რამდენიმე წელიწადში ბორჯომს კიდევ ერთი მაღალი კლასის სასტუმრო შეემატება. Hilton Garden Inn-ი საკურორტო ზონაში 3 წლის შემდეგ გაიხსნება და სტუმრების მიღებას დაიწყებს. 

სასტუმროს მშენებლობისათვის ქალაქ ბორჯომში, გორკის ქუჩა N2-ში არსებული 3001.00 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობიდან სახელმწიფო საკუთრებაში არსებული 49%-იანი წილი Bani Group-ში შემავალმა კომპანია „ბანი 2007“-მა ელექტრონულ აუქციონზე 24 აპრილს იყიდა, რაშიც 15 17 500 ლარს გადაიხდის.

სსიპ ,,სახელმწიფო ქონების ეროვნული სააგენტოს“ მიერ გამოცხადებული აუქციონის დაწყებამდე კი აღნიშნული ლოტის ღირებულება 1 512 500 ლარს შეადგენდა. აუქციონის პირობებში კი ობიექტის შესაძლო სამომავლო განვითარების პროფილად: სასტუმრო/ტურისტული ინფრასტრუქტურა იყო მითითებული. 

როგორც კომპანია „ბანი 2007“-ში Business Insider Georgia-ს განუცხადეს არსებულ შენობას რეაბილიტაცია ჩაუტარდება და დემონტაჟს არ დაექვემდებარება. სასტუმრო სულ 138 ნომერზე იქნება გათვლილი. სასტუმრო კომპლექსი ორ შენობას გააერთიანებს, საიდანაც ერთი 2 სართულიანი, ხოლო მეორე ექვს სართულიანი იქნება.

სასტუმროში ორი საკონფერენციო სივრცე განთავსდება ( 52 კვ/მ და 250 კვ/მ ). ასევე იქნება რესტორანი 272 კვ/მ-ზე და ორი ტერასა ბარი (102 კვ/მ  და 807 კვ/მ), დახურული საცურაო აუზი/სპა სავარჯიშო დარბაზი.

რაც შეეხება 138 სასტუმრო ნომრების განაწილების კატეგორიას: Family king- 27; Twin-70; Queen- 6​; Standard king-33; Adapted -2.

როგორც „ბანი 2007“-ში აცხადებენ, სასტუმროს მშენებლობა რამდენიმე თვეში დაიწყება და სავარაუდოდ 3 წელიწადში დასრულდება. ინვესტიციის სავარაუდო ღირებულება კი 15 მლნ ლარის ფარგლებში იქნება.

აღსანიშნავია, რომ პირველი Hilton Garden Inn საქართველოში თბილისში ჭავჭავაძის გამზირზე გაიხსნა.