ჩვენს სექტორში კანონმდებლობა ძალიან მნიშვნელოვანია, - მიიჩნევს ბიოქიმფარმის გენერალური მენეჯერი, რატი ღოლიჯაშვილი, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო.

მისი თქმით, კომპანია დღეს ქართულ ფაგურ პრეპარატებს უკვე რამდენიმე ქვეყანაში ექსპორტზე აწვდის და სამომავლოდ ბაზრების მნიშვნელოვნად გაფართოებას გეგმავს.
„2022 წელს ჩვენთან შემოვიდა ერთ-ერთი სავალდებულო საერთაშორისო სტანდარტი - კარგი საწარმოო პრაქტიკა, რასაც შემოკლებით GMP-ს ვეძახით. ხელშეწყობით ჩვენ შევძელით და 2023 წლის 15 სექტემბერს გავხდით მსოფლიოში ერთადერთი ინდუსტრიული მასშტაბის GMP სერტიფიცირებული ფაგების საწარმო. ჩვენ ვაწარმოებთ წამლის სტერილურ სითხოვან ფორმებს. ამჟამად ეს უნიკალური ქართული ფაგები რვა ქვეყანაში გაგვაქვს და გვაქვს ამბიცია, რომ ჩვენი პროდუქცია 80 ქვეყანაში გავიტანოთ“, - ამბობს რატი ღოლიჯაშვილი.
ბიოქიმფარმის გენერალური მენეჯერის განცხადებით, მსოფლიოში ფაგებზე დაფუძნებული პრეპარატების მიმართ ინტერესი ანტიბიოტიკორეზისტენტობის ზრდასთან ერთად მატულობს.

მისი თქმით, ამ მიმართულებით განსაკუთრებით მნიშვნელოვანია GMP სტანდარტის სრულფასოვანი დანერგვა და ცნობადობის გაზრდა, რათა ფაგური პრეპარატების წარმოება საერთაშორისო ხარისხის მოთხოვნებს სრულად შეესაბამებოდეს.

„ჩვენ ვფიქრობთ, რომ არა მხოლოდ საქართველოში, არამედ გლობალურადაც ფაგების აქტუალურობა იზრდება ანტიბიოტიკების მიმართ რეზისტენტობიდან გამომდინარე. GMP სტანდარტი ამის ძალიან კარგი მაგალითია. უაღრესად მნიშვნელოვანია, რომ ეს სტანდარტი იყოს ბოლომდე დანერგილი, საქართველოშიც ამაღლდეს ცნობადობა და ყველა პრეპარატი, რომელიც ფაგებზეა დაფუძნებული, იყოს წარმატებული და შეესაბამებოდეს GMP სტანდარტს“, - ამბობს კომპანიის გენერალური მენეჯერი. 
მისი თქმით, განცხადებით, კომპანიის საინვესტიციო პროექტებზე მნიშვნელოვანი გავლენა მიწოდების ჯაჭვის შეფერხებებმა მოახდინა. მისი თქმით, საწარმოო ხაზების მოწყობის პროცესი განსაკუთრებით ჩიპებისა და უჟანგავი ფოლადის დეფიციტმა შეაფერხა, რის გამოც აღჭურვილობის მიწოდება დაგვიანდა.