ჩვენ წარმატებით გავიარეთ საქართველოს, უზბეკეთისა და ყაზახეთის სერტიფიცირების პროცესები - ამის შესახებ, „ბიოქიმფარმის“ გენერალურმა მენეჯერმა, რატი ღოლიჯაშვილმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„ბოლო ოთხი თვის განმავლობაში ჩვენ გავიარეთ საქართველოს GMP სერტიფიცირება ხელმეორედ. პირველად 2023 წლის 15 სექტემბერს გავიარეთ, ზუსტად მახსოვს ეს დღე. მეორედ გავიარეთ და ინსპექტორატი მივიღეთ ჯანდაცვის სამინისტროს ქვეშ არსებული მარეგულირებელი სააგენტოსგან და წარმატებით გავიარეთ რესერტიფიცირება.

ასევე გავიარეთ უზბეკეთის GMP სერტიფიცირება. ერთი კვირის წინ მოგვივიდა ამის დამადასტურებელი სერტიფიკატი. ორი თვის წინ გავიარეთ ასევე ყაზახეთის ფარმაკოზედამხედველობის სერტიფიცირების პროცესი, ინსპექტირება, რომელიც ასევე წარმატებით დავასრულეთ. მომავალში კიდევ რამდენიმე ასეთი პროცესი გველოდება.

ეს მუდმივად ხდება. დაახლოებით რომ წარმოიდგინოთ, სამ წელიწადში ერთხელ აუცილებელია ამ სერტიფიცირების გავლა თითქმის ყველა ქვეყანაში, საექსპორტო ქვეყნებში და არამხოლოდ ლოკალურადაც.

ამის მნიშვნელობას კიდევ ერთხელ გავუსვამ ხაზს, იმიტომ რომ ჩვენი კომპანია, მართალია, ინტერნაციონალიზაციისა და ზრდის პროცესში განვითარებადი კომპანიაა, შეიძლება ითქვას, და დიდი იმედი მაქვს, რომ ერთ დღესაც საერთაშორისო, მულტინაციონალურ კორპორაციად ჩამოყალიბდება, მიუხედავად იმისა, რომ რვა ქვეყანაში გვაქვს ექსპორტი, მაინც საშუალოდან გარდამავალ კომპანიად ითვლება.

ჩვენი ნებისმიერი პროდუქტი იწარმოება ნულიდან, ანუ წარმოების მთლიანი სასიცოცხლო ციკლი ნულიდან ლაბორატორიიდან თარომდე ხდება გოთუას ქუჩაზე, თბილისში, საქართველოში. ყველა კომპონენტი, წარმოების ყველა პროცესი და ყველა ფაზა საქართველოში ხორციელდება. სტერილური წამლის თხევადი ფორმების GMP სერტიფიცირება კი, განსაკუთრებით საერთაშორისო ქვეყნებში, რეპუტაციულად ძალიან მნიშვნელოვანია“, - აცხადებს რატი ღოლიჯაშვილი.