანებს. კომპანიას ბოლო ერთი თვის განმავლობაში 10 000-ზე მეტი მომხმარებელი ჰყავდა. პლატფორმის განვითარების, ახალი ფუნქციებისა და სამომავლო გეგმების შესახებ Business Insider Georgia-ს JAVIC-ის თანადამფუძნებელი და დირექტორი ვატო ფაჩულია ესაუბრა.
რა სიახლეები აქვს JAVIC-ს ამ ეტაპზე და რა მიმართულებით ვითარდება კომპანია?
JAVIC-ის შექმნისას ერთი მარტივი კითხვა გვქონდა: რატომ უნდა ეძებოს მძღოლმა თავისი მანქანის შესახებ ინფორმაცია სხვადასხვა ადგილას? ჯარიმას ერთგან ამოწმებ, ტექდათვალიერების თარიღს სხვაგან ეძებ, ზეთი ბოლოს როდის შეცვალე კი შეიძლება საერთოდ აღარ გახსოვდეს. თავიდანვე გვინდოდა, ეს ყველაფერი ერთ აპლიკაციაში მოგვეყარა და მანქანის მოვლა უფრო მარტივი გაგვეხადა.
დღეს JAVIC-ში შეგიძლია დაამატო შენი ავტომობილი, აკონტროლო ჯარიმები და ტექდათვალიერების ვადები, შეინახო სერვისის ისტორია და კითხვები AI ასისტენტს დაუსვა. თუ მანქანის შეძენას აპირებ, VIN კოდით მის ისტორიასაც შეამოწმებ. ჩვენი ამბიციაა, JAVIC საქართველოში ავტომობილის ციფრული მოვლის წამყვანი პლატფორმა გახდეს - როგორც ერთი მანქანის მფლობელისთვის, ისე კომპანიებისთვის, რომლებიც მთელ ავტოპარკს მართავენ.

როგორ განვითარდა სერვისების ერთ სივრცეში გაერთიანების იდეა და რა დაემატა პლატფორმას?
დღეს შეგიძლია ნახო, გაქვს თუ არა გადაუხდელი ჯარიმა და როდემდე შეგიძლია მისი შეღავათით გადახდა. ტექდათვალიერების ვადის მოახლოებისას აპლიკაცია შეგახსენებს, რომ თარიღი არ გამოგრჩეს. შეგიძლია ჩაინიშნო ისიც, როდის შეცვალე ძრავის ან გადაცემათა კოლოფის ზეთი.
სერვისების აღრიცხვას მანქანის გაყიდვის დროსაც აქვს ფასი: მფლობელს შეუძლია JAVIC-ში შექმნილი სერვისის ისტორიის დოკუმენტი მყიდველს გაუზიაროს და აჩვენოს, რა სამუშაოები ჩაუტარდა მანქანას და როდის. ასე მყიდველისთვის უფრო გამჭვირვალე ხდება, როგორ უვლიდნენ ავტომობილს საქართველოში ყოფნის პერიოდში. ეს იმავე პრინციპს ემყარება, რასაც საერთაშორისო პრაქტიკაში დოკუმენტირებული სერვისის ისტორია.
აპში შეგიძლია გადაამოწმო საწვავის ფასები, რუკაზე კი მოძებნო ელექტროდამტენები და ახლომდებარე ავტოსერვისები. გვაქვს AI ასისტენტიც. მაგალითად, თუ დაფაზე უცნობი ინდიკატორი აინთო, შეგიძლია პირდაპირ JAVIC-ს ჰკითხო, რას შეიძლება ნიშნავდეს და რა გადაამოწმო პირველ რიგში.
როგორ გაიზარდა მომხმარებლებისა და პარტნიორების რაოდენობა და რაზეა ყველაზე მაღალი მოთხოვნა?
ბოლო ერთ თვეში JAVIC-ს 10 000-ზე მეტი მომხმარებელი ჰყავდა და მათი რაოდენობა ყოველდღიურად იზრდება. ჩვენთვის ეს კარგი სიგნალია: პრობლემა, რომლის გამოც JAVIC შევქმენით, ბევრ მძღოლს აქვს.
ავტომობილის ისტორიის შემოწმებაში უკვე 10-ზე მეტ იურიდიულ პირს ვემსახურებით. JAVIC-ის სერვისებს აქტიურად იყენებენ ტაქსის კომპანიები, ავტოპარკების მმართველები და სხვა ბიზნესები, რომლებსაც სამი ან მეტი ავტომობილი ჰყავთ. როცა რამდენიმე მანქანაზე ხარ პასუხისმგებელი, თითოეულის ჯარიმების, ტექდათვალიერებისა და სერვისის ვადების ცალ-ცალკე კონტროლს დრო მიაქვს. ერთ სივრცეში მათი ნახვა ამ საქმეს ამარტივებს.
გამოყენების ორი ძირითადი სცენარი იკვეთება: ყიდვამდე მომხმარებელს მანქანის ისტორიის შემოწმება სჭირდება, ყიდვის შემდეგ კი ჯარიმების, ტექდათვალიერებისა და სერვისების კონტროლი. კონკრეტულად რომელ ფუნქციას იყენებენ ყველაზე ხშირად, ზუსტ მონაცემებს მოგვიანებით გავაზიარებთ.
რა გეგმები აქვს კომპანიას განვითარების შემდეგ ეტაპზე?
შემდეგ ეტაპზე გვინდა, მომხმარებელს საჭირო მომსახურების პოვნაც გავუმარტივოთ. მაგალითად, თუ JAVIC ზეთის შეცვლას გახსენებს, იქვე უნდა შეგეძლოს ნახო, სად შეგიძლია მისი შეცვლა. ამ მიმართულებით ახალ ფუნქციებსა და პარტნიორობებზე ვმუშაობთ. დეტალებზე ცოტა მოგვიანებით ვისაუბრებთ.
თუ JAVIC ჯერ არ გამოგიცდიათ, ჩამოტვირთეთ App Store-დან ან Google Play-დან, დაამატეთ თქვენი მანქანა და ნახეთ, როდის გიწევთ ტექდათვალიერება ან ხომ არ გაქვთ გადაუხდელი ჯარიმა.
საბოლოოდ, გვინდა, JAVIC თითოეული მძღოლის ჭკვიანი ავტომეგობარი გახდეს. სახელიც ამას გამოხატავს - Just A Very Intelligent Car. გვინდა, აპს ახსოვდეს ის, რაც შეიძლება შენ გამოგრჩეს, და როცა მანქანაზე კითხვა გაგიჩნდება, დაგეხმაროს იმის გარკვევაში, რა გააკეთო შემდეგ.