კომპანია ჰერბია • Herbia, რომელიც ადგილობრივ ბაზარს მრავალი სახეობის მწვანილით ამარაგებს, გაფართოვდა. როგორც Business Insider Georgia-სთან კომპანიის თანადამფუძნებელმა, დავით ჯანელიძემ, განაცხადა, „ჰერბიამ“ საკუთარი სათბურები 1 ჰა-ით გაზარდა და ამ დროისათვის აქვს 15 ჰექტარზე გაშენებული სასათბურე მეურნეობა, მისივე შესაფუთი, გადამამუშავებელი და შესანახი ინფრასტრუქტურით.

„სულ ახლახან ჰერბიამ საკუთარი სასათბურე მეურნეობა 1 ჰექტარით გაზარდა. ჩვენ სათბურების დამატებასა და ზოგადად გაფართოებას ყოველწლიურად ვახდენთ. ყოველ წელს გვაქვს ზრდა პირველად წარმოებაში და ასევე შესაფუთ წარმოებაშიც“, – განმარტავს დავით ჯანელიძე.

ამ დროისათვის „ჰერბიას“ ქსელებში 25-მდე დასახელების პროდუქტი შეაქვს, თუმცა რამდენიმე თვეში ასორტიმენტის გაფართოებასაც აპირებს.

„ჩვენ გვაქვს დაახლოებით 25-მდე პოზიცია. თითქმის ყველა სუპერმარკეტში ვართ წარმოდგენილები. ჭარბი მოთხოვნის ფონზე, პირველადი წარმოება რაოდენობრივად არ გვყოფნის. „ჰერბიას“ პროდუქტებზე მართლაც, რომ დიდი მოთხოვნაა. პარტნიორ სავაჭრო ქსელებს ვამარაგებთ, მაგრამ იქაც კი გვიჭირს სრული მომარაგება მაღალი მოთხოვნის ფონზე.

ასორტიმენტის გაზრდას ვფიქრობთ. განვიხილავთ ისეთი პროდუქტების დამატებას, მაგალითად, როგორიც არის გარეცხილი სალათები. მსგავსი პროდუქტები ევროპაში ძალიან პოპულარულია. ამ მიმართულებით გვაქვს ერთი პოზიცია, მაგრამ ახლა უფრო მრავალფეროვანი გვექნება, მათ შორის, იქნება მაგალითად ბეიბი ისპანახი, რომელიც ძალიან სასარგებლოა ბავშვებისთვის და იქნება გარეცხილი სახით წარმოებაში“, – განმარტავს „ჰერბიას“ თანადამფუძნებელი.

ახალი პროდუქტების ბაზარზე გამოტანას „ჰერბია“ გაზაფხულის ბოლოსთვის გეგმავს.

გარდა საკუთარი სათბურებისა, კომპანია აქტიურად თანამშრომლობს 500-მდე პარტნიორ ფერმერთან, რომლებიც პროდუქციას „ჰერბიას“ აგრონომების მუდმივი მეთვალყურეობისა და კონსულტაციის პირობებში აწარმოებენ, რეალიზაციას კი სრულად შპს ჰერბია უზრუნველყოფს.

„ჰერბიაში“ დასაქმებულია 300-ზე მეტი ადგილობრივი თანამშრომელი, რითაც კომპანიას მნიშვნელოვანი წვლილი შეაქვს რეგიონის სოციალურ-ეკონომიკური განვითარების საქმეში.

კომპანია სერტიფიცირებულია Global G.A.P.-ისა და GEO G.A.P.-ის სტანდარტით. პროდუქცია სრულად აკმაყოფილებს ევროპულ ხარისხსა და სურსათის უსაფრთხოების მოთხოვნებს. საქმიანობა ხორციელდება HACCP-ის სისტემის შესაბამისად.