ICT ერთ-ერთი ყველაზე სწრაფად მზარდი სექტორია, - აცხადებს ტექნოლოგიების ასოციაციის თავმჯდომარე თორნიკე სულაბერიძე, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო. როგორც თორნიკე სულაბერიძე განმარტავს, საქართველოში ტექნოლოგიური სექტორი ერთ-ერთი ყველაზე სწრაფად მზარდი მიმართულებაა, თუმცა ინდუსტრიის განვითარებისთვის მხოლოდ ICT სფეროზე ფოკუსირება საკმარისი აღარ არის. მისი თქმით, ასოციაცია განვითარების ახალ ეტაპზე გადავიდა და გეგმავს, საქმიანობა ტექნოლოგიური ეკოსისტემის უფრო ფართო მიმართულებებზე გააფართოოს, მათ შორის საერთაშორისო ბაზრებზე მომუშავე კომპანიების მიღმაც.

„ICT, როგორც სექტორი, ერთ-ერთი ყველაზე სწრაფად მზარდია. თუმცა, ICTA - წინა ასოციაცია, რომლითაც ვიყავით ცნობილი, გარკვეულწილად მხოლოდ იმ საერთაშორისო ტექნოლოგიურ კომპანიებზე იყო ფოკუსირებული, რომლებიც სხვადასხვა ბაზარზე აუთსორსინგულ მომსახურებას ახორციელებდნენ. ჩვენ ვხედავდით და ვაცნობიერებდით იმის აუცილებლობას, რომ მხოლოდ ICT მიმართულებით არ უნდა ვყოფილიყავით შემოფარგლული, რადგან ტექნოლოგიური ეკოსისტემა ბევრად უფრო ფართო და მასშტაბურია.

სწორედ ამიტომ გადავწყვიტეთ განვითარება და ეს მხოლოდ სახელის ცვლილება არ არის. ეს ასოციაციის რეალური, შინაარსობრივი ტრანსფორმაციაა. დღეს ამ გაერთიანებას „ტექნოლოგიების ასოციაცია“ ეწოდება, რაც თავის მხრივ გულისხმობს იმას, რომ ჩვენთან არა მხოლოდ ICT კომპანიები, არამედ ფინტექ კომპანიები, ციფრული ბანკები, ეგრეთ წოდებული ვასპები (VASPs - ვირტუალური აქტივების მომსახურების პროვაიდერები) და ტექნოლოგიური განათლების მიმწოდებელი ორგანიზაციებიც გაერთიანდებიან.

გვჯერა, რომ ამ ერთობლიობით ჩვენ ვიქნებით ის ძალა და ხმა, რომელიც ხელს შეუწყობს საქართველოში ტექნოლოგიური ეკოსისტემის განვითარებას“, - აღნიშნა თორნიკე სულაბერიძემ.

ტექნოლოგიების ასოციაციის თავმჯდომარis თქმით, ტექნოლოგიურ სექტორში მოქმედი კომპანიების ინტერესების ერთიან პლატფორმაზე გაერთიანება და მათ შორის თანამშრომლობის გაძლიერება ტექნოლოგიების ასოციაციის ერთ-ერთი მთავარი მიზანია.

„გადაწყვეტილება თავად კომპანიებისა და იმ მხარეების გამოხმაურებიდან გამომდინარე იქნა მიღებული, რომლებთანაც ჩვენ ვურთიერთობთ. აქამდე ეს პროცესი დაქსაქსულად მიმდინარეობდა - სხვადასხვა ასოციაციას ტექნოლოგიების შიგნით საკუთარი, კონკრეტული სეგმენტები ჰქონდა გამოყოფილი და ისინი ერთიანად არ ოპერირებდნენ.

დღეს ჩვენი მიზანი არის, რომ გავაჟღეროთ ფუნდამენტური ინტერესები ტექნოლოგიურ სფეროში არსებული და ოპერირებული კომპანიებისა, იმიტომ რომ ჩვენ გვჯერა, რომ ერთიანად ბევრად უფრო უკეთეს გარემოს შევქმნით. და ეს ეხება არა მხოლოდ ვთქვათ ასოციაციასა და სამთავრობო უწყებებთან ურთიერთობას, არამედ ასოციაციის წევრ კომპანიებს შორისაც. იმიტომ რომ ბევრად უფრო მეტი ინტერესი არის, როდესაც როგორც ვთქვათ ტექნოლოგიური კომპანია, ICT მიმართულებით ვთქვათ პროგრამული უზრუნველყოფის კომპანია, აქეთ ფინტექ კომპანია, იქ ვასპები და ასე შემდეგ, ანუ ის პლატფორმა შეიქმნება, რაც თვითონ შიგნითვე ასოციაციის წევრებისთვისაც იქნება საინტერესო, რომ განავითარონ თანამშრომლობები და პარტნიორობები ერთმანეთში და არა მხოლოდ ვთქვათ გარე კომუნიკაციაზე იყოს. რა თქმა უნდა, ესეც საკმაოდ დიდი კომპონენტია, თუმცა ამ ასოციაციის მთელი ასე ვთქვათ მნიშვნელობა არის ის, რომ ხელს შეუწყობს შიგნით წევრების განვითარებას“, - მიიჩნევს თორნიკე სულაბერიძე.