იუსტიციის სახლი ბიზნესის მხარდაჭერას ბიზნესასისტენტის პროექტით აძლიერებს. ტელეკომპანია „მაესტროს“ ეთერში გადაცემა Business Insider Georgia-ში ​სტუმრობისას იუსტიციის სახლის თავმჯდომარემ ვახტანგ ჟვანიამ აღნიშნა, რომ სატესტო რეჟიმში უკვე ჩართულია რამდენიმე ათეული კომპანია, პროექტი კი მიზნად ისახავს ბიზნესისთვის დროის დაზოგვასა და სერვისებზე მარტივი წვდომის უზრუნველყოფას.

„იუსტიციის სახლი არის ის დაწესებულება, რომელსაც ძალიან აქტიური კომუნიკაცია აქვს ბიზნესთან და ჩვენ არაერთი შეხვედრა დაგვიორგანიზებია, სადაც ხდება განხილვა იმ საკითხების, რაც აწუხებს ბიზნესს. ბუნებრივია, ბიზნესისთვის ყველაზე მნიშვნელოვანი ნაწილი არის დრო. აქედან გამომდინარეც გაჩნდა ბიზნესასისტენტის პროექტის არსებობის საჭიროება. ჩვენ პირველ ეტაპზე სატესტო რეჟიმში ახლა უკვე ჩავუშვით ეს პროექტი. რამდენიმე ათეული კომპანია არის ჩართული ამ პროექტის განხორციელებაში. მათგან, რა თქმა უნდა, გვაქვს უკუკავშირი და ამ უკუკავშირის საფუძველზე ხდება ამ პროექტის დახვეწა და სრულყოფა, მაგრამ ერთი რამ თამამად შემიძლია გითხრათ, რომ ამ პროექტმა გაამართლა, იმიტომ რომ ორიენტირებულია ბიზნესის ინტერესების დაცვაზე. უზოგავს დროს და აძლევს ყველანაირ შესაძლებლობას იმისა, რომ ძალიან მარტივად ჰქონდეს წვდომა იმ სერვისებზე, რომელიც ხელმისაწვდომია იუსტიციის სახლებში. ბუნებრივია ეს არ გახლავთ ბოლო წერტილი ჩვენი ამ მიმართულებით განვითარებისა. უახლოეს მომავალში რა თქმა უნდა დაიგეგმება სხვა შეხვედრები ბიზნესთან, იქ იქნება განხილული თუნდაც ბიზნესასისტენტის პროექტი და ასევე სხვა საჭიროებებზე გვექნება საუბარი და ბუნებრივია ამის საფუძველზე იუსტიციის სახლი გადადგამს შესაბამის ნაბიჯებს“, - აღნიშნა ვახტანგ ჟვანიამ.