Gennaro Pizza Tbilisi ნეაპოლში არსებული ერთ-ერთი ყველაზე პოპულარული და დღემდე მოქმედი პიცერიის - Pizza Antica da Gennaro-ს ოფიციალური ფილიალია, რომელიც უკვე ერთი წელია ქართულ ბაზარზე ოპერირებს. მეტი ინფორმაციისთვის, Business Insider Georgia Gennaro Pizza Tbilisi-ს დამფუძნებელს, ქრისტინე ბუბუნაშვილს ესაუბრა.

როგორია კომპანიის საქმიანობის სპეციფიკა, როდის დაიწყეთ ოპერირება და რას სთავაზობთ მომხმარებლებს?

Gennaro Pizza Tbilisi ერთი წლის წინ შეიქმნა ერთი მთავარი იდეის გარშემო - თბილისში ნამდვილი ნეაპოლიტანური პიცის კულტურის შემოტანის მიზნით.

ჩვენი პიცერია წარმოადგენს ნეაპოლში არსებული ერთ-ერთი ყველაზე პოპულარული და დღემდე მოქმედი პიცერიის - Pizza Antica da Gennaro-ს ოფიციალურ ფილიალს, რომელიც ნეაპოლიტანურ პიცას ყველა ავთენტური ტრადიციის დაცვით 1956 წლიდან ამზადებს.

ჯენაროს განსაკუთრებულობა სწორედ მის ავთენტურობაშია. ეს არ არის უბრალოდ იტალიური სტილის პიცერია - ეს არის ნაპოლიში არსებული რეალური პიცერიის გაგრძელება თბილისში. შესაბამისად, ზედმიწევნით ვიცავთ ყველა იმ ტრადიციას, ტექნიკას და რიტუალს, რაც Antica da Gennaro Napoli-მ ათწლეულების განმავლობაში ჩამოაყალიბა - დაწყებული ცომის მომზადების მეთოდიდან, დასრულებული გამოცხობის ტექნიკითა და ინგრედიენტების შერჩევით.

ჩვენთვის ნამდვილი ნეაპოლიტანური პიცა მხოლოდ პროდუქტი არ არის - ეს არის კულტურა, ისტორია და გამოცდილება, რომლის გაზიარებაც გვინდა ქართველი მომხმარებლისთვის.

როგორ შეაფასებდით დღეს თბილისში იტალიური სამზარეულოსა და პიცერიის სეგმენტზე მოთხოვნას - რა ტენდენციებს ხედავთ მომხმარებლის ქცევაში?

ბოლო წლებში აშკარად გაიზარდა მომხმარებლის ინტერესი ავთენტური და ხარისხიანი გამოცდილების მიმართ. თუ ადრე პიცა უფრო სწრაფი კვების კატეგორიასთან ასოცირდებოდა, დღეს მომხმარებელი უკვე არჩევს კონკრეტულ სტილს, ცომის ტექსტურას, ინგრედიენტების ხარისხს და ისტორიასაც კი.

ჩვენთვის განსაკუთრებით სასიხარულოა, რომ ქართველმა მომხმარებელმა უკვე გაიცნო და შეიყვარა ნამდვილი ნეაპოლიტანური პიცა, მათ შორის მისი ყველაზე გამორჩეული ელემენტი, სქელი და ჰაეროვანი ბორტები. ეს უკვე ნიშნავს, რომ ბაზარი უფრო მეტად აფასებს ავთენტურობას, ხარისხიან პროდუქტს და გემოვნებითაც ბევრად უფრო მომთხოვნი გახდა.

რა არის თქვენი მთავარი კონკურენტული უპირატესობა?

ჩვენი მთავარი უპირატესობა ავთენტურობაა. Gennaro Pizza Tbilisi არის ნეაპოლიტანური პიცის რეალური კულტურის წარმომადგენელი თბილისში და არა მისი ინტერპრეტაცია.

ჩვენი ყველა პროცესი ცომის მომზადებიდან ღუმელში გამოცხობამდე მიჰყვება იმ სტანდარტებს, რაც Antica da Gennaro Napoli-მ 1956 წლიდან დანერგა.

ჰაეროვანი ცომი, მომზადების ტექნოლოგია, მხოლოდ იტალიური ინგრედიენტები. ნამდვილი ღუმელი, რომლის ანალოგი სხვაგან არ მოიძებნება.

ამასთან ერთად, ჩვენი კონცეფცია აერთიანებს ნამდვილ იტალიურ გარემოს, იტალიურ ემოციას და ხარისხზე მაქსიმალურ ფოკუსს. სწორედ ამიტომ, მომხმარებელი ჯენაროში მხოლოდ პიცის საჭმელად არ მოდის, ის მოდის ნამდვილი ნეაპოლიტანური გამოცდილებისთვის.

ჩვენთან სტუმრები ეცნობიან პიცის მირთმევის ავთენტურ რიტუალსაც - ნეაპოლიტანური პიცა ხშირად არ იჭრება, არამედ იკეცება და ისე მიირთმევა. ეს ნაპოლიში ყოველდღიური კულტურის ნაწილია და ზუსტად ამ ტრადიციას ვინარჩუნებთ ჯენაროშიც, ისევე როგორც ჩვენს ნაპოლის ფილიალში.

როგორ მუშაობთ ინგრედიენტების შერჩევაზე და რამდენად მნიშვნელოვანია ხარისხი თქვენი კონცეფციისთვის?

ნეაპოლიტანურ პიცაში ინგრედიენტები ყველაფერს განსაზღვრავს. რადგან პიცა შედარებით მარტივი პროდუქტია, თითოეული კომპონენტის ხარისხი განსაკუთრებით იგრძნობა.

ჩვენთვის მნიშვნელოვანია როგორც სწორი ფქვილი და ფერმენტაციის პროცესი, ისე ავთენტური იტალიური ინგრედიენტები - პომიდორი, მოცარელა, ზეითუნის ზეთი და სხვა დეტალები, რომლებიც საბოლოო გემოს ქმნის.

ხარისხი ჯენაროს კონცეფციის მთავარი ნაწილია, რადგან ნამდვილი ნეაპოლიტანური პიცა კომპრომისებს არ აღიარებს. სწორედ ამიტომ, ყველა ეტაპზე ვიცავთ იმ სტანდარტებს, რაც ნაპოლიშია მიღებული.

როგორია თქვენი სამომავლო გეგმები - გაფართოების, ახალი ფილიალების ან მენიუს განახლების კუთხით?

ჩვენი მთავარი მიზანია, კიდევ უფრო მეტ ადამიანს გავაცნოთ ნამდვილი ნეაპოლიტანური პიცის კულტურა საქართველოში.

სამომავლოდ ვგეგმავთ როგორც ბრენდის გაფართოებას, ისე მომხმარებლის გამოცდილების კიდევ უფრო გამდიდრებას - ახალი პროდუქტებით, იტალიური კონცეფტუალური საღამოებით და სხვადასხვა აქტივობებით, რომლებიც ჯენაროს ატმოსფეროს კიდევ უფრო გააძლიერებს.

თუმცა, ზრდასთან ერთად ჩვენთვის ყველაზე მნიშვნელოვანი მაინც ერთია - ავთენტურობის შენარჩუნება. რადგან “პიცა ანტიკა - ჯენარო” მხოლოდ სლოგანი არ არის, ეს არის ტრადიცია, რომელსაც პატივს ვცემთ და ყოველდღიურად ვაგრძელებთ თბილისში.

ინფორმაციისთვის, Gennaro Pizza Tbilisi ბახტრიონის ქუჩაზე, 11ბ ნომერში მდებარეობს.