2026 წლის პირველი ნახევარი „ხომლისთვის“ ადგილობრივ ბაზარზე პოზიციების გაძლიერებისა და განვითარების მიმართულებით მნიშვნელოვანი აღმოჩნდა. როგორც „ხომლის“ მარკეტინგის ხელმძღვანელი, თათა დიდებაშვილი, აღნიშნავს, წლის მეორე ნახევარში კომპანიის მთავარი ფოკუსი ქსელების გაფართოება, ასორტიმენტის გაზრდა და ახალი პროდუქტის - „ფერილის“ მომხმარებლისთვის შეთავაზება იქნება.

როგორ შეაფასებდით „ხომლის" 2026 წლის პირველ 6 თვეს - რა არის ის მთავარი შედეგები და მიღწევები, რომლითაც ამ პერიოდს გამოარჩევდით?

2026 წლის პირველი ნახევარი „ხომლისთვის" მართლაც გამორჩეული და სტრატეგიულად მნიშვნელოვანი ეტაპი აღმოჩნდა. ამ პერიოდის მთავარი მიღწევა ადგილობრივ ბაზარზე ჩვენი პოზიციების მკვეთრი გამყარება და ხელმისაწვდომობის ზრდაა. წარმატებით დავასრულეთ მოლაპარაკებები და სრულფასოვნად შევედით ორ უმსხვილეს სავაჭრო ქსელში. დღეს, „ხომლის" პროდუქცია უკვე წარმოდგენილია „კარფურის" ჰიპერმარკეტებსა და სუპერმარკეტებში, ასევე, „ნიკორას" ფართო ქსელში, რაც გვაძლევს საშუალებას, კიდევ უფრო ახლოს ვიყოთ ჩვენს ერთგულ მომხმარებელთან.

როგორ შეიცვალა მოთხოვნა პროდუქტებზე 2026 წლის პირველ ნახევარში? რომელი პროდუქტები გამოირჩეოდა ყველაზე მაღალი მოთხოვნით და რა ტენდენციებს ხედავთ მომხმარებლის ინტერესში?

გაყიდვების მაჩვენებლები და მომხმარებელთა უკუკავშირი ცხადყოფს, რომ ბრენდის მიმართ ნდობა ყოველდღიურად მზარდია. მოთხოვნის კუთხით, ტრადიციულად მყარ პოზიციებს ინარჩუნებს ჩვენი ტოპ-ხაზი: სვანური მარილი, მშრალი აჯიკა და შავი პილპილი.

ამასთან, განსაკუთრებული ტენდენცია გამოიკვეთა სადღესასწაულო პერიოდში - ჩვენმა სააღდგომო პროდუქციამ მომხმარებლის მხრიდან უპრეცედენტოდ დიდი მოწონება დაიმსახურა, რამაც კიდევ ერთხელ დაგვანახა, რომ ბაზარზე მაღალხარისხიან, სუფთა და ტრადიციულ პროდუქტებზე მოთხოვნა სტაბილურად იზრდება.

რა შედეგები აქვს კომპანიას საერთაშორისო ბაზრებზე გასვლის მიმართულებით და რომელ ბაზრებზე გეგმავთ გაფართოებას 2026 წლის დარჩენილ პერიოდში?

საერთაშორისო ბაზრებზე პოზიციონირება ჩვენი განვითარების ერთ-ერთი უმთავრესი პრიორიტეტია.

გაზაფხულზე, ბაქოში გამართულ საერთაშორისო მასშტაბურ ფორუმებზე - Caspian Agro და InterFood Azerbaijan - „ხომლის" სტენდმა და პროდუქციამ უდიდესი ინტერესი გამოიწვია. ამან რეგიონული პარტნიორობის გაღრმავებას მნიშვნელოვნად შეუწყო ხელი. დღესდღეობით, აქტიურ მოლაპარაკებებსა და თანამშრომლობის პროცესში ვართ ისეთ სტრატეგიულ ბაზრებთან, როგორებიცაა: ჩეხეთი, აზერბაიჯანი, ბალტიისპირეთის ქვეყნები, ისრაელი, ამერიკის შეერთებული შტატები და მეზობელი ქვეყნები.

რა არის „ხომლის" მთავარი ფოკუსი 2026 წლის დარჩენილ პერიოდში და როგორი მოლოდინი გაქვთ წლის საბოლოო შედეგებთან დაკავშირებით?

წლის ბოლომდე საკმაოდ ამბიციური და მასშტაბური გეგმები გვაქვს. ჩვენი სტრატეგია რამდენიმე ძირითად მიმართულებას ეფუძნება:

ქსელების გაფართოება: დასკვნით ეტაპზეა მოლაპარაკებები 3 მსხვილ სავაჭრო ქსელთან, რაც ფაქტობრივად გადაწყვეტილია. ეს ნიშნავს, რომ „ხომლი" საქართველოს მასშტაბით დამატებით 1000-მდე ახალ ობიექტში იქნება წარმოდგენილი.

პროდუქციის დივერსიფიკაცია: ვმუშაობთ არსებულ ქსელებში ასორტიმენტის გამრავალფეროვნებაზე. ამ ეტაპზე ჩვენი საფქვავიანი სუნელები მხოლოდ „ნიკორაში" იყიდება, წლის ბოლომდე კი სხვა ქსელებსაც დაემატება. გარდა ამისა, ვგეგმავთ ჩვენი პრემიუმ მიმართულების - მინის ეკომეგობრულ ქილებში მოთავსებული 33 სახეობის სუნელის - მსხვილ სუპერმარკეტებში სრულად ინტეგრირებას.

ინოვაციური პროდუქტის ჩაშვება: ყველაზე გამორჩეული სიახლე ჩვენი ახალი, ექსკლუზიური ბრენდის - „ფერილი"-ს ბაზარზე ჩაშვებაა. ეს არის ფერადი კულინარიული მარილების უნიკალური სერია, რომელიც ქართული გასტრონომიული ბაზრისთვის აბსოლუტურ სიახლეს წარმოადგენს და დარწმუნებულები ვართ, მომხმარებელში ძალიან დიდ ინტერესს გამოიწვევს.