გამოწვევების საპასუხოდ, Skillwill-მა განათლების სამინისტროსთან ერთად იმუშავა და შევიმუშავეთ და დავამტკიცეთ ხუთი ახალი პროფესიის სტანდარტი, -  აცხადებს სქილვილ შვეიცარიული კოლეჯის დამფუძნებელი და თბილისის შვეიცარიული საერთაშორისო სკოლის სამეთვალყურეო საბჭოს წევრი გიორგი მარიამიძე, რომელიც ტელეკომპანია „მაესტროს“ ეთერში გადაცემა Business Insider Georgia-ს სუტმარი იყო

მისი განცხადებით, ახალი პროფესიული სტანდარტები შრომითი ბაზრის მოთხოვნების შესაბამისად შეიმუშავეს და მოიცავს ისეთ მიმართულებებს, როგორიცაა ციფრული მარკეტინგი, პროექტების მართვა, მონაცემთა ანალიტიკა და ხელოვნური ინტელექტის ბიზნეს პროცესებში დანერგვა, რომლებიც, მისი თქმით, დღეს განსაკუთრებით მოთხოვნადია.

„ჩვენ შევიმუშავეთ ახალი პროფესიული სტანდარტები ციფრული მარკეტინგის, პროექტების მართვისა და მონაცემთა ანალიტიკის მიმართულებით. ასევე, დავამატეთ საკმაოდ ინოვაციური სფერო - ხელოვნური ინტელექტის ბიზნესპროცესებში დანერგვა და ავტომატიზაცია. თითოეული ეს მიმართულება, იქნება ეს მონაცემთა ანალიტიკა თუ ციფრული მარკეტინგი, დღეს შრომის ბაზარზე ძალიან მოთხოვნადია და ეს პროფესიებიც სწორედ ამ კრიტერიუმის საფუძველზე შევარჩიეთ“, - აცხადებს გიორგი მარიამიძე.

გიორგი მარიამიძის შეფასებით, ახალი უნარების, მათ შორის ციფრული მარკეტინგის შესწავლა არასდროს არის დაგვიანებული და შეუძლია მნიშვნელოვნად დაეხმაროს მცირე ბიზნესსაც კი, მათ შორის ინდმეწარმეებს, გაყიდვების ზრდაში და საქმიანობის განვითარებაში.

„ვფიქრობ, სიახლეების ათვისება დაგვიანებული არასდროს არის. მარტივად რომ გითხრათ, თუ ხართ ინდმეწარმე და ამზადებთ, ვთქვათ, საბავშვო სათამაშოებს ან სხვა ნივთებს, რომლებსაც ტურისტებზე ყიდით, ციფრული მარკეტინგის საფუძვლების გაცნობაც კი საგრძნობლად დაგეხმარებათ გაყიდვების გაზრდაში. თუნდაც Facebook-ზე გვერდის შექმნა, რამდენიმე პოსტის გამოქვეყნება და რეკლამის განთავსება უკვე დიდ შედეგს იძლევა. ამიტომ, არ მიმაჩნია, რომ ეს რთული ან მიუღწეველი იყოს. პირიქით, ვფიქრობ, აუცილებელია, რომ გარკვეულ დროსა და ტექნოლოგიურ ცვლილებებს ფეხი ავუწყოთ. სწავლა გვიანი არასდროს არის“, აცხადებს სქილვილ შვეიცარიული კოლეჯის დამფუძნებელი და თბილისის შვეიცარიული საერთაშორისო სკოლის სამეთვალყურეო საბჭოს წევრი გიორგი მარიამიძე.