ARTE ბრენდირებული უნიფორმებისა და პრომო აქსესუარების მწარმოებელი კომპანიაა. კომპანიაში არსებულ სიახლეებსა და სამომავლო გეგმებზე Business Insider Georgia კომპანიის დამფუძნებელს ნინო გიგინეიშვილს ესაუბრა.

„ოქტომბერში მივდივართ საკმაოდ მასშტაბურ გამოფენაზე, რომელიც მოგვცემს საშუალებას ბაზარს შევთავაზოთ ისეთი განსხვავებული პროდუქტი, რომელიც აქამდე არ არსებობდა, და გავხდეთ ამ მიმართულების იმპორტიორები საქართველოში. ეს გამოფენა ჩვენთვის სტრატეგიულად ძალიან მნიშვნელოვანია განვითარების თვალსაზრისით “, - ამბობს კომპანიის დამფუძნებელი.

კომპანიამ გაციფრულების მიმართულებით აქტიური სამუშაო პროცესები განახორციელა და დანერგა ე.წ CRM სისტემები.

„გაციფრულების მიმართულებით ჩვენ უკვე დავნერგეთ CRM სისტემები. სისტემა ჯერ სრულად გამართული არ არის, თუმცა აქტიურად ვტესტავთ და ვმუშაობთ. პროგრამა გვაძლევს შესაძლებლობას, მომხმარებელთან კომუნიკაცია სწორედ ამ პლატფორმის მეშვეობით განვახორციელოთ და დროულად მივაწოდოთ მათ ინფორმაცია შეკვეთებთან დაკავშირებით. ეს ხელს გვიწყობს, რომ უფრო ოპერატიულად ვაკონტროლოთ ლიდების მართვა და დროის მენეჯმენტი “, - აცხადებს ნინო გიგინეიშვილი.

„არტე“ აქტიურად თანამშრომლობს სხვადასხვა კომპანიებთან, რომელთა რიცხვი ყოველთვიურად იზრდება.

„ჩვენ, აქტიურად ვთანამშრომლობთ კომპანიებთან და ყოველთვიურად უფრო მეტი მსხვილი ორგანიზაცია ხდება ჩვენი დამკვეთი. ჩვენი მთავარი მიზანია საქართველოს ბაზრის სრული ათვისება. კონცენტრირებული ვართ პროდუქტის შექმნაზე, რაც საბოლოოდ რეკომენდატორთა რაოდენობის ზრდას უწყობს ხელს და ამასთან ერთად უკვე საკმაოდ მსხვილი დამკვეთებიც გვემატება, რითაც ძალიან ვამაყობთ. გარდა ამისა, უნდა აღინიშნოს, რომ კომპანია გადადის განვითარების მეორე ეტაპზე. პერიოდულად გვაქვს განახლებები, მათ შორის თანამშრომელთა რაოდენობის ზრდის მიმართულებით. ამ ეტაპზე ვამატებთ თანამშრომლებს, ეს პროცესი ოქტომბრის ბოლომდე დასრულდება: ფართოვდება მარკეტინგის გუნდი, გაყიდვების მიმართულებას ემატება ახალი თანამშრომელი, სამკერვალო კი მინიმუმ ხუთი მკერავით გაძლიერდება.

დანადგარების მხრივ პრიორიტეტი გვაქვს, რომ გავხდეთ პრომო მასალების იმპორტიორი კომპანია. ქსოვილების იმპორტიორი კომპანია უკვე ვართ. ასევე ვგეგმავთ ასორტიმენტის კიდევ უფრო გაფართოებას.

აქტიურად ვმონაწილეობთ სხვადასხვა კამპანიებში. კომპანიაში ვითარდება HR-ისა და შესყიდვების მიმართულებებიც, რაც PAS Georgia-ს ფარგლებში ხორციელდება, სადაც ჩვენ გამარჯვება მოვიპოვეთ და მივდივართ საკმაოდ დიდი ზრდისკენ.

ცნობისთვის, ”არტე”-ს საკმაოდ ბევრი მასშტაბური პროექტი აქვს განხორციელებული. ბაზარზე გამოირჩევა მომხმარებელზე მორგებული ტარიფებით და მაღალი პასუხისმგებლობით. პროდუქცია იწარმოება საქართველოში.