საქართველოს ბიზნეს ასოციაციამ (BAG), Skillwill Swiss College-თან თანამშრომლობით, წევრი კომპანიების ტოპ მენეჯმენტისა და ხელმძღვანელი პირებისთვის ერთდღიან ინტენსიურ ტრენინგს უმასპინძლა.

საინფორმაციო სესია მთლიანად დაეთმო ბიზნესპროცესებში ხელოვნური ინტელექტის (AI) სტრატეგიულ ინტეგრაციას, ოპერაციული ეფექტიანობის გაზრდასა და მართვის თანამედროვე მოდელების დანერგვას. ხელოვნური ინტელექტის სწრაფი განვითარება დღეს ბიზნესისგან სწორედ ასეთ სტრატეგიულ გადააზრებასა და ახალი ინსტრუმენტების პრაქტიკულ ათვისებას მოითხოვს.

ასოციაციის ოფისში გამართულ 8-საათიან შეხვედრას ხელოვნური ინტელექტისა და ბიზნესპროცესების ავტომატიზაციის მიმართულების ექსპერტი ნიკა ყოჩიაშვილი გაუძღვა, რომელსაც სხვადასხვა სექტორში (საცალო გაყიდვები, მედიცინა, საბანკო სფერო, მშენებლობა) AI გადაწყვეტილებების დანერგვის დიდი გამოცდილება აქვს. პროგრამა მოიცავდა როგორც არატექნიკურ განმარტებებსა და წამყვანი გლობალური ორგანიზაციების (IBM, McKinsey, PwC) კვლევებს, ისე უმსხვილესი საერთაშორისო ბრენდების (JPMorgan, Allianz, WPP) რეალურ მაგალითებსა და რისკების მართვის პრინციპების ანალიზს. მენეჯერებმა პრაქტიკულ ნაწილში Custom GPT-ის, Gemini Gem-ისა და სხვა საოფისე AI აგენტების ცოცხალი დემონსტრაცია იხილეს და ორგანიზაციებისთვის 90-დღიანი სამოქმედო გეგმების პროტოტიპირებაზე იმუშავეს.

„თანამედროვე ბიზნესში ხელოვნური ინტელექტი აღარ არის მხოლოდ ტექნოლოგიური სიახლე, ის ოპერაციული ეფექტიანობისა და კონკურენტუნარიანობის შენარჩუნების მთავარი სტრატეგიული ინსტრუმენტი გახდა. Skillwill Swiss College-თან პარტნიორობით ორგანიზებული ტრენინგი სპეციალურად ჩვენი წევრი კომპანიების ხელმძღვანელებისთვის შევიმუშავეთ, რათა მათ ჰქონდეთ ზუსტი ხედვა და პრაქტიკული ინსტრუმენტები AI-ის შესაძლებლობების საკუთარ ორგანიზაციებში დასანერგად. BAG აქტიურად გააგრძელებს წამყვან საგანმანათლებლო პლატფორმებთან თანამშრომლობას, რათა ქართულ ბიზნესს ჰქონდეს წვდომა უახლეს გლობალურ ცოდნაზე, რაც აუცილებელია ცვალებად ეკონომიკურ გარემოში მდგრადი განვითარებისთვის" განაცხადა საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ.