„ყავა ბათუმური“ მომხმარებლების მხრიდან მზარდი მოთხოვნის ფონზე განვითარებას აგრძელებს. ბოლო პერიოდში გაიზარდა როგორც ბრენდის ცნობადობა, ისე გაყიდვები, კომპანიამ კი საკუთარი პროდუქცია ბათუმის ყავის ფესტივალზეც წარადგინა. მიმდინარე სიახლეებისა და სამომავლო გეგმების შესახებ Business Insider Georgia-ს „ყავა ბათუმურის“ დამფუძნებელი დაჯი ხიმშიაშვილი ესაუბრა.

როგორია კომპანიის მიმდინარე სიახლეები და როგორ შეიცვალა „ყავა ბათუმურის“ გაყიდვები?

ერთ-ერთი მთავარი სიახლე ის არის, რომ უფრო მეტი მომხმარებელი გვყავს. ცოტა ხნის წინ ბათუმის ყავის ფესტივალზე ვიყავით მიწვეული, სადაც მომხმარებლებს ჩვენი ყავის დაგემოვნების შესაძლებლობა ჰქონდათ და ბევრ ადამიანს მოეწონა. მოთხოვნა გაიზარდა, შესაბამისად, გაიზარდა ცნობადობაც და გაყიდვებიც.

როგორია თქვენი მიმდინარე ასორტიმენტი?

ამ ეტაპზე ასორტიმენტში კვლავ ერთი სახეობის მარცვალი გვაქვს - მოთხოვნადი რობუსტას ჯიში. ჩვენი ყავა ნალექიანია, გამოირჩევა თავისი ქაფითა და არომატულობით. მარცვალი წვრილად არის მოხალული და დაფქული. მომავალში არაბიკას მარცვლის დამატებასაც ვგეგმავთ. ასევე, შესაძლოა, ორივე სახეობის მარცვალი ერთმანეთში ავურიოთ.

სუპერმარკეტების ქსელებში შესვლის მიმართულებით რა ეტაპზეა კომპანია და შეიცვალა თუ არა თქვენი სტრატეგია?

ჯერჯერობით არაფერი შეცვლილა. ამ ეტაპზე პროდუქცია მხოლოდ ორ ობიექტში გვაქვს წარმოდგენილი - თბილისში, პეკინის N5-ში და ბათუმში, გორგილაძის N54-ში. ასევე გვაქვს მიწოდების სერვისი და პროდუქცია საქართველოს მასშტაბით, ნებისმიერ ლოკაციაზე მიგვაქვს.

საკუთარი კაფის გახსნის იდეა კვლავ აქტუალურია და რა ეტაპზეა პროექტი?

იდეა კვლავ აქტუალურია. ამ ეტაპზე ვეძებთ ინვესტორს, რომელსაც ექნება სურვილი, შემოგვიერთდეს და ერთად განვახორციელოთ ჩვენი გეგმები.

როგორია „ყავა ბათუმურის“ განვითარების მთავარი გეგმები მომდევნო პერიოდში?

მთავარი გეგმა ასორტიმენტის გაზრდაა. გვინდა, დავამატოთ უფრო ძლიერი მარცვლები, რადგან მომხმარებლების მხრიდან ამ მიმართულებაზე მოთხოვნა არსებობს.