ბოლო ერთი წლის განმავლობაში ვმუშაობდით ახალი, უფრო პროფესიონალური ეტიკეტის კონცეფციაზე, რომელიც უფრო ახლოს იქნებოდა ღვინის ხასიათთან და ბრენდის იდენტობასთან, - ამის შესახებ Business Insider Georgia-ს მეღვინეობა „ჭალელი“ -ს თანადამფუძნებელმა ჯაბა აბაიშვილმა განუცხადა.

„ბოლო ერთი წლის განმავლობაში ვმუშაობდით ახალი, უფრო პროფესიონალური ეტიკეტის კონცეფციაზე - გვინდოდა ის უფრო ახლოს ყოფილიყო ღვინის ხასიათთან და ბრენდის იდენტობასთან. სწორედ ამ ხედვიდან გამომდინარე, ახლახანს განვაახლეთ დიზაინი და სრულად განვაახლეთ ბრენდინგი.

ეტიკეტზე შინაარსი ძირითადად უცვლელი დარჩა, თუმცა ვიზუალურად უფრო დახვეწილი და სახეცვლილია. განახლდა ლოგოც, ხმლის ფორმა შევცვალეთ, „ჭალის“ თემატიკა შევინარჩუნეთ, თუმცა ფერები და საერთო ვიზუალური სტილი უფრო განსხვავებული და ელეგანტური გახდა.

ამ ეტაპზე ველით, ბაზარის გამოხმაურებას ბრენდის განახლებულ კონცეფციასთან დაკავშირებით.

როგორც მოგეხსენებათ, გვაქვს ოთხი სახეობის ღვინო. მათი განსხვავება შესაძლებელი იქნება ეტიკეტის ფერების მიხედვით, რათა მომხმარებლისთვის პროდუქტი იყოს უფრო ადვილად აღსაქმელი და მარტივად დასამახსოვრებელი “, - აცხადებს ჯაბა აბაიშვილი.

კომპანია აქტიურად გეგმავს სხვადასხვა გამოფენაში მონაწილეობას, ხოლო ძირითადი ფოკუსი პროდუქტის ხარისხზე რჩება.

„ორ გამოფენაში ვიღებთ მონაწილეობას - 8 მაისს, ქართული ღვინის დღეს, რომელსაც ღვინის ეროვნული სააგენტო აორგანიზებს და 9 მაისს, ახალ ღვინის ფესტივალში, რომელიც უკვე ტრადიციული ღონისძიებაა და ყოველწლიურად ვიღებთ მასში მონაწილეობას.

ჩვენი მთავარი აქცენტი კვლავ ხარისხზე რჩება - წარმოების მოცულობის ზრდას არ ვგეგმავთ. ახალი ღვინოების გაყიდვა ახლახანს დავიწყეთ, ახალი ეტიკეტის მოლოდინში ვიყავით. რაოდენობის გაზრდას არ ვგეგმავთ, შესაძლოა რამდენიმე ახალი სახეობა დავამატოთ, თუმცა საერთო მოცულობა უცვლელი დარჩება.

ამასთან, გვაქვს მოლაპარაკებები რამდენიმე ობიექტთან. განსაკუთრებით აქტიური მიმართულებაა ბათუმი, ამ ეტაპზე იქ ფაქტობრივად არ ვართ წარმოდგენილნი, თუმცა ვმუშაობთ, რომ რამდენიმე ახალი ადგილი დავამატოთ და ველოდებით მოლაპარაკებების დასრულებას “, - აცხადებს კომპანიის თანადამფუძნებელი.

ინფორმაციისთვის, კომპანია წლიურად 5 000 ბოთლ ღვინოს აწარმოებს.