აჭარის ოთხივე სეზონზე ტურისტულად მიმზიდველ მიმართულებად ჩამოყალიბების პროცესი წარმატებით გრძელდება, – ამის შესახებ Business Insider Georgia-ს აჭარის მთავრობის თავმჯდომარემ სულხან თამაზაშვილმა განუცხადა. მისი თქმით, ამ პროცესში კურორტ „გოდერძის“ განვითარებას განსაკუთრებული მნიშვნელობა აქვს.

„კურორტ „გოდერძიზე“ ზამთრის ტურისტული სეზონი აქტიურად მიმდინარეობს. აღსანიშნავია, რომ ზოგადად მაღალმთიან აჭარაში ტურისტული სერვისებისა და ინფრასტრუქტურის განვითარების მიმართულებით დადებითი დინამიკა გვაქვს. 2025 წელს მთიან აჭარაში ვიზიტორთა რაოდენობამ ნახევარ მილიონს მიაღწია. კურორტ „გოდერძიზე“ ვიზიტორთა რაოდენობა წინა წელთან შედარებით კი საშუალოდ 19 პროცენტით გაიზარდა. კურორტის პოპულარობა მზარდია, როგორც ადგილობრივ, ისე უცხოელ ვიზიტორთა შორის.

ეს სტატისტიკური მონაცემები გვაძლევს იმის თქმის საშუალებას, რომ აჭარის ოთხივე სეზონზე ტურისტულად მიმზიდველ მიმართულებად ჩამოყალიბება წარმატებით გრძელდება.

ამ პროცესში ძალიან მნიშვნელოვანია კურორტ „გოდერძის“ განვითარება, მათ შორის სასტუმრო ინფრასტრუქტურის მიმართულებით. აღსანიშნავია, რომ  ზამთრის მიმდინარე ტურისტულ სეზონზე რამდენიმე ახალი ობიექტი გაიხსნა. 

დღეს არსებული სასტუმროები, კოტეჯები და საოჯახო ტიპის განთავსების ობიექტები აქტიურად არის დატვირთული, რაც კიდევ ერთხელ ადასტურებს კურორტის მზარდ მოთხოვნასა და ტურისტულ პოტენციალს.

მაღალმთიანი აჭარის განვითარების მიმართულებით განხორციელებული პროექტები და დაგეგმილი ინიციატივები წარმოადგენს სახელმწიფოს გრძელვადიანი ხედვის განუყოფელ ნაწილს. აღნიშნული პოლიტიკა მიზნად ისახავს რეგიონის გაძლიერებას, ტურიზმის მდგრად განვითარებას და ადგილობრივი მოსახლეობისთვის დამატებითი ეკონომიკური შესაძლებლობების შექმნას“, - განაცხადა Business Insider Georgia-სთან სულხან თამაზაშვილმა.