წყლის მომავლის პირველი საერთაშორისო ფორუმის ფარგლებს გარეთ ჩატარებული უმაღლესი რანგის შეხვედრები მთავრობისა და ევროპული ინვესტორების საერთო ინტერესებს გამოხატავდა, - მიიჩნევს კომპანია  GWP-ის კომუნიკაციების დირექტორი. 

როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას ეკა ბერიძემ განაცხადა, ასეთი თანამშრომლობა აუცილებელია, რადგან როგორც სახელმწიფოს, ისე ინვესტორების მიზანია, საქართველო რეგიონში წყალმომარაგების დარგში ერთ-ერთი ყველაზე წარმატებული ქვეყანა გახდეს. მისივე შეფასებით, წყალმომარაგება სხვა ეკონომიკურ სექტორებთან მჭიდროდაა დაკავშირებული, ამიტომ მის განვითარებას არა მხოლოდ ინდუსტრიის, არამედ ქვეყნის ზოგადი განვითარებისთვის გადამწყვეტი მნიშვნელობა აქვს.

„იყო უმაღლესი რანგის შეხვედრები, რაც ადასტურებს ნამდვილად იმას, რომ მთავრობას და წყალმომარაგებაში მთავარ კვალიფიციურ ინვესტორს, თანაც ევროპულ წამყვან კომპანიას, აქვთ საერთო ინტერესები. მათ აუცილებლად სჭირდებათ თანამშრომლობა იმიტომ, რომ ჩვენი მიზნები არის აბსოლუტურად საერთო. იმიტომ, რომ გვინდა საქართველო გახდეს წყალმომარაგების დარგში და არა მხოლოდ წყალმომარაგების დარგში, თუმცა სხვა დარგები ძალიან არის წყალმომარაგებაზე მიბმული, წარმატებულები უნდა გავხდეთ, უნდა გავხდეთ რეგიონში ყველაზე წარმატებულები და ჩვენ ამის პოტენციალი გვაქვს. ამას ხედავს ყველა აქტორი ჩემი აზრით დღეს უკვე“, - აცხადებს ეკა ბერიძე.

GWP-ის კომუნიკაციების დირექტორის თქმით, „აქვალია“ გეგმავს სხვა რეგიონულ ბაზრებზე გასვლას, თუმცა საქართველო რჩება მთავარი ცენტრი, სადაც კომპანია უზრუნველყოფს წყალმომარაგების მომსახურებას თბილისში, რუსთავსა და მცხეთაში. 

„მათთვის საქართველო არის განსაკუთრებული ქვეყანა.​ მით უმეტეს რომ "აქვალია" აპირებს რეგიონში სხვა ქვეყნებშიც შევიდეს, პენეტრაციას აპირებს სხვა ბაზრებზეც და მათთვის სწორედ საქართველოა წარმოდგენილი როგორც ჰაბი, სადაც ისინი წყალმომარაგების მომსახურებას უწევენ თბილისს, რუსთავს, მცხეთას. მოკლედ ამ კომპანიას სრული მზაობა აქვს მას იმისთვის რომ საქართველო აქციოს ჰაბად. ეს თუ ასე მოხდება "აქვალიას" დიდი დამსახურება იქნება მთავრობის ხელშეწყობით რა თქმა უნდა“, - აღნიშნავს ეკა ბერიძე.