სექტემბრიდან ლუქსემბურგის სავაჭრო სივრცეებში ქართული წარმოების ახალი, ინოვაციური საბავშვო პროდუქტი „ჰამი ქენდი“ გამოჩნდება - ამის შესახებ, Business Insider Georgia-ს ქართული ტრადიციული ნუგბარის პრემიუმ მწარმოებელი კომპანია „ნუგბარის“ აღმასრულებელმა დირექტორმა ნინო გერზმავამ განუცხადა.

„სექტემბრიდან ლუქსემბურგის სავაჭრო სივრცეებში ქართული წარმოების ახალი, ინოვაციური საბავშვო პროდუქტი „ჰამი ქენდი“ გამოჩნდება.

ჩვენი კომპანიისთვის ეს მნიშვნელოვანი ეტაპია, რადგან ბავშვთა კვების მიმართულებით ახალ საფეხურზე გადავდივართ და ევროპელ მომხმარებელს ჩვენი საბავშვო ხაზის ერთ-ერთ ახალ პროდუქტს - „ჰამი ქენდის“ ვთავაზობთ. ეს არის ტკბილეული, რომელიც აერთიანებს ბუნებრივ ინგრედიენტებს, ქართულ ტრადიციებსა და თანამედროვე, ჯანსაღი კვების მოთხოვნებს.

ამ ეტაპზე ლუქსემბურგთან კონტრაქტი უკვე გაფორმებული გვაქვს. ამჟამად ჩინეთიდან შეფუთვის ნიმუშებს ველოდებით, რომლებიც დაახლოებით ათ დღეში უნდა მივიღოთ. მათი დამტკიცების შემდეგ სექტემბერში პირველი საექსპორტო პარტია უკვე გასაგზავნად მზად იქნება.

„ჰამი ქენდის“ სახელწოდება და ვიზუალური კონცეფცია შემთხვევითი არ არის. ჰამსტერს ლუქსემბურგის კულტურულ სივრცეში განსაკუთრებული სიმბოლური დატვირთვა აქვს და ადგილობრივ ისტორიასა და ფოლკლორულ ელემენტებთან ასოცირდება.

სწორედ ამიტომ შევქმენით კონცეფცია, რომელიც აერთიანებს ქართულ წარმოებასა და ლუქსემბურგის კულტურულ ელემენტებს. ჩვენი მიზანია, ევროპელ მომხმარებელს შევთავაზოთ პროდუქტი, რომელიც მისთვის ერთდროულად ახალი, საინტერესო და ნაცნობი იქნება.

ვხედავთ, რომ თანამედროვე მშობლები სულ უფრო მეტ ყურადღებას აქცევენ ბავშვების კვების ხარისხს და ეძებენ პროდუქტებს, რომლებიც ტრადიციული ტკბილეულისგან განსხვავებით ბუნებრივ და დაბალანსებულ ალტერნატივას წარმოადგენს.

„ჰამი ქენდი“:

• მზადდება მაღალი ხარისხის ნედლეულისგან და არ შეიცავს ხელოვნურ საღებავებს, კონსერვანტებსა და არასასურველ დანამატებს;
• მისი საფუძველია ჩვენს საწარმოში წარმოებული ნატურალური ყურძნის კონცენტრატი, რომელიც ყურძნის ბუნებრივ თვისებებს ინარჩუნებს;
• მოსახერხებელი ფორმატის წყალობით იდეალურია ბავშვისთვის სკოლაში, მოგზაურობისას ან ყოველდღიური წახემსებისთვის.

ჩვენი მთავარი კონკურენტული უპირატესობა წარმოების სრულ ციკლზე კონტროლია - ნედლეულის შერჩევიდან საბოლოო პროდუქტამდე.

ჩვენ თავად ვაწარმოებთ ნატურალურ ყურძნის კონცენტრატს, რომელიც „ჰამი ქენდის“ ერთ-ერთი მთავარი საბაზისო ინგრედიენტია.

წარმოების პროცესი მოიცავს:

• ყურძნის შერჩევას;
• ნატურალური კონცენტრატის წარმოებას;
• უნიკალური რეცეპტურის შექმნას;
• ხარისხის მრავალეტაპიან კონტროლს;
• საბოლოო შეფუთვას.

ეს მიდგომა საშუალებას გვაძლევს, მომხმარებელს შევთავაზოთ პროდუქტი, რომლის შექმნის თითოეული ეტაპი ჩვენი პასუხისმგებლობისა და ხარისხის მკაცრი კონტროლის ქვეშ ხორციელდება.

ჩვენთვის პროდუქტის ხარისხი, სურსათის უვნებლობა და წარმოების გამჭვირვალობა მთავარი პრიორიტეტია.

ჩვენი საწარმო ISO 22000-ის საერთაშორისო სტანდარტის შესაბამისად არის სერტიფიცირებული, რაც ადასტურებს სურსათის უვნებლობის მართვის ეფექტურ სისტემას - ნედლეულის მიღებიდან საბოლოო პროდუქტის მომხმარებლამდე მიწოდების ეტაპის ჩათვლით.

გვჯერა, რომ ხარისხი მხოლოდ საბოლოო პროდუქტში არ იქმნება, ის წარმოების თითოეულ ეტაპზე იწყება და სწორედ ამიტომ თითოეულ დეტალს განსაკუთრებულ ყურადღებას ვუთმობთ.

„ჰამი ქენდის“ ლუქსემბურგის ბაზარზე გამოჩენა ჩვენი კომპანიისთვის საერთაშორისო განვითარების გზაზე კიდევ ერთი მნიშვნელოვანი ნაბიჯია.

ჩვენ ვაგრძელებთ ქართული ტრადიციებისა და თანამედროვე მოთხოვნების შერწყმას და ვქმნით პროდუქტებს, რომლებიც ქართულ გემოს, ხარისხსა და ინოვაციას ევროპელ მომხმარებლამდე მიიტანს.

გვჯერა, რომ „ჰამი ქენდი“ პირველი ნაბიჯია და საერთაშორისო ბაზრებზე ქართული წარმოების პოზიციების კიდევ უფრო გაძლიერებას შეუწყობს ხელს“, - აცხადებს ნინო გერზმავა.

შეგახსენებთ, რომ კომპანია „ნუგბარი“ უკვე 9 წელია წარმატებით თანამშრომლობს ისეთ მსხვილ ქსელებთან, როგორიცაა „კარფური“ და მისი პროდუქცია 10-ზე მეტ ქვეყანაში გადის ექსპორტზე. საწარმოს მოდერნიზაცია კომპანიის სტრატეგიული გეგმის ნაწილია, რაც ქართული ნუგბარის მსოფლიო ასპარეზზე პოპულარიზაციას ემსახურება.