„აგროლეინი“ საუდის არაბეთში ერთ-ერთ სუპერმარკეტების ქსელთან თანამშრომლობას გეგმავს
სააგენტოს „აწარმოე საქართველოში“ მხარდაჭერითა და ორგანიზებით, საქართველო საკვები და სასმელი პროდუქტების ერთ-ერთ ყველაზე მასშტაბურ საერთაშორისო გამოფენაზე, Gulfood -ზე 2 პავილიონით წარსდგა, ხოლო ღონისძიებას ჯამში 26 ქართული კომპანია დაესწრო. მათ შორის იყო ლურჯი მოცვის ერთ-ერთი უმსხვილესი მწარმოებელი კომპანია Agrolane / აგროლეინი. გამოფენის შედეგებთან და სამომავლო გეგმებთან დაკავშირებით, Business Insider Georgia კომპანიის თანადამფუძნებელს და დირექტორს გიორგი ღვინიაშვილს ესაუბრა.
„ეს გამოფენა ჩვენი კომპანიისთვის ძალიან მნიშვნელოვანია, რადგან წლებია ჩვენ გალფის ქვეყნებში ვოპერირებთ და ვაწვდით მათ ჩვენს პროდუქციას. პრაქტიკულად ყოველ წელს გამოფენის შემდეგ გვემატება ახალი პარტნიორი კომპანიები, რის გამოც კონკრეტულად ჩვენთვის ეს ღონისძიება განსაკუთრებით ფასეულია.
დაინტერესება კვლავ მაღალია. ვგეგმავთ, რომ წელს საუდის არაბეთის ერთ-ერთ სუპერმარკეტების ქსელთან დავიწყოთ თანამშრომლობა და მივაწოდოთ ჩვენი პროდუქცია. ეს ქსელი ახალია ჩვენთვის, გამოფენაზე გავიცანით და გვაქვს მოლოდინი, რომ წელს შევძლებთ მუშაობის დაწყებას და სუპერმარკეტებში შესვლას “, - აცხადებს გიორგი ღვინიაშვილი.
ინფორმაციისთვის, ვარციხეში, შპს „აგროლეინის“ თანამედროვე სტანდარტებით აღჭურვილი საწარმო სახელმწიფოს ფინანსური მხარდაჭერით შეიქმნა. საწარმოში 2 მლნ ლარზე მეტი ინვესტიცია განხორციელდა.
სხვა სიახლეები
ველით, რომ ბიზნესი აქტიური იქნება და პრემიერ-მინისტრთან შეხვედრაზე თავად დააყენებს მნიშვნელოვან საკითხებს | ლევან ვეფხვაძე
16.11.2026.10:26
ველით, რომ ბიზნესი აქტიური იქნება და პრემიერ-მინისტრთან შეხვედრაზე თავად დააყენებს მნიშვნელოვან საკითხებს, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას BAG-ის აღმასრულებელმა დირექტორმა, ლევან ვეფხვაძემ განაცხადა.
„წინასწარ დღის წესრიგი ჩვენ არ გვაქვს და ამით არის ეს შეხვედრა გამორჩეული, იმიტომ რომ ჩვენთვის მთავარი არის ის, რომ შედგეს დიალოგი. რაც შეეხება საკითხებს, ჩვენ ველით, რომ ბიზნესი იქნება აქტიური და თავად დააყენებს საკითხებს.
ყველაზე მთავარი არის სწორედ ის, რომ გარდა იმისა, რომ ჩვენ წარვადგენთ ბიზნესინდექსს, რომელზეც ჩვენ არაერთხელ გვისაუბრია თქვენთან სტუდიაში, და ვნახავთ ბოლო, მესამე კვარტლის შედეგებს, რაც, სხვათა შორის, ძალიან მაღალი რიცხვებია, ძალიან კარგი ნიშანია იმისა, რომ ინვესტიციებია ქვეყანაში. თუმცა, ამავდროულად, ვხედავთ, რომ, მიუხედავად იმისა, რომ კლება არის ხელის შემშლელი ფაქტორების ნაწილში, დაახლოებით ათი პუნქტია კლება წინა კვარტალთან შედარებით, მაინც ვხედავთ, რომ მანამდე თუ იყო, პირობითად, 60%-მდე, დღეს არის 50% კომპანიების, რომლებიც გარკვეულ ნაწილში საუბრობენ ხელის შემშლელ ფაქტორებზე.
მნიშვნელოვანია, რომ აქ ახსენი კიდევაც, რომ პირველ ადგილზე ეს არის კვალიფიციური სამუშაო ძალა, კვალიფიციური კადრები, მაგრამ მეორე ადგილზე არის ადმინისტრაციული პრობლემები, რეგულაციები და ასე შემდეგ. სწორედ ეს არის ეს ფორმატი, როდესაც პრემიერი პანელზე უშუალოდ დაჯდება და ექნება მას პირდაპირი კომუნიკაცია ბიზნესთან.
ძალიან მნიშვნელოვანია მეორე პანელიც, იმიტომ რომ ამ მეორე პანელზე იქნება წარმოდგენილი ეკონომიკური ბლოკის ყველა მინისტრი. იქნება ეროვნული ბანკის პრეზიდენტი, ქალბატონი ნათია, და აქაც სექტორულად, მიმართულებების მიხედვით, გვექნება შესაძლებლობა, რომ ძალიან ღია და უშუალო დიალოგი წარვმართოთ საქართველოს მთავრობასთან.
ჩვენ ეს დიალოგი ტრადიციად ჩამოგვიყალიბდა. ამ ტიპის ფორუმების გამართვა და ვფიქრობ, რომ ძალიან მნიშვნელოვანი ფაქტორია თვითონ მთავრობისთვისაც, მოისმინოს კიდევ ერთხელ, გაიაზროს ის რეფორმები, ცვლილებები და, თუ რაიმე დასაკორექტირებელია, ერთად ვიმუშაოთ ამაზე, იმისათვის, რომ აქ ყველაზე მთავარი გვქონდეს მაღალი ეკონომიკური ზრდა.
ეს თავისთავად ნიშნავს ბიუჯეტში დამატებით შემოსავლებს და, მეორეს მხრივ, ეს ნიშნავს დამატებით გენერირებულ შემოსავალს კომპანიებისთვის. ანუ ეს არის ორმხრივი ინტერესი ქვეყნისთვის, კომპანიებისთვის, ჩვენი მოსახლეობისთვის და, შესაბამისად, ამაზე ერთად უნდა ვიმუშაოთ ძალიან აქტიურად,
ჩვენ დღის წესრიგს სპეციალურად რატომ არ ვადგენთ? იმიტომ, რომ ჩვენთვის მნიშვნელოვანია, თავად მოდიოდეს კომპანიებისგან, სექტორულად, ის პრობლემები, რომლებიც მათ მიაჩნიათ, რომ დროულად უნდა მოგვარდეს. ჩვენ არ ვკეტავთ, ჩარჩოებს არ ვაწესებთ და ძალიან კარგია, რომ ამაზე მთავრობა მოდის და მას არ სჭირდება რაღაც დადგმული, წინასწარ განსაზღვრული გზავნილების მომზადება.
ეს არის ისეთი ტიპის უშუალო დიალოგი, როდესაც წინასწარ განსაზღვრული დღის წესრიგის გარეშე კომპანიებს ექნებათ შესაძლებლობა, საკუთარი საკითხები დააყენონ და, შესაბამისად, მთავრობის ყველაზე მაღალი ინსტანცია - პრემიერ-მინისტრი, მინისტრები და ა.შ. ყველანი იქნებიან წარმოდგენილები აქ, სხვათა შორის, მოადგილეებიც, იმისათვის, რომ უშუალოდ ადგილზე კონკრეტული პასუხებიც გავცეთ და, თუ რაიმე პროცესი არის დასაწყები, ერთად დავიწყოთ და ვიმუშაოთ“, - აცხადებს ლევან ვეფხვაძე.