ბიოლოგიურად აქტიური დანამატი და სამკურნალო წყალი Normox-ი მომხმარებელს უკვე ონლაინ გაყიდვებისა და სახლში მიტანის სერვისსაც სთავაზობს. ამის შესახებ Business Insider Georgia-ს კომპანიის დამფუძნებელმა და დირექტორმა, ბესიკ კაციტაძემ, განუცხადა.

„უკვე დავიწყეთ ონლაინ გაყიდვები და მომხმარებლებს სახლში მიტანის სერვისსაც ვთავაზობთ, რაც ჩვენი განვითარებისთვის მნიშვნელოვანი ნაბიჯია.

მაისის თვეში, Strongman-ის ევროპის ჩემპიონატში პარტნიორის სტატუსით მივიღეთ მონაწილეობა. ამ თანამშრომლობამ დიდი გამოხმაურება და პატივისცემა გამოიწვია. მსოფლიო ჩემპიონებმა თავად დაიწყეს „ნორმოქსზე“ საუბარი და მისი აქტიური მომხმარებლებიც გახდნენ. ეს ჩვენთვის მნიშვნელოვანი აღიარებაა და გვაძლევს მოტივაციას, რომ განვითარება იმავე ტემპით გავაგრძელოთ.

ონლაინ გაყიდვების ამოქმედებამ ჩვენი ცნობადობა მნიშვნელოვნად გაზარდა. აქამდე მომხმარებლებს სახლში მიტანის სერვისი არ ჰქონდათ და პროდუქციის შეძენა ვებგვერდის საშუალებითაც შეუძლებელი იყო, რაც გარკვეულ დისკომფორტს ქმნიდა, მიუხედავად იმისა, რომ ჩვენი პროდუქცია რამდენიმე ლოკაციაზე უკვე იყიდებოდა. დღეს უკვე ფუნქციონირებს განახლებული ვებგვერდი, სადაც ონლაინ გაყიდვები და მიტანის სერვისია ინტეგრირებული. შესაბამისად, მომხმარებლისთვის პროდუქციის შეძენა გაცილებით მარტივი გახდა, რაც ბრენდის ცნობადობის ზრდაზეც დადებითად აისახა“, - აცხადებს ბესიკ კაციტაძე.

კომპანია სამომავლოდ საკუთარი ჩამომსხმელი ხაზის შექმნას გეგმავს.

„რაც შეეხება სამომავლო გეგმებს, ჩვენი მთავარი პრიორიტეტი საკუთარი ჩამომსხმელი ხაზის შექმნაა. მოთხოვნა მნიშვნელოვნად გაიზარდა, თუმცა არსებული წარმოების მოდელი გარკვეულ შეფერხებებს იწვევს, რადგან სხვა საწარმოზე ვართ დამოკიდებული და რიგების გამო წარმოების პროცესიც ხშირად ფერხდება. სწორედ ამიტომ, ვმუშაობთ იმაზე, რომ გრანტის მოპოვების გზით საკუთარი ჩამომსხმელი ხაზი შევქმნათ და წარმოების პროცესში სრულად დამოუკიდებლები გავხდეთ.

გარდა „ნორმოქსის“ წყლისა, უკვე ორ წელიწად-ნახევარია ბაზარზე წარმოდგენილი გვაქვს ეკოლოგიურად სუფთა, ორგანული საწვავის დანამატი, რომელიც „გალფის“ ავტოგასამართ სადგურებზე იყიდება. ჩვენი კვლევების მიხედვით, ეს პროდუქტი ბენზინისა და დიზელის ძრავებიდან მავნე გამონაბოლქვს დაახლოებით 70%-ით ამცირებს. დანამატი დაპატენტებულია და მისი ეფექტიანობა მსოფლიოს წამყვანი საერთაშორისო ლაბორატორიების დასკვნებითაც არის დადასტურებული. პროდუქტი გამოცდილია როგორც ლონდონის, ისე ჰაიფის და სხვა საერთაშორისო კვლევით ცენტრებში, რომლებიც CO-ს, NOx-ისა და სხვა მავნე ემისიების შემცირებას იკვლევენ.

შეიძლება ამბიციურად ჟღერდეს, თუმცა გვჯერა, რომ ეს ქართველი გამომგონებლების მიერ შექმნილი უნიკალური პროდუქტია, რომელსაც მსოფლიო ბაზარზე ანალოგი არ გააჩნია. ჩვენი მიზანია, მომავალში ორივე ეკოლოგიურად სუფთა პროდუქტი „ნორმოქსის“ წყალი და საწვავის დანამატი ერთიანი საწარმოო სივრციდან ვაწარმოოთ. თუმცა ამ ეტაპზე ჩვენი ნომერ პირველი ამოცანა სწორედ საკუთარი ჩამომსხმელი ხაზის შექმნაა, რათა წარმოებაში აღარ ვიყოთ სხვებზე დამოკიდებული“, - აცხადებს კომპანიის დამფუძნებელი.

ინფორმაციისთვის, სამკურნალო წყალი Normox-ი ახდენს ნებისმიერი წარმოშობის ჰიპოქსიის (ჟანგბადის ნაკლებობის) კომპენსირებას, როგორც ჰემოგლობინის ნაკლებობის, გულ-სისხლძარღვთა, ფილტვების დაავადებების, ფსორიაზის, ასევე ფიზიკური ან გონებრივი დატვირთვის დროს, აიოლებს ორსულობის პერიოდს და სხვა.