Food Alliance პროდუქციის ასორტიმენტს აფართოებს და მომხმარებელს ახალ პროდუქტებს სთავაზობს. როგორც Business Insider Georgia-სთან საუბარში კომპანიის გენერალურმა დირექტორმა, ვახტანგ კოხრეიძემ განაცხადა, კომპანიამ პიცის ნახევრად გამომცხვარი გაყინული ბაზების წარმოება დაიწყო, პარალელურად კი ბუნებრივ საფუარზე დამზადებული და განახლებული არტიზანული პურების მიმართულებასაც ავითარებს.

„მიმდინარე პერიოდში რამდენიმე მნიშვნელოვანი სიახლე გვაქვს. ერთ-ერთი მთავარი პიცის ნახევრად გამომცხვარი, გაყინული ბაზების წარმოების დაწყებაა. გარდა ამისა, გავაფართოვეთ ასორტიმენტი ბუნებრივ საფუარზე დამზადებული პურებით და განვაახლეთ არტიზანული პურების ხაზსაც.

პარალელურად, საწარმოში აქტიურად მიმდინარეობს დანადგარების განახლება და ტექნიკური გადაიარაღება, რაც წარმოების ეფექტიანობას კიდევ უფრო ზრდის. გასულ წელთან შედარებით საკმაოდ კარგი დინამიკა გვაქვს, კომპანია სტაბილურად იზრდება“, - აღნიშნავს ვახტანგ კოხრეიძე.

მოთხოვნა პროდუქციისადმი სტაბილურად მზარდია.

„ამ ეტაპზე განსაკუთრებით მაღალი მოთხოვნა ახლახან დამატებულ ოთხ სახეობის სენდვიჩის პურზე ფიქსირდება, მათ შორის განსაკუთრებით პოპულარულია პროტეინის სენდვიჩის პური.

მნიშვნელოვნად იზრდება მოთხოვნა HoReCa სექტორის მხრიდანაც. ამ მიმართულებით გასულ წელთან შედარებით საკმაოდ მაღალი ზრდა გვაქვს, რაც ჩვენი განვითარების ერთ-ერთი მთავარი მამოძრავებელი ფაქტორია“, - ამბობს კომპანიის დამფუძნებელი.

Food Alliance-ის სამომავლო გეგმები HoReCa სექტორში პოზიციების კიდევ უფრო გაძლიერებას გულისხმობს.

„სრულად ფოკუსირებული ვართ ადგილობრივ ბაზარზე, რადგან ზრდის მნიშვნელოვანი პოტენციალი აქვს ჩვენს ბაზარს. გასულ წელთან შედარებით საშუალოდ 35-40%-იან ზრდას ვინარჩუნებთ.

ჩვენი მთავარი პრიორიტეტი HoReCa სექტორში პოზიციების კიდევ უფრო გაძლიერებაა. ამ მიმართულებით გასულ წელს დაახლოებით 56%-იანი ზრდა გვქონდა, ხოლო მიმდინარე წელსაც 40-50%-იან ზრდას ვაფიქსირებთ. ვფიქრობთ, რომ ახალი ტიპის პურებითა და განახლებული კრუასანის ასორტიმენტით ამ ტენდენციის შენარჩუნებასა და კიდევ უფრო გაძლიერებას შევძლებთ.

დღეს პროდუქციას საქართველოს მთელ ტერიტორიაზე ვაწვდით. ვფარავთ როგორც რეგიონებს, ისე მაღალმთიან დასახლებებს - მათ შორის მესტიას. განსაკუთრებით მაღალი ზრდა შავიზღვისპირა რეგიონებში ფიქსირდება.

ამასთან, ვაგრძელებთ საერთაშორისო გამოცდილების გაზიარებას. კვლავ ვთანამშრომლობთ ფრანგ ტექნოლოგთან, რომელიც წარმოების ხარისხის გაუმჯობესებაში გვეხმარება. გარდა ამისა, ახლახან გვყავდა მოწვეული კიდევ ერთი ფრანგი ექსპერტი, რომელმაც ევროპის და მსოფლიო ბაზარზე არსებული აქტუალური პროდუქტები გაგვაცნო, რომელთა ნაწილის წარმოებასაც უახლოეს პერიოდში დავიწყებთ. თუმცა, კონკრეტული ასორტიმენტის გასაჯაროებისგან ამ ეტაპზე თავს შევიკავებ“, - აცხადებს ვახტანგ კოხრეიძე.

ინფორმაციისთვის, „ფუდ ალიანსი“ 2019 წელს დაარსდა წარმოებისა და ბიზნესის განვითარების სფეროში მრავალწლიანი გამოცდილების მქონე ქართველი და ფრანგი პარტნიორების მიერ. კომპანია სპეციალიზებულია მაღალი ხარისხის გაყინული საკონდიტრო ნაწარმის წარმოებაში.