FOOD GOOD ჯანსაღი და დაბალანსებული კვების კონცეფციაზე დაფუძნებული სწრაფი მომსახურების რესტორნების ქსელია, რომელიც ქართულ ბაზარზე 2021 წლიდან ოპერირებს. კომპანია მომხმარებელს მრავალფეროვან მენიუს სთავაზობს. FOOD GOOD-ის კონცეფციის, მომხმარებლებისთვის შეთავაზებული მენიუსა და ქსელის გაფართოების გეგმების შესახებ Business Insider Georgia-ს კომპანიის დამფუძნებელი მაკუნა გურგენიძე ესაუბრა.

როგორია კომპანიის საქმიანობის სპეციფიკა, როდიდან ოპერირებთ ბაზარზე და რას სთავაზობთ მომხმარებლებს?

Food Good არის ჯანსაღი და დაბალანსებული კვების კონცეფციაზე დაფუძნებული სწრაფი მომსახურების რესტორნების ქსელი, რომელიც ქართულ ბაზარზე 2021 წლის მარტიდან ოპერირებს.

ჩვენი მთავარი მიზანია, თანამედროვე ცხოვრების სწრაფ რიტმში მომხმარებელს შევთავაზოთ ჯანსაღი, ნოყიერი და მრავალფეროვანი ალტერნატივა. Food Good-ის მენიუ მოიცავს დაბალანსებულ ბოულებს, სალათებს, სენდვიჩებს, როლებს, ჯანსაღ საუზმეებს, სმუზებსა და ნატურალურ წვენებს.

განსაკუთრებულ ყურადღებას ვაქცევთ ინგრედიენტების ხარისხს, სიახლესა და კვებითი ღირებულებების ბალანსს. ამასთანავე, ჩვენი პროდუქცია ხელმისაწვდომია როგორც ლოკაციებზე ადგილზე მისვლით, ისე მიტანის სერვისების საშუალებით. ჩვენი მთავარი გზავნილია, დავამტკიცოთ, რომ ჯანსაღი კვება შეზღუდვა კი არა, ყოველდღიურობის გემრიელი, მარტივი და კომფორტული ნაწილია - სწორედ ამ იდეას აერთიანებს ჩვენი სლოგანიც: Eat This, Not That.

რა არის კომპანიის მთავარი კონკურენტული უპირატესობა და რა გამოგარჩევთ ბაზარზე?

FOOD GOOD-ის მთავარი კონკურენტული უპირატესობა ჯანსაღი კონცეფციის, უმაღლესი ხარისხის, მრავალფეროვნებისა და სწრაფი მომსახურების ერთობლიობაშია.

ჩვენ ვამსხვრევთ სტერეოტიპს, რომ ჯანსაღი კვება აუცილებლად მკაცრ დიეტასთან, შეზღუდვებთან ან ნაკლებად გემრიელ საკვებთან ასოცირდება. ჩვენთან ის არის გემრიელი, ნოყიერი და ვიზუალურად ესთეტიკური.

ბაზარზე გამოგვარჩევს პროდუქციის ხარისხისადმი უკომპრომისო მიდგომა, მომხმარებელზე ორიენტირებული სერვისი და თანამედროვე ხედვა. ჩვენს სტუმრებს აღარ უწევთ კომპრომისზე წასვლა გემოს, სისწრაფესა და ჯანსაღ კვებას შორის - FOOD GOOD-ში ეს ყველაფერი ერთიანდება. ჩვენ არ ვთავაზობთ მომხმარებელს უბრალოდ საკვებს, ვთავაზობთ ჯანსაღი ცხოვრების წესის მარტივ და გემრიელ ალტერნატივას.

როგორია FOOD GOOD-ის სამომავლო გეგმები - იგეგმება თუ არა ახალი ფილიალების გახსნა და ქსელის რეგიონებში გაფართოება?

FOOD GOOD მუდმივ განვითარებასა და გაფართოებაზეა ორიენტირებული. ჩვენი მიზანია, ჯანსაღი კვების კულტურა კიდევ უფრო ფართო აუდიტორიისთვის გახდეს ხელმისაწვდომი.

მიმდინარე წლის ბოლოსთვის თბილისში უკვე 4 ლოკაციით ვიქნებით წარმოდგენილი:
• ჭავჭავაძის გამზირი
• სითი მოლი საბურთალო
• ორბელიანის ბაზარი
• რადიო ქალაქი

რაც შეეხება რეგიონულ გაფართოებას, მომავალ წელს ვგეგმავთ პირველი ფილიალის გახსნას ბათუმში, რაც საშუალებას მოგვცემს, ჩვენი კონცეფცია და პროდუქცია შევთავაზოთ როგორც ადგილობრივ მცხოვრებლებს, ისე ქალაქის მრავალრიცხოვან სტუმრებს.

ფიზიკურ გაფართოებასთან ერთად, აქტიურად ვმუშაობთ მენიუს განვითარებაზე, ახალი პროდუქტების დანერგვასა და მომსახურების სტანდარტების მუდმივ დახვეწაზე, რათა ქსელის ზრდასთან ერთად უცვლელად შევინარჩუნოთ ის ხარისხი, გემო და ღირებულებები, რომლებზეც FOOD GOOD-ია დაფუძნებული.