აზიის ბაზარზე გვაქვს ორი განსხვავებული სურათი იაპონიის და ჩინეთის მიმართულებით, - აცხადებს Galt & Taggart-ის კვლევების დეპარტამენტის ანალიტიკოსი მარიამ ნატროშვილი, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო. მისი თქმით, იაპონიის წამყვანმა ინდექსმა Nikkei 225 გასულ კვირაში რეკორდულ ნიშნულს მიაღწია, რასაც კორპორატიული რეფორმები, ხელოვნურ ინტელექტში გაზრდილი ინვესტიციები და იენის დინამიკა განაპირობებდა.

„იაპონიის წამყვანმა ინდექსმა Nikkei-მ რეკორდულ მაჩვენებელს მიაღწია გასული კვირის განმავლობაში, რამაც საკმაოდ პოზიტიური გამოხმაურება დაიმსახურა. შეიძლება ითქვას, რომ ამით ირანის ომის დანაკარგი ასე თუ ისე გააქარწყლა, მაგრამ ამ დადებით მაჩვენებლებს ზურგს უმაგრებდა კორპორატიული რეფორმები, რომლებიც ახლახან გატარდა იაპონიაში, ასევე ხელოვნური ინტელექტის მიმართულებით განხორციელებული ინვესტიციები და ზოგადად იენის დინამიკაც კი. თუმცა იაპონიაში მაინც მეტ-ნაკლებად არასტაბილური სიტუაციაა, გამომდინარე იქიდან, რომ გასული კვირის განმავლობაში არცთუ ისე მაღალი ზრდის მაჩვენებლები იყო საფონდო ბირჟებზე, რაც ისევ და ისევ ჰორმუზის სრუტის გარშემო გამწვავებული ვითარებით არის გამოწვეული.

რაც შეეხება ჩინეთს, ჩინეთმა საკმაოდ პოზიტიურად დაიწყო პირველი კვარტალი, ვინაიდან მთლიანი შიდა პროდუქტის ზრდა ჰქონდა 5%-იანი. თუმცა, თუ დეტალებში ჩავალთ, აქაც არ არის საკმაოდ სტაბილური სიტუაცია, ვინაიდან მთელი ჩინეთის მასშტაბით საცალო ვაჭრობა საკმაოდ მცირე ნიშნულით - 1.7%-ით არის გაზრდილი, ხოლო უძრავი ქონების მიმართულებით ინვესტიციები 11.2%-ზე არის ჯერჯერობით. ამიტომ აქაც ცვალებადი სიტუაციაა ჰორმუზის სრუტის გარშემო მიმდინარე მოვლენებთან დაკავშირებით და იმ შემთხვევაში, თუ ვითარება დასტაბილურდა და ასევე მოთხოვნა გაიზარდა ჩინეთის ბაზრებზეც, მაშინ შეგვიძლია ვივარადოთ, რომ ნამდვილად გამართლდება ინვესტორების ოპტიმისტური განწყობა აზიის ბაზრების მიმართულებით“, - აღნიშნა მარიამ ნატროშვილმა.