რაჭა ტურისტებისთვის სულ უფრო მოთხოვნად მიმართულებად ყალიბდება. რეგიონში იზრდება განსხვავებული კონცეფციისა და თანამედროვე დიზაინის განთავსების ობიექტების მიმართ ინტერესიც. ერთ-ერთი ასეთი ახალი ობიექტი Racha Roots Boutique House-ია.

სასტუმროს კონცეფციის, სტუმრების მოთხოვნის, კონკურენტული უპირატესობებისა და სამომავლო გეგმების შესახებ Business Insider Georgia-ს Racha Roots Boutique House-ის დამფუძნებელი ნეიკო პეტრიაშვილი ესაუბრა.

„ჩვენი საოჯახო სასტუმრო ოჯახის სახლის ბაზაზე შეიქმნა - ეს ჩემი მეუღლის მშობლების სახლია, რომლის გადაკეთებაც გადავწყვიტეთ და პატარა საოჯახო სასტუმროდ ვაქციეთ.

ამ ეტაპზე სასტუმრო 4 ნომერს აერთიანებს. ის ბუტიკური სტილისაა და, ვფიქრობ, რაჭაში მსგავსი დიზაინისა და კონცეფციის ობიექტი არც არის. სივრცე თანამედროვე და კომფორტულია, ყველა საჭირო პირობით. თითოეულ ნომერს აქვს საკუთარი აივანი და ულამაზესი ხედები.

რაც შეეხება მოთხოვნას, რაჭა ბოლო პერიოდში საკმაოდ მოთხოვნადი და მიმზიდველი მიმართულება გახდა. ჩვენ სასტუმრო ცოტა გვიან, აგვისტოს ბოლოს გავხსენით, თუმცა აგვისტოში მოთხოვნა ძალიან მაღალი იყო. ამჟამად მოთხოვნა შედარებით შემცირებულია, ამიტომ ვფიქრობ, რომ ჩვენი მიმართულება უფრო სეზონური იქნება. სტუმრების უმეტესობა ამ ეტაპზე ადგილობრივი ტურისტია.

ჩვენი მთავარი კონკურენტული უპირატესობა დიზაინი და კონცეფციაა. ეს არ არის ტრადიციული ხის სახლი - სასტუმრო თანამედროვე, კომფორტული და მყუდრო სივრცეა, რაც სტუმრებმაც არაერთხელ აღნიშნეს. ამასთან, ჩვენთვის მნიშვნელოვანია სტუმრებისთვის მაღალი დონის სერვისის შეთავაზება.

სამომავლოდ სასტუმროს გაფართოება გვსურს და იმედი გვაქვს, რომ ამის განხორციელებასაც შევძლებთ“, - აცხადებს ნეიკო პეტრიაშვილი.