MacFrut 2026-ზე მონაწილეობა ჩვენი კომპანიისთვის ძალიან მნიშვნელოვანი და წარმატებული გამოცდილება იყო, - ამის შესახებ, Business Insider Georgia-ს წამყვანი აგრო-საკონსულტაციო კომპანია „ნიადაგის“ მარკეტინგის ხელმძღვანელმა, სალომე დიდებაშვილმა განუცხადა.

როგორ შეაფასებთ MacFrut 2026-ზე მონაწილეობას?

MacFrut 2026-ზე მონაწილეობა ჩვენი კომპანიისთვის ძალიან მნიშვნელოვანი და წარმატებული გამოცდილება იყო. აღნიშნული გამოფენა წარმოადგენს ერთ-ერთ ყველაზე მნიშვნელოვან საერთაშორისო პლატფორმას აგროსექტორში, სადაც თავს იყრიან როგორც ტექნოლოგიური კომპანიები, ასევე მწარმოებლები, ინვესტორები და საერთაშორისო პარტნიორები მსოფლიოს სხვადასხვა ქვეყნიდან.

ჩვენთვის ეს იყო შესაძლებლობა, ერთი მხრივ, საერთაშორისო აუდიტორიისთვის გაგვეცნო „ნიადაგის“ საქმიანობა, მიმდინარე პროექტები და ხედვა, ხოლო მეორე მხრივ, ადგილზე გავცნობოდით თანამედროვე ტექნოლოგიებს, ინოვაციურ მიდგომებსა და ბაზარზე არსებულ ახალ ტენდენციებს.

გამოფენის ფარგლებში შედგა არაერთი მნიშვნელოვანი შეხვედრა პოტენციურ პარტნიორებთან, ტექნოლოგიურ კომპანიებთან და საერთაშორისო აგრო-ბრენდებთან, რაც მომავალში თანამშრომლობის რეალურ შესაძლებლობებს ქმნის. განსაკუთრებით მნიშვნელოვანია, რომ საერთაშორისო ბაზარზე იზრდება ინტერესი საქართველოს აგროპოტენციალის მიმართ და მსგავსი ღონისძიებები ამ ინტერესის გაღრმავებას მნიშვნელოვნად უწყობს ხელს.

გაქვთ თუ არა დაინტერესება ახალ პარტნიორებთან თანამშრომლობის დაწყების მიმართულებით?

რა თქმა უნდა, ახალი პარტნიორული ურთიერთობების განვითარება „ნიადაგის“ ერთ-ერთი მთავარი პრიორიტეტია. ჩვენი საქმიანობის სპეციფიკიდან გამომდინარე, ჩვენთვის განსაკუთრებით მნიშვნელოვანია ისეთი პარტნიორების მოძიება, რომლებიც ორიენტირებულნი არიან ხარისხზე, ინოვაციებზე და გრძელვადიან თანამშრომლობაზე.

ჩვენ აქტიურად ვმუშაობთ როგორც ადგილობრივ, ისე საერთაშორისო კომპანიებთან თანამშრომლობის გაღრმავებაზე. განსაკუთრებით საინტერესოა პარტნიორობა იმ ორგანიზაციებთან, რომლებიც მუშაობენ აგრო-ტექნოლოგიების, პლანტაციების მართვის, ექსპორტის, გადამუშავებისა და თანამედროვე სასოფლო-სამეურნეო გადაწყვეტილებების მიმართულებით. 

დღეს აგროსექტორი ძალიან სწრაფად ვითარდება და წარმატებისთვის აუცილებელია ცოდნის, გამოცდილებისა და ტექნოლოგიების გაცვლა. სწორედ ამიტომ, ჩვენთვის საერთაშორისო პარტნიორობა არა მხოლოდ ბიზნესის გაფართოების, არამედ სექტორის საერთო განვითარების მნიშვნელოვანი ინსტრუმენტია.