კვების პროდუქტების მწარმოებელი კომპანია „ექსტრამითი“ ბაზარზე 1998 წლიდან ოპერირებს და მომხმარებლებს ხორცპროდუქტებს, ნახევარფაბრიკატებსა და თევზის პროდუქტებს სთავაზობს. 2020 წელს კომპანიამ საქმიანობა ახალი მიმართულებით გააფართოვა და „ექსტრამითის“ სწრაფი კვების პავილიონების ქსელი განავითარა, რომლის გაფართოებასაც ამჟამად ფრენჩაიზის მოდელით გეგმავს. მეტი ინფორმაციისთვის, Business Insider Georgia კომპანიის დირექტორს თიკო ტურაბელიძეს ესაუბრა.

როგორია კომპანიის საქმიანობის სპეციფიკა, როდიდან ოპერირებთ ბაზარზე და რას სთავაზობთ მომხმარებლებს?

კომპანია კვების პროდუქტების წარმოების მიმართულებით 1998 წლიდან ოპერირებს. 2010 წელს განხორციელდა რებრენდინგი და ბაზარზე „ექსტრამითის“ სახელით განაგრძო საქმიანობა. ამჟამად კომპანიის ძირითადი მიმართულებებია ხორცპროდუქტები, ნახევარფაბრიკატები და თევზის პროდუქტები. პროდუქციის დისტრიბუცია საქართველოს მასშტაბით ხორციელდება, როგორც ქსელურ, ისე არაქსელურ მაღაზიებში.

2020 წელს კომპანიამ ახალი მიმართულება - „ექსტრამითის“ პავილიონები განავითარა. ეს არის სწრაფი კვების ობიექტები, სადაც კომპანიის მიერ წარმოებული პროდუქტებით სხვადასხვა სახეობის სთრითფუდი მზადდება, მათ შორის ჰოთდოგები, ბურგერები და სენდვიჩები. ამჟამად ქსელი ექვს პატარა სწრაფი კვების პავილიონსა და ერთ XL ზომის პავილიონს აერთიანებს. ეს მიმართულება კომპანიის ძირითადი ბრენდის ქვეშ ჩამოყალიბებული დამატებითი ბიზნესკატეგორიაა, რომელმაც მომხმარებლებისა და ბიზნესპარტნიორების ინტერესი გამოიწვია.

დაახლოებით ერთი წლის წინ კომპანიამ პავილიონების მიმართულებით ფრენჩაიზის მოდელის განვითარებაც გადაწყვიტა. პირველი ფრენჩაიზის ობიექტი თბილისში, ვაჟა-ფშაველას №55-ში გაიხსნა. ამ მიმართულებით კომპანიის მიზანია, ფრენჩაიზის მოდელის საშუალებით „ექსტრამითის“ პავილიონების ქსელი საქართველოს სხვადასხვა ქალაქსა და რეგიონში განავითაროს.

რა არის კომპანიის მთავარი კონკურენტული უპირატესობა და რა განგასხვავებთ ბაზარზე?

ჩვენი ერთ-ერთი მთავარი უპირატესობა მომხმარებლისთვის მისაღები ფასების შენარჩუნების მცდელობაა. გვინდა, რომ ჩვენი პროდუქცია სხვადასხვა შემოსავლის მქონე მომხმარებლისთვის ხელმისაწვდომი იყოს. სწორედ ამიტომ, ბაზრის სხვადასხვა სეგმენტზე მორგებული ბრენდები გვაქვს შექმნილი: პრემიუმ სეგმენტში წარმოდგენილია „ფუდ მასტერი“, ხოლო „ექსტრამითი“ მომხმარებლებს სხვა საფასო კატეგორიაში სთავაზობს პროდუქციას.

გარდა ამისა, ის ფაქტი, რომ პავილიონებში გამოყენებული ნედლეული მთლიანად ჩვენი წარმოებისაა, გვაძლევს შესაძლებლობას, ფასების მართვის პროცესში მეტი მოქნილობა შევინარჩუნოთ. ბაზარზე არსებული გამოწვევებისა და პროდუქციის თვითღირებულების ზრდის მიუხედავად, ვცდილობთ, ფასები შეძლებისდაგვარად სტაბილური იყოს და მომხმარებლის მსყიდველუნარიანობას შეესაბამებოდეს.

კიდევ ერთი მნიშვნელოვანი უპირატესობა დისტრიბუციის ფართო არეალია. ხორცპროდუქტების მიმართულებით პროდუქცია მიგვაქვს საქართველოს სხვადასხვა რეგიონში, მათ შორის ისეთ დასახლებებში, სადაც კონკურენტების დისტრიბუცია შესაძლოა შეზღუდული იყოს. ჩვენი მიზანია, პროდუქცია მაქსიმალურად ხელმისაწვდომი იყოს მომხმარებლებისთვის მთელი ქვეყნის მასშტაბით, მათ შორის რეგიონებსა და სოფლებში.

რა გეგმები აქვს Extrameat-ს წლის დარჩენილი პერიოდისთვის - იგეგმება თუ არა ასორტიმენტის განვითარება ან ახალი მიმართულებების დამატება?

ერთ-ერთი მნიშვნელოვანი პროექტი ნედლად შებოლილი ხორცპროდუქტების ახალი საწარმოს ამოქმედებაა. ამ ეტაპზე საწარმოო სივრცე უკვე გარემონტებულია, შეძენილია შესაბამისი დანადგარები და მიმდინარეობს მათი მონტაჟი. ნედლად შებოლილი პროდუქტები ხორცპროდუქტების უფრო მაღალი კატეგორიაა და ამ მიმართულების დამატებით კომპანია საკუთარ ასორტიმენტს გააფართოებს.

ამასთან, ვგეგმავთ სარეალიზაციო არეალის მნიშვნელოვნად გაფართოებას, რაც გულისხმობს პროდუქციის ხელმისაწვდომობის ზრდას და თანამშრომლობის დაწყებას როგორც ქსელურ, ისე დამოუკიდებელ სასურსათო მაღაზიებთან, რათა ვუზრუნველვყოთ პროდუქციის მასშტაბური გავრცელება.

განვითარების კიდევ ერთი მნიშვნელოვანი მიმართულება „ექსტრამითის“ პავილიონების ქსელის გაფართოებაა. ფრენჩაიზის მოდელი დაინტერესებულ პირებს შესაძლებლობას აძლევს, მზა ბიზნესკონცეფციის საფუძველზე გახსნან საკუთარი ობიექტი, კომპანიის მხარდაჭერითა და ჩართულობით. ეს მოდელი ხელს უწყობს როგორც პარტნიორების მიერ ბიზნესის დაწყებას, ისე ჩვენი ბრენდის ცნობადობის ზრდასა და ქსელის გაფართოებას საქართველოს სხვადასხვა ქალაქსა და რეგიონში.

ჩვენი მიზანია, ორივე მიმართულებით განვაგრძოთ განვითარება - გავაფართოოთ პროდუქციის ასორტიმენტი ახალი საწარმოს ამოქმედებით და ფრენჩაიზის საშუალებით უფრო მეტ მომხმარებელს გავხადოთ ხელმისაწვდომი „ექსტრამითის“ პავილიონების შეთავაზება.