„არტიტექსი“ არქიტექტურული და საპროექტო კომპანიაა, რომელიც სხვადასხვა მასშტაბის პროექტებზე მუშაობს როგორც საქართველოს, ისე საერთაშორისო ბაზარზე. კომპანიის საქმიანობაში მნიშვნელოვანი ადგილი უჭირავს დეველოპერულ პროექტებსა და საერთაშორისო თანამშრომლობას. მიმდინარე პროექტებისა და სამომავლო გეგმების შესახებ Business Insider Georgia-ს კომპანიის თანადამფუძნებელი და დირექტორი დარეჯან შათაშვილი ესაუბრა.

რა სიახლეები აქვს „არტიტექსს“ ამ ეტაპზე? რომელ პროექტებზე მუშაობს კომპანია და რა მიმართულებებია ამჟამად პრიორიტეტული?

„არტიტექსის“ მიმდინარე პროექტებს შორისაა „იგლ ჰილსის“ ფონიჭალის პროექტი, რომელშიც ამ ეტაპზე აქტიურად ვართ ჩართული. ასევე, ჩვენი პროექტით შენდება წალენჯიხის იუსტიციის სახლი, რომელსაც ვასრულებთ კონკურსის მოგების საფუძველზე.

ბოლო პერიოდში განსაკუთრებით გავაქტიურდით სახელმწიფო პროექტებში. აქტიურად ვიღებთ მონაწილეობას სახელმწიფო ტენდერებსა და კონკურსებში, რადგან ინფრასტრუქტურისა და იუსტიციის სახლების მხრიდან არაერთი საინტერესო პროექტი იქნა შემოთავაზებული და ამ მიმართულებით ჩვენი მხრიდან ინტერესი დიდია.

ამასთანავე, კვლავ ვთანამშრომლობთ დეველოპერულ კომპანიებთან. ჩვენი დამკვეთია „თეთრი კვადრატი“, „მეტროპოლი“ და სხვა. არსებულ პარტნიორებსა და მიმდინარე პროექტებს დაემატა „იგლ ჰილსიც“, რომელიც ჩვენი კორპორატიული დამკვეთია. ამ კომპანიასთან აქტიურ სამუშაო ფაზაში ვართ და ამ ეტაპზე საკმაოდ მასშტაბურ პროექტებს ვახორციელებთ.

მესტიის ქორწინების სახლის პროექტმა საერთაშორისო აღიარება და ორი ჯილდო მოიპოვა. როგორ შეაფასებთ ამ შედეგს და რა მნიშვნელობა აქვს მსგავს აღიარებას კომპანიის საქმიანობისა და საერთაშორისო ცნობადობისთვის?

პირველ რიგში, მინდა ხაზი გავუსვა, რომ მესტიის ქორწინების სახლმა კიდევ ერთი ჯილდო მოიპოვა. თავდაპირველად პროექტს ორი ჯილდო ჰქონდა მიღებული ტოკიოში და იტალიაში, ახლა კი კვლავ ტოკიოში დაჯილდოვდა. ჯამში, პროექტს უკვე სამი საერთაშორისო ჯილდო აქვს მოპოვებული.

ეს საკმაოდ მასშტაბური აღიარებაა და ძალიან გვიხარია, რადგან ამით მხოლოდ „არტიტექსის“ სახელი კი არ ხდება ცნობილი, არამედ საქართველოს სახელიც გადის საერთაშორისო ასპარეზზე. პროექტმა იმდენად დიდი მოწონება დაიმსახურა, რომ საერთაშორისო დონის დამკვეთებთან შეხვედრების დროს ხშირად გვეუბნებიან, რომ მესტიის ქორწინების სახლი უკვე ნანახი აქვთ და მის შესახებ ინფორმაციას ფლობენ.

მაგალითად, სასტუმროების საერთაშორისო ბრენდის Marriott-ის ვიცე-პრეზიდენტთან შეხვედრისას აღმოჩნდა, რომ მან უკვე იცოდა ამ პროექტის შესახებ. ჩემთვის ეს ძალიან სასიამოვნო ფაქტი იყო.

აქვე უნდა აღვნიშნო, რომ ჩვენ მხოლოდ კონცეფციური პროექტი შევქმენით და ეს სამუშაო საჩუქრად შევასრულეთ. პროცესში იუსტიციის სახლის ხელმძღვანელობაც აქტიურად იყო ჩართული და პროექტზე გუნდურად ვმუშაობდით. ჩვენი მთავარი მიზანი იყო, შეგვექმნა სივრცე, რომელიც მაქსიმალურად იქნებოდა მორგებული საქართველოს მოსახლეობასა და ადამიანების საჭიროებებზე, მათ კომფორტზე. ქორწინების სახლის ფუნქციიდან გამომდინარე, ამ პროექტს განსაკუთრებული სიმბოლური დატვირთვაც ჰქონდა.

ამასთანავე, მნიშვნელოვანია მისი მდებარეობა - მესტია, თავისი უნიკალური ბუნებრივი გარემოთი და კულტურული იდენტობით. ვფიქრობ, სწორედ ამ ფაქტორების ერთობლიობამ განაპირობა პროექტის განსაკუთრებული მოწონება საერთაშორისო ასპარეზზე.

როგორია კომპანიის საერთაშორისო საქმიანობა? მუშაობთ თუ არა უცხოელ დამკვეთებთან და განიხილავთ თუ არა ახალი ბაზრების ათვისებას?

საერთაშორისო ბაზარზე უცხოელ დამკვეთებთან აქტიურად ვმუშაობთ. გვყავს უცხოელი პარტნიორები როგორც საქართველოს ბაზარზე, ისე სხვა ქვეყნებში და სხვადასხვა პროექტს ვემსახურებით. თუმცა, მათი უმეტესობა კონფიდენციალურია, შესაბამისად, კონკრეტული პროექტების შესახებ დეტალების გაზიარების შესაძლებლობა არ გვაქვს.

ამ ეტაპზე ერთ-ერთი ასეთი პროექტია ჰეიდარ ალიევის სახელობის თეატრი, რომლის განხორციელებაშიც უცხოელ დამკვეთთან ერთად ვართ ჩართული.

რა გეგმები აქვს „არტიტექსს“ სამომავლოდ? იგეგმება თუ არა ახალი მასშტაბური პროექტების განხორციელება, საქმიანობის გაფართოება ან საერთაშორისო მიმართულების გაძლიერება?

ჩვენი კომპანია მუდმივად ორიენტირებულია ზრდასა და განვითარებაზე და ყოველწლიურად საკმაოდ მასშტაბურად ვიზრდებით. შესაბამისად, არ გამოვრიცხავთ, რომ 2027 წელს ახალი ფილიალები უკვე საერთაშორისო ბაზრებზეც გავხსნათ, საქართველოს ფარგლებს გარეთ.

ამ მიმართულებით გეგმები გვაქვს, თუმცა ჯერჯერობით ყველაფერი საწყის ეტაპზეა.