2026 წლის ზაფხულის სეზონი „ჭრებალოს მარნისთვის“ გასულ წელთან შედარებით გაზრდილი სტუმრების რაოდენობითა და რეგიონში ტურისტული ნაკადის გააქტიურებით გამოირჩეოდა.

ვიზიტორების დინამიკისა და სამომავლო განვითარების გეგმების შესახებ Business Insider Georgia-ს „ჭრებალოს მარნის“ დამფუძნებელი სალომე ლეკიშვილი ესაუბრა.

როგორ შეაფასებდით 2026 წლის ზაფხულის სეზონს „ჭრებალოს მარნისთვის“ და რა იყო მთავარი ცვლილება გასულ წელთან შედარებით?

გასულ წელს ვთვლიდით, რომ სტუმრების რაოდენობის თვალსაზრისით საუკეთესო სეზონი გვქონდა, თუმცა წელს ეს მაჩვენებელი კიდევ უფრო გაიზარდა. უნდა აღინიშნოს, რომ რაჭაში სტუმრების ნაკადი მნიშვნელოვნად არის გაზრდილი.

წლევანდელი ზაფხული ამინდის მხრივ საკმაოდ წვიმიანი იყო და თავიდან გვქონდა მოლოდინი, რომ ცუდი ამინდი ვიზიტორების რაოდენობაზე უარყოფითად აისახებოდა, რეალურად ასე არ მოხდა. განსაკუთრებით ივლისის მეორე ნახევრიდან სტუმრების ნაკადი მნიშვნელოვნად გაიზარდა.

ამასთან, რაჭაში ჩამოსვლა უფრო მარტივი გახდა. ახალი, უფრო მოკლე გზის გახსნამ მგზავრობის დრო შეამცირა და რეგიონში ჩამოსვლა სტუმრებისთვის მნიშვნელოვნად გაამარტივა, რაც ვიზიტორების რაოდენობაზეც აისახა.

როგორია „ჭრებალოს მარნის“ ვიზიტორების განაწილება - რა წილი მოდის ადგილობრივ და უცხოელ სტუმრებზე და რომელი ქვეყნებიდან ჩამოდიან ძირითადად?

ჩვენს სტუმრებს შორის, როგორც წესი, ადგილობრივი ვიზიტორები ჭარბობენ და მათი წილი დაახლოებით 70%-ია. დარჩენილი 30% სხვადასხვა ქვეყნის ვიზიტორებზე მოდის.

გასული წლის მსგავსად, უცხოელ სტუმრებს შორის ძირითადად ევროპის ქვეყნების წარმომადგენლები იყვნენ. ძალიან დიდი ჯგუფები არ გვყოლია, თუმცა, მაგალითად, იტალიიდან რამდენიმე ექვსკაციან ჯგუფს ვუმასპინძლეთ. უცხოელი ვიზიტორების პროცენტული წილი დაახლოებით იგივეა, რაც გასულ წელს, თუმცა მთლიანობაში სტუმრების რაოდენობა გაიზარდა.

როგორ აისახა გაზრდილი სტუმრების ნაკადი „ჭრებალოს მარნის“ საქმიანობაზე და შეიცვალა თუ არა სეზონზე გუნდის რაოდენობა?

სტუმრების ნაკადის ზრდიდან გამომდინარე, ზაფხულის სეზონზე თანამშრომლების რაოდენობაც გავზარდეთ. ზოგადად, რაჭა ნელ-ნელა ვითარდება და სულ უფრო მიმზიდველი ხდება არა მხოლოდ ქართველი, არამედ უცხოელი ვიზიტორებისთვისაც, რაც, ბუნებრივია, ჩვენს საქმიანობაზეც აისახება.

რა გეგმები გაქვთ „ჭრებალოს მარნის“ განვითარების მიმართულებით და რა სიახლეებს უნდა ელოდონ სტუმრები მომდევნო სეზონზე?

ჩვენ, როგორც შარშან, წელსაც სასტუმროს მიმართულებით განვითარების იგივე გეგმა გვაქვს. უკვე მომდევნო ზაფხულის სეზონისთვის ვემზადებით და გვინდა, რომ სასტუმრო გავხსნათ. ეს ამ ეტაპზე ჩვენი მთავარი გეგმაა.

მიმდინარე სეზონის შედეგებით ძალიან კმაყოფილები ვართ და ვფიქრობთ, რომ ეს ზრდის ტენდენცია მომავალშიც გაგრძელდება.