Mastercard-მა იასემინ ბედირი აღმოსავლეთ ევროპის, ახლო აღმოსავლეთისა და აფრიკის (EEMEA) რეგიონის პრეზიდენტად დანიშნა. ახალ პოზიციაზე ის საქმიანობას 2026 წლის 1 სექტემბრიდან შეუდგება და Mastercard-ის მმართველ კომიტეტსაც შეუერთდება.

EEMEA Mastercard-ისთვის ერთ-ერთი ყველაზე მრავალფეროვანი და სწრაფად განვითარებადი რეგიონია, რომელიც 81 ქვეყანას, მათ შორის საქართველოსა და სომხეთს აერთიანებს. რეგიონში ციფრული გადახდების, ფინანსური ტექნოლოგიებისა და ინოვაციური სერვისების სწრაფი განვითარება Mastercard-ისთვის ახალი შესაძლებლობების შექმნას განაგრძობს.

ახალ პოზიციაზე იასემინ ბედირი უხელმძღვანელებს კომპანიის რეგიონულ სტრატეგიას და პასუხისმგებელი იქნება Mastercard-ის ბიზნესის შემდგომ განვითარებაზე. მისი საქმიანობის მნიშვნელოვანი მიმართულება იქნება ფინანსურ ინსტიტუტებთან, ფინტექ კომპანიებთან, ბიზნესებთან, სავაჭრო სექტორსა და საჯარო უწყებებთან პარტნიორობის გაძლიერება.

იასემინ ბედირს Mastercard-ში მუშაობის თითქმის 20-წლიანი გამოცდილება აქვს. ბოლო ოთხი წლის განმავლობაში ის აღმოსავლეთ ევროპის რეგიონის პრეზიდენტის პოზიციას იკავებდა და კომპანიის საქმიანობას რთულ და სწრაფად ცვალებად გეოპოლიტიკურ და მარეგულირებელ გარემოში ხელმძღვანელობდა.

Mastercard-ის Chief Business Officer-ის, საჩინ მეჰრას განცხადებით, იასემინ ბედირს გამოარჩევს ძლიერი ლიდერული ხედვა, გუნდების განვითარების უნარი და მომხმარებლებისა და ადგილობრივი ბაზრებისთვის რეალური ღირებულების შექმნაზე ორიენტირებული მიდგომა.

„EEMEA დიდი, მრავალფეროვანი და კომპლექსური რეგიონია. აქ წარმატებისთვის საჭიროა შემოქმედებითი აზროვნება, შედეგზე ორიენტირებული მიდგომა და ძლიერი პარტნიორული ურთიერთობების ჩამოყალიბების უნარი - სწორედ ის თვისებები, რომლებიც იასემინმა თავისი კარიერის განმავლობაში არაერთხელ გამოავლინა. ჩვენს მომხმარებლებსა და პარტნიორებთან ერთად გვაქვს შესაძლებლობა, მნიშვნელოვანი როლი შევასრულოთ იმაში, თუ როგორ გადაიხდიან, მიიღებენ და მართავენ ადამიანები და კომპანიები ფულს მომავალ წლებში“, - განაცხადა საჩინ მეჰრამ.

იასემინ ბედირი Mastercard-ს 2007 წელს შეუერთდა და მას შემდეგ კომპანიის სხვადასხვა მიმართულებასა და საერთაშორისო ბაზარზე მუშაობდა. ის იყო Mastercard-ის გენერალური მენეჯერი თურქეთსა და აზერბაიჯანში, მოგვიანებით კი ჩრდილოეთ ამერიკაში თითქმის ხუთი წლის განმავლობაში ფინანსურ ინსტიტუტებთან და გადახდების პროცესორებთან ურთიერთობის მიმართულებას ხელმძღვანელობდა.

„Mastercard-ის გუნდები ჩემთვის ყოველთვის შთაგონების წყარო იყო. მათი გამძლეობა, ინოვაციური აზროვნება და მუდმივი სწრაფვა, არა მხოლოდ უპასუხონ მომხმარებლების საჭიროებებს, არამედ გადააჭარბონ მათ მოლოდინებს, ჩვენი წარმატების მნიშვნელოვანი ფუნდამენტია. ჩვენ ერთად გავაგრძელებთ იმ ძლიერი საფუძვლის განვითარებას, რომელიც დიმიტრიოს დოსისის ხელმძღვანელობით რეგიონში ბოლო ხუთი წლის განმავლობაში შეიქმნა“, - განაცხადა იასემინ ბედირმა.

Mastercard-ში მოსვლამდე იასემინ ბედირი თურქეთის ფინანსურ სექტორში მუშაობდა და სხვადასხვა დროს HSBC-ში, Garanti Bank-სა და Yapı Kredi-ში ხელმძღვანელ პოზიციებს იკავებდა. ის ასევე Professional Women Network-ის (PWN) ერთ-ერთი დამფუძნებელია და აქტიურად უჭერს მხარს მცირე და საშუალო ბიზნესის განვითარებასა და პროფესიონალი ქალების გაძლიერებას.

ახალ პოზიციაზე ბედირი დიმიტრიოს დოსისს შეცვლის, რომელიც Mastercard-ის კომერციული გადახდების მიმართულების ხელმძღვანელად - Chief Commercial Payments Officer - დაინიშნა და Commercial & New Payment Flows მიმართულებას უხელმძღვანელებს.

საქართველო და სომხეთი Mastercard-ის რეგიონულ სტრატეგიაში

საქართველო და სომხეთი Mastercard-ის EEMEA რეგიონის ნაწილია და კომპანიისთვის მნიშვნელოვანი, დინამიკურად განვითარებადი ბაზრებია. ორივე ქვეყანაში Mastercard თანამშრომლობს ფინანსურ ინსტიტუტებთან, ფინტექ და ტექნოლოგიურ კომპანიებთან, ბიზნესთან და სხვა პარტნიორებთან, რათა ხელი შეუწყოს ციფრული გადახდების განვითარებას, ინოვაციური ტექნოლოგიების დანერგვასა და მომხმარებლებისთვის თანამედროვე ფინანსური სერვისების ხელმისაწვდომობას.

Mastercard-ის საქმიანობა საქართველოსა და სომხეთში სცდება მხოლოდ გადახდების ინფრასტრუქტურის განვითარებას და მოიცავს ისეთ მიმართულებებს, როგორებიცაა ფინანსური ინკლუზია და განათლება, მცირე და საშუალო ბიზნესის მხარდაჭერა, ტურიზმი, კულტურა, ციფრული ტრანსფორმაცია და ახალი ტექნოლოგიების დანერგვა.

იასემინ ბედირის ხელმძღვანელობით Mastercard გააგრძელებს რეგიონში პარტნიორებთან თანამშრომლობის გაძლიერებას და იმ ინიციატივების განვითარებას, რომლებიც ხელს უწყობს ციფრული ეკონომიკის ზრდას და მომხმარებლებისა და ბიზნესებისთვის ახალი შესაძლებლობების შექმნას.