რესტორატორთა ასოციაციის დამფუძნებლის კონსტანტინე გაბრიჩიძის განცხადებით, გლობალური გამოწვევების ფონზე საქართველოში სტუმარმასპინძლობის სექტორი სერიოზული გამოწვევების წინაშე დგას, რის დასაძლევადაც აუცილებელია მთავრობისა და კერძო სექტორის ერთობლივი მოქმედება. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას კონსტანტინე  გაბრიჩიძემ აღნიშნა, მხოლოდ მარტში 600-ზე მეტი ფრენა გაუქმდა, რამაც მასპინძლობის ინდუსტრიის ნაწილში შემოსავლების 40%-იანი კლება და მასობრივი უმუშევრობის საფრთხე წარმოქმნა. 

ტურიზმის სექტორში არსებულ გამოწვევებზე ბიზნესმა ტურიზმის ეროვნული ადმინისტრაციის ხელმძღვანელთან გარკვეული დეტალები უკვე განიხილა და პრობლემებთან ერთად სამომავლო გეგმებიც შეაჯერა. შეხვედრაზე განხილული იყო ასევე ვითარების განვითარების სხვადასხვა სცენარი.

„შეხვედრა საკმაოდ დროული იყო, რადგან აშკარაა, რომ პრობლემა არსებობს და ამ შემთხვევაში აუცილებელია ყველა მხარის ერთ გუნდად შეკვრა. იქნება ეს მთავრობა თუ კერძო სექტორი, ჩვენ - დოვლათის შემქმნელები, გადასახადის გადამხდელები და დამსაქმებლები, ყველანი ერთად ვქმნით მასპინძლობის ინდუსტრიის ერთიან გუნდს. შესაბამისად, ერთობლივად უნდა გადავჭრათ ის პრობლემები, რომლებიც რეალურ ციფრებში უკვე აისახა.

მაგალითად, მარტში 620 ფრენა გაუქმდა. განსაკუთრებით საყურადღებოა, რომ გაუქმდა რეისები ინდოეთიდან, ჩინეთიდან და კორეიდან. გარდა იმისა, რომ ამჟამად ვიზიტორები არ შემოდიან სამხრეთის მიმართულებებიდან, იქნებიან ეს სპარსეთის ყურის არაბული ქვეყნები, ისრაელი თუ ირანი, სხვადასხვა რესტორანს ფაქტობრივად 35-40%-იანი კლება აქვს. ეს ყველას არ ეხება, ვისი საქმიანობაც ქართულ სუფრებზე, დაბადების დღეებსა და ქორწილებზეა ორიენტირებული, მათ მსგავსი კლება არ აქვთ, თუმცა ის მიმართულებები, რომლებიც სტუმრების მიღებაზეა ფოკუსირებული, ძალიან დაზარალდა. მაგალითად, გუდაურში ამ მხრივ საკმაოდ მძიმე მდგომარეობაა.

იმ რეგიონებში, მათ შორის თბილისშიც, სადაც ტურისტებს ელოდებიან, საკმაოდ სავალალო მდგომარეობაა. იგივე შემიძლია ვთქვა სასტუმროებზეც, სადაც ჩვენ ვპარტნიორობთ. ასევე, დიდი დარტყმის ქვეშაა ავიაცია“, - განმარტავს რესტორატორთა ასოციაციის დამფუძნებელი.

კონსტანტინე გაბრიჩიძის განცხადებით, ტურიზმზე დამოკიდებულ რეგიონებში, მათ შორის სასტუმროებსა და ავიაციის სექტორში, ვითარება მნიშვნელოვნად გართულდა, ხოლო კონფლიქტის გახანგრძლივების შემთხვევაში ზაფხულის სეზონის ჩავარდნისა და ბიზნესებისთვის სერიოზული ფინანსური დანაკარგების რისკი იზრდება. 

აღნიშნულ თემებზე ბიზნესმა  ტურიზმის ეროვნული ადმინისტრაციის ხელმძღვანელთან გამართულ შეხვედრაზე ისაუბრა.

„განვიხილეთ, რომ ამ ეტაპზე მუშაობა სხვადასხვა სცენარზე მიმდინარეობს. სცენარები დამოკიდებულია იმაზე, თუ როდის დასრულდება კონფლიქტი - ერთ კვირაში, ორ კვირაში თუ ერთ თვეში. თუ კონფლიქტი ივლისის ბოლომდე გაგრძელდა, ტურისტული სეზონი ფაქტობრივად ჩავარდება. ეს კი ნიშნავს, რომ უამრავი ადამიანი, ვისაც აღებული აქვს კრედიტები, ჩადებული აქვს ინვესტიციები და მთელი წელი ელოდება ტურისტების შემოდინებას, კატასტროფის წინაშე აღმოჩნდება.

განიხილება როგორც მძიმე, ისე საშუალო სირთულის სცენარები. კარგია, რომ ამაზე ფიქრი ახლა მიმდინარეობს და არა ივნისში, როდესაც ფაქტის წინაშე დავდგებით. ჩვენ უკვე გვაქვს პანდემიის მძიმე გამოცდილება, საქსტატის მონაცემებით, რეგისტრირებული 10 000 კვების ობიექტიდან კორონავირუსის პერიოდს დაახლოებით მესამედი დაიხურა. ეს ნიშნავს ქვეყნისთვის დაკარგულ შემოსავალს, გაკოტრებულ ბიზნესებსა და უამრავ უმუშევარს, რომლებიც შემდეგ საზღვარგარეთ მიდიან. მსგავსი შედეგების თავიდან ასაცილებლად, აუცილებელია წინასწარი დაგეგმვა და გარკვეული „ბალიშის“ მომზადება, რათა დარტყმა მაქსიმალურად შევარბილოთ“, - აცხადებს კონსტანტინე გაბრიჩიძე.