ქართული ტკბილეულის მწარმოებელი კომპანია „ჩირიფრუტი“, რომელიც ბაზარზე 2014 წლიდან ოპერირებს, ახალი საწარმოს ამოქმედების შემდეგ წარმოების განვითარებასა და ასორტიმენტის გაფართოებაზე მუშაობს. კომპანიის საქმიანობაში განხორციელებულ ცვლილებებზე, დაგეგმილ სიახლეებსა და განვითარების სამომავლო მიმართულებებზე Business Insider Georgia-ს „ჩირიფრუტის“ წარმომადგენელი მარიამ ჯიქია ესაუბრა.

რა ცვლილებები მოხდა „ჩირიფრუტის“ საქმიანობაში ბოლო პერიოდის განმავლობაში და როგორ აისახა ახალი საწარმოს ამოქმედება წარმოების შესაძლებლობებზე?

ბოლო პერიოდში ჩვენი მთავარი ცვლილება წარმოების განვითარებასა და სამუშაო პროცესების მოწესრიგებას უკავშირდება. ახალი საწარმოს ამოქმედება გვაძლევს საშუალებას, უფრო ორგანიზებულ გარემოში ვაწარმოოთ პროდუქცია და ეტაპობრივად გავზარდოთ წარმოების მოცულობა. ეს მნიშვნელოვანია როგორც არსებული ასორტიმენტის გასაძლიერებლად, ისე ახალი პროდუქტების დასამატებლად. ჩვენთვის პრიორიტეტია, ზრდასთან ერთად შევინარჩუნოთ ხარისხი და პროდუქტის მიმართ მომხმარებლის ნდობა

რა ეტაპზეა კომპანია საექსპორტო მიმართულებით და რომელ ბაზრებზე ხედავთ ამ ეტაპზე ყველაზე დიდ შესაძლებლობას?

საექსპორტო მიმართულებით მუშაობა მოსამზადებელ ეტაპზეა. ჩვენთვის მნიშვნელოვანია, ექსპორტზე გასვლა სწორად დავგეგმოთ - პროდუქტის, შეფუთვის, ფასისა და მიწოდების პირობების გათვალისწინებით

რა არის „ჩირიფრუტის“ მთავარი პრიორიტეტები მომდევნო პერიოდისთვის - იგეგმება თუ არა ახალი პროდუქტების, გაყიდვის არხების ან წარმოების მიმართულებების დამატება?

მომდევნო პერიოდში ჩვენი მთავარი პრიორიტეტებია წარმოების განვითარება, ახალი პროდუქტების შექმნა და გაყიდვის არხების გაფართოება. ვეძებთ გზებს, რომ „ჩირიფრუტის“ პროდუქცია უფრო მეტ მომხმარებელს შევთავაზოთ - როგორც საცალო გაყიდვებში, ისე სასტუმროების, კაფეებისა და კორპორაციული შეკვეთების მიმართულებით. ასევე გვინდა განვავითაროთ სასაჩუქრე შეთავაზებები და ტურისტებზე მორგებული პროდუქცია.

ინფორმაციისთვის, „ჩირიფრუტი“ აერთიანებს 80-მდე სახეობის ტკბილეულს, რომელიც მზადდება ეკოლოგიურად სუფთა გარემოში, დანამატებისა და კონსერვანტების გარეშე.