ჩვენი მთავარი ფოკუსი საექსპორტო ბაზრების გაფართოებაზეა“, - ამის შესახებ Business Insider Georgia-ს დასალევი ხილ-ბოსტნეულის ქართული ბრენდის „კეთილი და პატიოსანის“ წარმომადგენელმა, იოსებ მანჯავიძემ, განუცხადა.

„ჩვენი მთავარი ფოკუსი საექსპორტო ბაზრების გაფართოებაზეა. ამ ეტაპზე განსაკუთრებულ ინტერესს ისრაელის ბაზარი იჩენს, რასაც მნიშვნელოვნად უწყობს ხელს ის ფაქტი, რომ პროდუქცია საერთაშორისო სტანდარტებს სრულად აკმაყოფილებს. დანერგილი გვაქვს ISO-სა და HACCP-ის სტანდარტები, ასევე ვფლობთ კოშერის სამი კატეგორიის სერტიფიკატსა და ჰალალის სერტიფიკატს, რომელიც განსაკუთრებით მნიშვნელოვანია აზიის ბაზრებზე ოპერირებისთვის. პარალელურად, აქტიურად ვაგრძელებთ მუშაობას ამერიკის ბაზარზეც.

პარალელურად, ახალ საექსპორტო მიმართულებებსაც ვამატებთ. ამჟამად, ვმუშაობთ ახალი ეტიკეტის დიზაინზე და უახლოეს პერიოდში ყაზახეთის ბაზარზე ვგეგმავთ შესვლას. ასევე, ჩინურ მხარესთან მოლაპარაკებებს ვაწარმოებთ. მათი მოთხოვნით, პროდუქციის პლასტმასის შეფუთვაში ჩამოსხმაზე ვმუშაობთ, რადგან შუშის შეფუთვა ტრანსპორტირებისას უფრო მძიმე და ძვირადღირებულია“, - აცხადებს სოსო მანჯავიძე.

კომპანია ადგილობრივ ბაზარზეც აქტიურად ფართოვდება და სამომავლოდ ასორტიმენტის ზრდასაც გეგმავს.

„რაც შეეხება ადგილობრივ ბაზარს, აქტიურად ვაფართოებთ სადისტრიბუციო ქსელს. განსაკუთრებით გაიზარდა ჩვენი წარმომადგენლობა „ნიკორას“ ქსელში - თუ აქამდე ყველა ქსელში არ ვიყავით წარმოდგენილი, ახლა ეს მიმართულება მნიშვნელოვნად გავაძლიერეთ.

პროდუქციის განვითარებაზეც აქტიურად ვმუშაობთ. ამ ეტაპზე ახალი გემოების რამდენიმე კონცეპტუალური ვერსია უკვე მზადების პროცესშია, თუმცა ისინი ჯერ წარმოებაში არ ჩაგვიშვია და ბაზრისთვის არ შეგვითავაზებია. ამჟამად ჩვენი ასორტიმენტი მოიცავს სმუზის 6, ნექტრის 6 და სოუსების 7 სახეობას, ხოლო უახლოეს მომავალში მომხმარებლებს ახალ პროდუქტებსა და გემოებსაც შევთავაზებთ“, - აღნიშნავს კომპანიის წარმომადგენელი.

ინფორმაციისთვის, პროდუქცია გურჯაანში, სოფელ ჩუმლაყში კომპანია „ქართული აგროპროდუქტის" საწარმოში მზადდება.