ELT Group  საკუთარ ობიექტებზე ჰელიოსისტემების განვითარებით არის დაინტერესებული, - ამის შესახებ განცხადება ELT Group-ის დამფუძნებელმა ელგუჯა თურმანიძემ ეკონომიკური ფორუმის მორიგი დისკუსიის დასრულების შემდეგ განაცხადა, რომელი თემაც ქვეყნის ენერგეტიკული პოლიტიკა იყო. როგორც თურმანიძემ განაცხადა, პროექტის განხორციელებით მიღებული ენერგია შიდა მოხმარების 20-25%-ს დააკმაყოფილებს. 

„ეს ფორმატი ახალი არ არის და ნამდვილად მისასალმებელია. თითქმის ყველა შეხვედრაში დიდი სიამოვნებით ვმონაწილეობ. ცხადია, მსგავსი ფორმატის საქმიანი დისკუსია და ინფორმაციის გაცვლა მხოლოდ პოზიტიური შედეგის მომტანია და დარგისთვის აუცილებელ საჭიროებას წარმოადგენს.

ჩვენ მხარს ვუჭერთ ასეთ ინიციატივებს და მიგვაჩნია, რომ რაც მეტი მსგავსი შეხვედრა გაიმართება, მით უკეთესია. სწორედ ამ დროს ხდება რეალური მსჯელობა პრაქტიკულ საკითხებზე, არსებული პრობლემების გადაჭრის გზებზე, გამოსავალსა და სამომავლო გეგმებზე.

რაც შეეხება ეკონომიკური ფორუმის დღევანდელ ფორმატს, რომელიც ენერგეტიკის სფეროს შეეხებოდა - მოგეხსენებათ, ჩვენი ქვეყანა ათწლეულებია ენერგოდამოუკიდებლობისთვის იბრძვის. ბოლო პერიოდში ამ სფეროსადმი მზარდი ყურადღება კრიტიკულად მნიშვნელოვანია ბიზნესის ყველა დარგისთვის, მათ შორის სამშენებლო-დეველოპერული სექტორისთვისაც. მასშტაბური განაშენიანების ფონზე, ენერგორესურსებზე მოთხოვნა საგრძნობლად იზრდება, რაც შესაბამის განვითარებას საჭიროებს.

გარდა ამისა, თავად ELT Group  დაინტერესებულია საკუთარ ობიექტებზე ჰელიოსისტემების განვითარებით. დაგეგმილი გვაქვს პროექტის განხორციელება დაახლოებით 20 ლოკაციაზე, რაც საკმაოდ დიდ მოცულობას მოიცავს. მიღებული ენერგია ჩვენი შიდა მოხმარების 20-25%-ს დააკმაყოფილებს. შესაბამისად, მივესალმებით მსგავს ინიციატივებს და სიამოვნებით მივიღებთ მონაწილეობას ამ ტიპის ღონისძიებებში“, - განაცხადა ელგუჯა თურმანიძემ.