„ჰერბია“ ასორტიმენტის გაფართოებასა და ახალი პროდუქტების განვითარებას აგრძელებს. კომპანია ნოემბერ-დეკემბერში ბაზარზე რამდენიმე ახალ პროდუქტს წარადგენს. მიმდინარე სიახლეებსა და სამომავლო გეგმებზე Business Insider Georgia-ს კომპანიის თანადამფუძნებელი დავით ჯანელიძე ესაუბრა.

„ჰერბიას“ დაარსებიდან 20 წლის განმავლობაში კომპანიის გაყიდვების დინამიკა სტაბილურად მზარდია. პირველი 10 წლის განმავლობაში კომპანია გაყიდვებს თითქმის აორმაგებდა, ბოლო 10 წელია კი გაყიდვების 20-25%-იან ზრდას ინარჩუნებს. შესაბამისად, არც 2025 წელი და არც წინა პერიოდი ამ მხრივ გამონაკლისი არ ყოფილა - კომპანია გაყიდვებს სტაბილურად, 20-25%-ის ფარგლებში ზრდის.

„ჰერბია“ სრულ საწარმოო ჯაჭვს აერთიანებს, რაც მოიცავს პირველადი წარმოების ეტაპს, ძირითადად, კომპანიის კუთვნილ სასათბურე მეურნეობებში, ასევე პროდუქციის მოვლა-შენახვას, შეფუთვას, გადამუშავებას, ლოჯისტიკას, დისტრიბუციასა და საბოლოო ეტაპზე მომხმარებლისთვის ხარისხიანი პროდუქტის შეთავაზებას. ეს საკმაოდ რთული და მრავალკომპონენტიანი პროცესია.

მოთხოვნა კომპანიის პროდუქციაზე გაცილებით მაღალია, ვიდრე არსებული წარმოების მოცულობა. თუმცა წარმოებისა და მიწოდების გაზრდა საწარმოო ჯაჭვის ყველა კომპონენტის შესაბამისი მოცულობით გაფართოებას მოითხოვს. სწორედ ამიტომ, მომდევნო წლის გეგმებზე მუშაობა უკვე წინა წლის ნოემბერ-დეკემბერში იწყება. შესაბამისად, „ჰერბია“ მიმდინარე წელსაც დაახლოებით 20-25%-ის ფარგლებში გაყიდვების ზრდას ელოდება.

კომპანია ბაზარზე მუდმივად ახალი პროდუქციით შედის - როგორც ახალი სახეობებით, ისე უკვე არსებული პროდუქციის გადამუშავებული ვერსიებით. „ჰერბიასთვის“ სეზონი კალენდარული წლის დასაწყისიდან არ იწყება და ახალი სეზონისთვის მზადება უკვე შემოდგომაზე იწყება. შესაბამისად, ნოემბერ-დეკემბერში, როგორც ყოველ წელს, მომხმარებლებს ახალი პროდუქტები შეემატებათ.

უკვე რამდენიმე წელია, „ჰერბია“ გარეცხილი პროდუქციის რეალიზაციის მიმართულებას ავითარებს, მათ შორის ბოსტნეულისა და მწვანილეულის, ასევე სხვადასხვა მიქსის მიმართულებით. კომპანიამ ეს პროდუქცია ქართულ ბაზარზე რამდენიმე წლის წინ შემოიტანა და მას შემდეგ მუდმივად აუმჯობესებს როგორც ტექნოლოგიას, ისე პროდუქტის გემოვნურ მახასიათებლებს. ამ პროცესში გამოყენებულია იტალიური, ესპანური და სხვა ტექნოლოგიები, რომლებიც ქართულ გემოვნებასა და მომხმარებლის მოთხოვნებს მოერგო. გადამუშავების მიმართულებით კომპანიამ პესტოებისა და სოუსების რამდენიმე სახეობა უკვე წარმოადგინა, ასევე მომზადებულია მიქსების რამდენიმე ვერსია. დამატებითი ახალი ვერსიები კი ბაზარზე ნოემბერ-დეკემბერში გამოჩნდება.

სამომავლო განვითარების მიმართულებით, „ჰერბიამ“ მიმდინარე წელს დამატებით 1 ჰექტარი სათბური შეიძინა, რაც კომპანიას ასორტიმენტის გაფართოებისა და ახალი შესაძლებლობების ათვისების საშუალებას მისცემს. ამას დაემატება ახალი ტექნოლოგიური ხაზები, რომლებიც წარმოებაში ჩაერთვება. ამასთან, კომპანიის პარტნიორი ფერმერები აქტიურად მუშაობენ სხვადასხვა მიმართულებით, რაც მომავალში გაყიდვების მოცულობისა და ზრდის ტემპის კიდევ უფრო გაზრდას შეუწყობს ხელს.

კომპანიის მიზანია, ქართულ ბაზარზე იმპორტირებული პროდუქცია ადგილობრივი წარმოებით ეტაპობრივად ჩაანაცვლოს. „ჰერბია“ მხოლოდ ადგილობრივ პროდუქციას ყიდის და წლების განმავლობაში ტრადიციაზე დაფუძნებულ კომპანიად ჩამოყალიბდა. კომპანიის ასორტიმენტში იშვიათად ხვდება პროდუქტი, რომელიც საქართველოში არ არის მოყვანილი, ამიტომ „ჰერბია“ ცდილობს, ეს პრინციპი მომავალშიც შეინარჩუნოს.

ინფორმაციისთვის, კომპანია სერტიფიცირებულია Global G.A.P.-ისა და GEO G.A.P.-ის სტანდარტით. პროდუქცია სრულად აკმაყოფილებს ევროპულ ხარისხსა და სურსათის უსაფრთხოების მოთხოვნებს. საქმიანობა ხორციელდება HACCP-ის სისტემის შესაბამისად.