ავთენტური იტალიური გემო და ნეაპოლიტანური ტრადიციები - როგორია Gennaro Pizza Tbilisi-ს კონცეფცია და განვითარების გეგმები

ბიზნესი

ჩვენ თითქმის ყველა სექტორისთვის საინტერესო პარტნიორი ვხდებით - Kairos Logistics-ის გენერალური დირექტორი

25.05.2026.16:30

Kairos Logistics-ის გენერალური დირექტორის, მიხეილ ნამადოვის განმარტებით, საქართველო ლოგისტიკური მიმართულებით თითქმის ყველა სექტორისთვის საინტერესო ხდება. როგორც მიხეილ ნამადოვმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა, ამ ეტაპზე ყველაზე მოთხოვნადი FMCG, რითეილ, ავტონაწილებისა და სამშენებლო სექტორებია, ხოლო საერთაშორისო ბრენდები უკვე საქართველოს მიმართულებით რეგიონული ჰაბების განვითარების ინტერესს გამოხატავენ.

„დღეს, ყოველდღიურ ჭრილში, პირველ რიგში, FMCG სექტორს ვუკავშირდებით, ასევე აქტიურად ვითარდება საცალო ვაჭრობა (რითეილი), სამშენებლო მასალების ბაზარი და, განსაკუთრებით გამოვყოფდი, ავტონაწილების სექტორს, რომელიც მზარდი ტენდენციით ხასიათდება. სხვათა შორის, დუბაი მთელ რეგიონში ერთ-ერთი საკვანძო ლოგისტიკური ჰაბი იყო, საიდანაც, მათ შორის, საქართველოც მარაგდებოდა. დღეს კი საერთაშორისო ბრენდები უკვე თავად გვიკავშირდებიან. მათ სურთ მინი ლოკალური და რეგიონული ჰაბების განვითარება სწორედ საქართველოს მიმართულებით. ამიტომ, დღეს თამამად შეიძლება ითქვას, რომ ჩვენ თითქმის ყველა სექტორისთვის საინტერესო პარტნიორი ვხდებით“, - აღნიშნა მიხეილ ნამადოვმა.

Kairos Logistics-ის გენერალური დირექტორის თქმით, ახლო აღმოსავლეთში რთულმა გეოპოლიტიკურმა ვითარებამ საზღვაო გადაზიდვები მნიშვნელოვნად დააზარალა, რის შედეგადაც ტვირთების ტრანზიტის ვადები მკვეთრად გაიზარდა. ნამადოვის შეფასებით, კომპანიებისთვის დღეს განსაკუთრებით მნიშვნელოვანია ლოკალური მარაგებისა და წარმომადგენლობების შექმნა, რადგან კონკურენცია მაღალია და ბაზარზე შეფერხებები ბიზნესისთვის სერიოზულ რისკებს ქმნის.

„როგორც მინიმუმ, ისინი ფიქრობენ ლოკალური წარმომადგენლობის გახსნაზე ან საკუთარი მარაგების დივერსიფიკაციაზე. ფაქტობრივად, მას შემდეგ, რაც ომი დაიწყო, უკვე ორი-სამი თვეა, სრული კოლაფსია უშუალოდ სპარსეთის ყურის რეგიონში. ამ ვითარებამ და შექმნილმა წნეხმა უარყოფითი გავლენა მოახდინა საზღვაო ხაზებზეც და გადაზიდვები მთლიანად არეულია. მაგალითად, თუ ადრე ჰამბურგიდან ფოთში კონტეინერი დაახლოებით 3-4 კვირაში ჩამოდიოდა, დღეს ეს პროცესი უკვე 2-2.5 თვემდე იწელება. აქედან გამომდინარე, ეს ერთ-ერთი გადამწყვეტი ფაქტორია, რადგან ყველას კარგად ესმის, თუ დღეს პროდუქცია თაროზე არ გიდევს, ხვალ რომელიმე ლოკალური მოთამაშე ჩაგენაცვლება და ბაზრიდან ამოვარდები. კონკურენცია საკმაოდ მძაფრია“, - აღნიშნა ნამადოვმა.