Self.HR ქართული ტექნოლოგიური კომპანიაა, რომელიც 2021 წლიდან ქმნის ციფრულ პლატფორმას HR და ბიზნესპროცესების ავტომატიზაციისთვის. კომპანია აქტიურად ავითარებს ახალ მოდულებს, მუშაობს ხელოვნური ინტელექტის ინტეგრაციაზე და საერთაშორისო ბაზრებზე გაფართოებას განაგრძობს. მიმდინარე პროექტებსა და სამომავლო გეგმებზე Business Insider Georgia-ს კომპანიის დამფუძნებელი, ნინო ფეიქრიშვილი ესაუბრა.

რა მიმართულებებზე აკეთებს დღეს Self.HR მთავარ აქცენტს და როგორ იცვლება პლატფორმა მომხმარებლის საჭიროებებთან ერთად?

Self.HR-ის მთავარი მისია და ფოკუსი უცვლელია - კომპანიებში პროცესების გაციფრულებისა და ავტომატიზაციის გზით ადამიანებისთვის დროის დაზოგვა. დღესაც გვჯერა, რომ ტექნოლოგიის მთავარი დანიშნულება რუტინული პროცესების გამარტივებაა, რათა ადამიანები უფრო ღირებულ და სტრატეგიულ საქმიანობაზე იყვნენ კონცენტრირებულები.

სწორედ ამ ხედვით დავიწყეთ HR პროცესების ავტომატიზაცია, თუმცა წლების განმავლობაში მომხმარებლების საჭიროებების შესწავლამ და ახალი პროდუქტების დამატებამ დაგვანახა, რომ კომპანიებს გაციფრულება მხოლოდ HR მიმართულებით არ სჭირდებათ. რეალურად, კომპანიებში უამრავი ბიზნესპროცესია, რომელიც ჯერ კიდევ ხელით იმართება და მნიშვნელოვან დროსა და რესურსს მოითხოვს.

ამიტომ დღეს Self.HR-ის განვითარება უკვე უფრო ფართო ხედვას ეფუძნება. ჩვენი მიზანია არა მხოლოდ HR პროცესების, არამედ ზოგადად ბიზნესპროცესების გაციფრულება, ავტომატიზაცია და ერთიან ეკოსისტემაში გაერთიანება. სწორედ ამიტომ დავამატეთ ისეთი მიმართულებები, როგორიცაა რეკრუტინგი, ონბორდინგი, დავალებების მართვა, ანალიტიკა და სხვა ინსტრუმენტები, რომლებიც კომპანიებს ყოველდღიური ოპერაციების უფრო ეფექტიანად მართვაში ეხმარება.

ბოლო პერიოდში რა ახალი პროდუქტები ან ფუნქციონალი დაამატეთ და როგორია კომპანიების მხრიდან უკუკავშირი?

ბოლო პერიოდის ჩვენი ყველაზე მნიშვნელოვანი სიახლეა სისტემაში Task Management-ის მოდულის დამატება. რომელიც კომპანიებს საშუალებას აძლევს ერთიან სისტემაში მართონ დავალებები, გადაანაწილონ პასუხისმგებლობები და თვალი ადევნონ სრულ პროცესს. ეს განსაკუთრებით მნიშვნელოვანია იმ ორგანიზაციებისთვის, სადაც რამდენიმე დეპარტამენტი ან გუნდი პარალელურად მუშაობს.

მინდა აღვნიშნო, რომ დავალებების მართვაზე კომპანიების მხრიდან მიღებული უკუკავშირი ძალიან პოზიტიურია. მომხმარებლები განსაკუთრებით აფასებენ იმას, რომ სხვადასხვა პროცესის მართვა უკვე ერთ ეკოსისტემაშია შესაძლებელი და აღარ სჭირდებათ რამდენიმე განსხვავებული პლატფრორმის გამოყენება. გარდა ამისა, მათთვის რეალურად შესაძლებელი გახდა თანამშრომლების და პროცესების ეფექტურობის შეფასება.

კიდევ ერთი მნიშვნელოვანი განახლება, რაც ბოლო პერიოდში სისტემაში გადავიდა ანალიტიკის მოდულს ეხება. სრულად განახლდა ფუნქციონალი, დაემატა ისეთი რეპორტები და ჩარტები, რომლებიც ვფიქრობ, სწორი გადაწყვეტილებების მისაღებად უმნიშვნელოვანესია. და რაც მთავარია, ამ რეპორტებისა და ჩარტების ნახვა უკვე მარტივი ვიზუალიზაციითაა შესაძლებელი.

AI ტექნოლოგიების განვითარებასთან ერთად, როგორ იცვლება HR პროცესები და რა როლი აქვს ამ მიმართულებით Self.HR-ს?

დღეს თითქმის არ დარჩა სფერო, სადაც ხელოვნური ინტელექტი არ შეჭრილა. გამონაკლისი არც HR-ია და ვფიქრობ, ადამიანური რესურსების მართვაში მისი მთავარი როლია იყოს დამხმარე, ასისტენტი, რომელიც ადამიანებს ყოველდღიური საქმიანობის უფრო სწრაფად და ეფექტიანად შესრულებაში დაეხმარება.

და რადგანაც Self.HR-ის მისია ყოველთვის იყო ტექნოლოგიებისთვის რუტინული საქმის გადაბარება, AI მიმართულება ჩვენი განვითარების ერთ-ერთი მთავარი პრიორიტეტი გახდა და წლის პროექტიც სწორედ სისტემის ყველა მოდულში ხელოვნური ინტელექტის ჩაშენებაა.

პროექტის მასშტაბურობიდან გამომდინარე, გაჩნდა საჭიროება გუნდში აგვეყვანა AI კონსულტანტი, რომელიც ჩვენს დეველოპერებთან ერთად აქტიურად მუშაობს სისტემის AI შესაძლებლობების განვითარებაზე.

საერთაშორისო ბაზრების მიმართულებით როგორ ვითარდება კომპანია და რომელ ქვეყნებში ხედავთ ყველაზე დიდ ინტერესს?

საერთაშორისო მიმართულება ჩვენი განვითარების ერთ-ერთი მნიშვნელოვანი სტრატეგიული პრიორიტეტია. ბოლო წლების განმავლობაში შევძელით პროდუქტის ისეთი არქიტექტურის შექმნა, რომელიც სხვადასხვა ქვეყნის შრომით და საგადასახადო გარემოს ადვილად ერგება და უკვე ვპარტნიორობთ უზბეკეთში რამდენიმე კომპანიასთან.

ინტერესი განსაკუთრებით მაღალია კავკასიის რეგიონში, ცენტრალურ აზიასა და აღმოსავლეთ ევროპის ქვეყნებში, სადაც კომპანიები აქტიურად ეძებენ თანამედროვე HR ტექნოლოგიებს. ამ ბაზრებზე მოთხოვნა სწრაფად იზრდება, რადგან ბიზნესები სულ უფრო მეტად აცნობიერებენ ციფრული ტრანსფორმაციის მნიშვნელობას ადამიანური რესურსების მართვაში.

ჩვენი მიზანია Self.HR გახდეს რეგიონში ერთ-ერთი ყველაზე ძლიერი HR ტექნოლოგიური პლატფორმა და ეტაპობრივად გავაფართოოთ ჩვენი საერთაშორისო წარმომადგენლობა.

სამომავლოდ, რა ახალ ტექნოლოგიურ მიმართულებებსა და სიახლეებზე მუშაობს Self.HR?

დღეს, როგორც ვახსენე, აქტიურად ვმუშაობთ სისტემაში AI აგენტების ჩაშენებაზე, რაც HR პროცესებს კიდევ უფრო მარტივს გახდის.

ამავდროულად, ჩვენი განვითარების გეგმები უკვე სცდება მხოლოდ HR სფეროს. ბოლო წლების განმავლობაში დავინახეთ, რომ კომპანიებს სჭირდებათ არა ერთმანეთისგან დამოუკიდებელი პროგრამები, არამედ ერთიანი ტექნოლოგიური ეკოსისტემა, სადაც სხვადასხვა ბიზნესპროცესის მართვა ერთ სივრცეშია შესაძლებელი.

სწორედ ამიტომ ვმუშაობთ ახალ მოდულებსა და მიმართულებებზე, რომლებიც დაეხმარება კომპანიებს არა მხოლოდ თანამშრომლების მართვაში, არამედ ყოველდღიური ოპერაციების, კომუნიკაციის, დავალებების, სამუშაო პროცესებისა და ორგანიზაციული ეფექტიანობის მართვაში. ჩვენი მიზანია, Self.HR ეტაპობრივად გარდაიქმნას პლატფორმად, რომელიც ბიზნესს მისცემს ყველა იმ ტექნოლოგიურ ხელსაწყოს, რაც ზრდისა და ეფექტური მართვისთვის სჭირდება.