საცხობი „ლაგაზი ბეიქერი“ დაახლოებით წელიწად-ნახევრის წინ გაიხსნა და მომხმარებლებს ქართული ხორბლის ფქვილისგან დამზადებულ პურს სთავაზობს. კომპანიაში არსებულ სიახლეებსა და სამომავლო გეგმებზე Business Insider Georgia „ლაგაზი ბეიქერის“ თანადამფუძნებელს, ნათია მაჭარაშვილს ესაუბრა.

„ჩვენი საქმიანობა ჩვეულ, აქტიურ რეჟიმში მიმდინარეობს და ამ ეტაპზე მოსავლის აღებას ველოდებით. პროცესები დიდწილად ამინდებზე და იმაზეა დამოკიდებული, თუ როდის დაიწყება მკა. ამ დროისთვის დათესილი გვაქვს 8 სხვადასხვა ჯიშის ხორბალი, რომლებსაც სექტემბრიდან ჩვენს საცხობში გამოვიყენებთ.

მნიშვნელოვანია, რომ ბევრი მათგანი მივიწყებული ქართული ხორბლის ჯიშია და მათი პური ჩვენთვისაც ახალი გამოცდილება იქნება, ამიტომ ძალიან საინტერესო პერიოდი გველოდება. სავარაუდოდ, მკა ივლისის დასაწყისში დაიწყება - მოსავალს დავაბინავებთ და ამის შემდეგ, სექტემბრიდან, ჩვენს საცხობში ამ ხორბლისგან მიღებული ფქვილით პურის გამოცხობას დავიწყებთ.

ამ ეტაპზე სრულად მოსავლის მოლოდინსა და ამ პროცესისთვის მზადებაზე ვართ ორიენტირებული“, - აცხადებს ნათია მაჭარაშვილი.

„ლაგაზი ბეიქერის“ პროდუქციაზე მოთხოვნა სტაბილურად მზარდია.

„ჩვენი საცხობი დაახლოებით წელიწად-ნახევრის წინ გაიხსნა და თუ თავდაპირველად ხშირად გვხვდებოდნენ მომხმარებლები, რომლებმაც არ იცოდნენ რომელი პური ან ხორბლის ჯიში აერჩიათ, დღეს უკვე სრულიად განსხვავებული რეალობაა - ადამიანებს საკმაოდ დიდი ინფორმაცია აქვთ, ინტერესდებიან სხვადასხვა ჯიშით და ჯანსაღი კვების მიმართ ინტერესიც დღითიდღე იზრდება.

განსაკუთრებული ყურადღება ექცევა ბუნებრივ საფუარსაც, რაც ჩვენთვის ძალიან მნიშვნელოვანი მიმართულებაა. ჩვენ ხორბალი ორგანული მეთოდებით მოგვყავს და ბუნებრივი საფუარი ამ პროცესის ერთგვარი დამაგვირგვინებელი ნაწილია, რადგან სწორედ ის ეხმარება ხორბალს სასარგებლო თვისებებისა და მინერალების შენარჩუნებაში. ამიტომ მომხმარებლები ხშირად ინტერესდებიან არა მხოლოდ პურით, არამედ თავად ბუნებრივი საფუარითაც.

სასიამოვნოა ისიც, რომ ჩვენი მომხმარებლების ნაწილი შორეული უბნებიდანაც კი მოდის პურის საყიდლად. ხშირად გვეუბნებიან, რომ ჩვენი პური თითქმის ერთი კვირა ჰყოფნით, რადგან ბუნებრივ საფუარზე გამომცხვარ პურს ხანგრძლივად შენახვის უნარი აქვს და დროთა განმავლობაში გემოც უფრო მეტად უმჯობესდება.

საცხობში ყოველდღიურად დაახლოებით 6-7 სახეობის პური ცხვება. სხვადასხვა პურისთვის განსხვავებულ ფერმენტაციის მეთოდებს ვიყენებთ. მათ შორის, 17 საათიან და 48 საათიან ფერმენტაციას. სწორედ ფერმენტაციის ხანგრძლივობა განსაზღვრავს როგორც პურის ხარისხს, ისე მის არომატსა და გემოვნურ მახასიათებლებს.

ჩვენმა მომხმარებლებმა უკვე კარგად იციან, რომელი ტიპის პური მოსწონთ ყველაზე მეტად და ხშირად კონკრეტულად იმ პურის საყიდლად მოდიან, რომელიც მათთვის გამორჩეულია გემოთი და ტექსტურით.

სწორედ ამიტომ, მას შემდეგ რაც საქმიანობა დავიწყეთ, ინტერესი ჩვენი პროდუქციისა და ზოგადად ჯანსაღი, ბუნებრივი პურის მიმართ საგრძნობლად გაიზარდა“, - ამბობს კომპანიის თანადამფუძნებელი.

კომპანია სამომავლოდ ასორტიმენტის გაფართოებას გეგმავს.

„მოგეხსენებათ, საქმიანობაში მე და ჩემი მეუღლე ერთად ვართ ჩართული. შოთა უფრო სამეურნეო მიმართულებაზე მუშაობს - მიწის დამუშავებაზე, ხორბლის მოყვანასა და გამრავლებაზე, ხოლო მე ძირითადად ცხობის პროცესს ვხელმძღვანელობ. თუმცა, რეალურად, ორივე ყველა ეტაპზე ერთმანეთის გვერდით ვდგავართ და ერთმანეთს ვეხმარებით.

თავიდანვე ჩვენი მთავარი მიზანი მივიწყებული ქართული ხორბლის ჯიშებისა და სახეობების გამრავლება იყო. მუშაობა „მახათი“ და „ზანდურით“ დავიწყეთ და ეტაპობრივად შევძელით, რომ დღეს უკვე ხუთი ქართული ენდემური სახეობა გვქონდეს დათესილი.

დიდი მოლოდინი გვაქვს, რომ წელს კარგი მოსავალი იქნება და ამ უნიკალურ ხორბალს ჩვენს მომხმარებლებსა და ამ მიმართულებით დაინტერესებულ ადამიანებსაც გავუზიარებთ. რეალურად, ეს ჯიშები თითქმის მივიწყებული იყო, მათ პრაქტიკულად აღარ იყენებდნენ არც პურის ცხობისთვის და არც სხვა დანიშნულებით. ჩვენ კი გვინდა, ადამიანებმა უკეთ გაიგონ ამ ხორბლების რეალური ღირებულება, მათი უნიკალური გემო და სასარგებლო თვისებები.

სამომავლოდ ახალი პურის ასორტიმენტის დამატებასაც ვგეგმავთ, თუმცა ეს პროცესი სწრაფად ვერ განვითარდება, რადგან ენდემური ჯიშების გამრავლებას წლები სჭირდება. მათი მოყვანა რთულია, რადგან მოსავლიანობა შედარებით დაბალია, თუმცა ამ ხორბლის კვებითი ღირებულება, ვიტამინებისა და მინერალების შემცველობა, ასევე გემოვნური თვისებები, სხვა ხორბლის ჯიშებს მნიშვნელოვნად აღემატება.

ამასთან, თითოეულ ჯიშს ცხობის საკუთარი ხასიათი და სპეციფიკა აქვს, ამიტომ გარკვეული დრო დაგვჭირდება, რომ ეს პურები კარგად დავამუშაოთ, შევქმნათ შესაბამისი რეცეპტები და შემდეგ უკვე როგორც ფქვილის, ისე პურის სახით შევთავაზოთ ჩვენს მომხმარებლებს “, - განმარტავს ნათია მაჭარაშვილი.

ინფორმაციისთვის, მეურნეობა ახმეტის მუნუციპალიტეტში, ზემო ალვანში მდებარეობს.