Turkish Airlines-თან განახლებული თანამშრომლობის ფარგლებში, საერთაშორისო წერილობითი კორესპონდენცია და კლასიკური საფოსტო გზავნილები უკვე საქართველოს ფოსტის საკუთარი საჰაერო ტერმინალიდან იგზავნება. ახალი საოპერაციო მოდელის ამოქმედებით მნიშვნელოვნად შემცირდა საერთაშორისო გზავნილების დამუშავებისა და ტრანზიტის ვადები, რაც მომხმარებლისთვის კიდევ უფრო სწრაფ და ეფექტურ საერთაშორისო საფოსტო მომსახურებას უზრუნველყოფს.

„საქართველოს ფოსტისთვის საერთაშორისო ლოგისტიკური შესაძლებლობების განვითარება ერთ-ერთი მთავარი პრიორიტეტია. Turkish Airlines-თან თანამშრომლობის ახალი ეტაპი გვაძლევს შესაძლებლობას, საერთაშორისო წერილობითი კორესპონდენცია და კლასიკური საფოსტო გზავნილები საკუთარი საჰაერო ტერმინალიდან გავაგზავნოთ, რაც მნიშვნელოვნად ამცირებს ტრანზიტის ვადებს და კიდევ უფრო აუმჯობესებს მომსახურების ხარისხს. ჩვენი მიზანია, მომხმარებლებს სწრაფი, საიმედო და თანამედროვე საერთაშორისო საფოსტო სერვისი შევთავაზოთ,“ - განაცხადა საქართველოს ფოსტის გენერალურმა დირექტორმა, გიორგი ერაძემ.

საქართველოს ფოსტის საჰაერო ტერმინალიდან საერთაშორისო საფოსტო გზავნილების გატანა კომპანიას საშუალებას აძლევს, უფრო ეფექტურად მართოს საერთაშორისო საფოსტო ნაკადები, გააძლიეროს ოპერაციული კონტროლი და კიდევ უფრო გააუმჯობესოს თანამშრომლობა საერთაშორისო ავიაპარტნიორებთან.

აღნიშნული სიახლე საქართველოს ფოსტის საერთაშორისო ლოგისტიკური შესაძლებლობების განვითარების კიდევ ერთი მნიშვნელოვანი ეტაპია, რომელიც მიზნად ისახავს მომხმარებლებისთვის თანამედროვე, სწრაფი, საიმედო და მაღალი ხარისხის საფოსტო მომსახურების უზრუნველყოფას.