VIP Warehouse-მა თბილისში ახალი, თანამედროვე სასაწყობე კომპლექსი „მეტა ჰაბი“ გახსნა. ამის შესახებ, Business Insider Georgia-ს „მეტა ჰაბის“ პროექტის მენეჯერმა ნიკოლოზ მაზმიშვილმა განუცხადა.

რა სიახლეები დანერგეთ კომპანიის საქმიანობაში ბოლო პერიოდში?

„ლილოს საბაჟო ზონის მიმდებარედ, ახალი „აუთლეტ ვილიჯის“ გვერდით, დაახლოებით 18 ჰექტარი მიწის ფართობი შევიძინეთ. შესყიდვიდან ერთ წელიწადში უკვე დავიწყეთ პროექტის პირველი ფაზის განხორციელება, რომელიც თანამედროვე მშრალი საწყობის მშენებლობას მოიცავდა. ამ პროექტის ფარგლებში გავხსენით ახალი, თანამედროვე სასაწყობე კომპლექსი - „მეტა ჰაბი“.

პროექტის ფარგლებში აშენდა დაახლოებით 15 000 კვადრატული მეტრის ფართობის საწყობი, რომელიც 3 ჰექტარ ტერიტორიაზეა განთავსებული. სრულად მოეწყო შიდა ინფრასტრუქტურა. ამჟამად, მიმდინარეობს ხიდის მშენებლობა, რადგან ტერიტორიაზე სამელიორაციო არხი გადის და ჩვენი მიზანია, მეიჯარეებს მაქსიმალურად კომფორტული გარემო შევუქმნათ.

პროექტი დეკემბერში ჩაბარდა და ექსპლუატაციაში შევიდა. დღეს კომპლექსი სრულად დასრულებულია. უკვე გაქირავებულია დაახლოებით 2 000 კვადრატული მეტრი ფართობი და გვყავს მოქმედი მეიჯარეები, რომელთა ნაწილი საქმიანობის გაფართოებასაც გეგმავს. პარალელურად, აქტიური მოლაპარაკებები მიმდინარეობს მსხვილ კომპანიებთან, რომლებიც კომპლექსის სრულად იჯარით აღებით არიან დაინტერესებული, თუმცა გადაწყვეტილების მიღების პროცესი გარკვეულ დროს მოითხოვს.

სასაწყობე ფართობებზე მოთხოვნა საკმაოდ მაღალია. რეკლამირების დაწყებიდან სულ რამდენიმე თვე გავიდა და დაინტერესება ყოველდღიურად იზრდება. უამრავი კომპანია გვიკავშირდება. ბაზრის მოთხოვნა ნათლად აჩვენებს, რომ თანამედროვე სასაწყობე ინფრასტრუქტურაზე მოთხოვნა საქართველოში საკმაოდ მზარდია.

როგორ აფასებთ საქართველოში სასაწყობე ინფრასტრუქტურის განვითარების ტემპს?

როდესაც 2024 წლის სექტემბერში მშენებლობა დავიწყეთ, ჩვენს გარშემო მსგავსი ტიპის ახალი სასაწყობე ობიექტები პრაქტიკულად არ არსებობდა. დღეს მოცემულობა მნიშვნელოვნად არის შეცვლილი. არაერთი ახალი პროექტი განხორციელდა, რაც სექტორის აქტიურ განვითარებაზე მიუთითებს.

რა მიზნები გაქვთ წლის ბოლომდე და რას უნდა ელოდოს ბაზარი VIP Warehouse-ისგან? (გეგმავთ თუ არა სერვისების გაფართოებას ან ახალი პროდუქტების დამატებას?)

კომპანიის საკუთრებაში არსებული მიწის ფართობი გვაძლევს შესაძლებლობას, მომავალში პროექტის განვითარების ახალი ეტაპები დავიწყოთ. მიმდინარე ობიექტის სრულად გაქირავების შემდეგ განვიხილავთ დამატებითი ინფრასტრუქტურის შექმნას, მათ შორის უფრო მაღალჭერიანი, ბაქნიანი საწყობების, სამაცივრე და საბაჟო ტიპის სასაწყობე სივრცეების განვითარებას.

ბაზარზე მოთხოვნა მრავალფეროვანია და ჩვენი მიზანია, მომხმარებლებს განსხვავებულ საჭიროებებზე მორგებული გადაწყვეტილებები შევთავაზოთ. ამ ეტაპზე ახალი ფაზის დაწყებას არსებული ფართების სრულად ათვისების შემდეგ ვგეგმავთ, თუმცა გრძელვადიანი ხედვა უცვლელია - სრულად ავითვისოთ არსებული ტერიტორია და VIP Warehouse ვაქციოთ ერთ-ერთ წამყვან ლოჯისტიკურ და სასაწყობე ჰაბად როგორც თბილისში, ისე მთლიანად საქართველოში.