„ნაკადური“ არის კომპანია, რომლის საქმიანობა ხის კოტეჯებისა და სახლების მშენებლობას მოიცავს. ბაზარზე არსებულ ტენდენციებზე, სიახლეებსა და სამომავლო გეგმებზე Business Insider Georgia კომპანიის თანადამფუძნებელს, ედიკა ელბაქიძეს ესაუბრა.

„ბაზარზე არსებული ტენდენციის მიხედვით, მოთხოვნა ძირითადად საშუალო და მცირე ზომის სახლებზე ფიქსირდება - დაახლოებით 60–70 კვადრატის ფარგლებში. თუმცა არსებობს გამონაკლისებიც, მათ შორის 100 კვადრატისა და უფრო დიდი ზომის სახლები. ასევე გვაქვს რამდენიმე პოპულარული პროექტის ვერსია, რომლებიც მომხმარებლების მხრიდან განსაკუთრებით მოთხოვნადია და რომელთა დიზაინის მიხედვითაც უკვე რამდენიმე ლოკაციაზე განხორციელდა მსგავსი ტიპის სახლების მშენებლობა.

ვოპერირებთ მთელი ქვეყნის მასშტაბით - მოთხოვნა ყველა რეგიონიდან გვაქვს. ბოლო პერიოდში რამდენიმე პროექტი განვახორციელეთ კახეთში, ასევე მცხეთის მუნიციპალიტეტში. დასავლეთ საქართველოშიც გვაქვს დაგეგმილი პროექტები და ზოგადად, ყველა რეგიონიდან ვიღებთ შეკვეთებს. ამ ეტაპზე მაღალმთიან რეგიონებში - ზემო აჭარასა და სვანეთში პროექტები ჯერ არ განგვიხორციელებია, თუმცა აჭარაში უახლოეს პერიოდში პროექტის დაწყება დაგეგმილია “, - აცხადებს კომპანიის თანადამფუძნებელი.

„ნაკადური“ მშენებლობის პროცესს საშუალოდ 2–3 კვირაში ასრულებს.

„მშენებლობის ვადები დიდწილად დამოკიდებულია პროექტის სირთულესა და კვადრატულობაზე. ძირითადად მოთხოვნა საშუალო ზომის სახლებზეა - დაახლოებით 60, 70 ან 80 კვადრატის ფართობის პროექტებზე. ასეთ შემთხვევაში მშენებლობა, როგორც წესი, დაწყებიდან 2–3 კვირაში სრულდება. მთავარია, ამინდი და სხვა გარემო ფაქტორები არ იყოს ხელისშემშლელი.

როდესაც ჩვენი გუნდი ადგილზე იწყებს მუშაობას, მშენებლობა უწყვეტ რეჟიმში მიმდინარეობს. პარალელურად რამდენიმე პროექტს არ ვახორციელებთ, რის გამოც ერთი ობიექტის დასრულება და შემდგომი პროექტის დაწყება სწრაფად ხდება.

მასალად ძირითადად ვიყენებთ ფიჭვს, რომელიც იმპორტირებულია რუსეთიდან და ბელარუსიიდან. რაც შეეხება ტრანსპორტირებას, ჩვენს მომსახურებაში შედის მასალების დამკვეთის მიწის ნაკვეთზე მიტანა. ადგილზე ხდება დამატებითი დამუშავება და ყველა საჭირო სამუშაოს შესრულება შესაბამისი ხელსაწყოების გამოყენებით, მშენებლობის პროცესის შესაბამისად “, - აღნიშნავს ედიკა ელბაქიძე.

სამომავლოდ კომპანია მომხმარებელს დამატებითი სერვისების შეთავაზებას გეგმავს.

„რაც შეეხება სამომავლო გეგმებს, გვინდა მომხმარებელს სახლის მშენებლობის გარდა დამატებითი სერვისებიც შევთავაზოთ - მათ შორის კანალიზაციის სისტემების ანტისეპტიკური დამუშავება, ავტომატიზებული გადაწყვეტილებები და ეზოს მოწყობის მომსახურება. ასევე გვაქვს დაგეგმილი რამდენიმე სიახლე, რომელთა შესახებ დეტალების გასაჯაროებისგან ამ ეტაპზე თავს შევიკავებ “, - ამბობს კომპანიის თანადამფუძნებელი.

დამატებითი ინფორმაციისთვის დაინტერესებულ პირებს შეუძლიათ ეწვიონ კომპანიის ვებგვერდს.