„სემელე" ლიქიორის მწარმოებელი ქართული ბრენდია, რომელიც ბაზარზე 2023 წლიდან ოპერირებს. კომპანიის თანადამფუძნებელი ელი უზუნაშვილი Business Insider Georgia-თან საუბარში აღნიშნავს, რომ „სემელეს“ მიზანი არამხოლოდ მაღალი ხარისხის პროდუქტის შექმნა, არამედ საქართველოში ლიქიორის წარმოების კულტურის დამკვიდრება და ამ მიმართულების განვითარებაა. 

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

ლიქიორის წარმოება 2023 წელს დავიწყეთ, თუმცა იდეა ბევრად ადრე გაჩნდა.  ჩვენი ოჯახი მრავალი წელია მეღვინეობის ტრადიციას მიჰყვება. ყოველთვის გვინდოდა, რომ ამ გამოცდილებაზე დაყრდნობით ახალი და განსხვავებული პროდუქტი შეგვექმნა, შთაგონება კი წლების წინ ბებიის მიერ დამზადებული ვარდის ლიქიორი გახდა.

დღეს კომპანია მომხმარებელს სთავაზობს ნატურალური ინგრედიენტებით დამზადებულ, უნიკალური გემოს მქონე ლიქიორს, რომელიც აერთიანებს ტრადიციას, ხარისხს და თანამედროვე ტექნოლოგიას.

ჩვენი მიზანია, არა მხოლოდ მაღალი ხარისხის პროდუქტის შექმნა, არამედ საქართველოში ლიქიორის წარმოების კულტურის დამკვიდრება და ამ მიმართულების განვითარება. 

როგორ აფასებთ მოთხოვნას ზოგადი თვალსაზრისით?

მოთხოვნა ლიქიორის კატეგორიაზე საქართველოში ჯერ კიდევ მცირეა. ტრადიციულად, ბაზარი უფრო მეღვინეობის ირგვლივ არის კონცენტრირებული, თუმცა  მომხმარებლის ინტერესები სწრაფად იცვლება.

როდესაც „სემელეს“ წარმოება დავიწყეთ  ზუსტად არ ვიცოდით, როგორ უკუკავშირს მივიღებდით, თუმცა რაც დრო გადის, უფრო მკაფიოდ ვხედავთ, რომ მომხმარებლები ინტერესით ხვდებიან სიახლეს. ეს ჩვენთვის ნიშნავს ერთს – მოთხოვნა არსებობს და თანდათან იზრდება. 

რას მიიჩნევთ კომპანიის კონკურენტულ უპირატესობად?

„სემელეს“ მთავარი კონკურენტული უპირატესობა არის მისი ხარისხი,  განსხვავებული ტექნოლოგიური მიდგომა და გემოვნური მახასიათებლები.  

საქართველოში ამ ტიპის სასმელის წარმოების ტრადიცია არ არის ფართოდ გავრცელებული, ამიტომ „სემელე“  არამხოლოდ ავსებს არსებულ ნიშას, არამედ ხელს უწყობს არჩევანის მრავალფეროვნებას და ახალი კატეგორიის დამკვიდრებას.

როგორია კომპანიის სამომავლო გეგმები?

ჩვენთვის „სემელე“ არ არის ერთჯერადი პროექტი – ეს არის გზის დასაწყისი. მომავალში გვინდა, რომ ჩვენს ლიქიორს კიდევ უფრო მეტი არომატი და ისტორია შევძინოთ, გავზარდოთ როგორც  წარმოება, ისე მომხმარებლების რაოდენობა, როგორც ქვეყნის შიგნით ისე მის ფარგლებს გარეთ.