kursi.ge-მ ჩვენი ქვეყნის მოქალაქეებს 350 მილიონი ლარი დაუზოგა, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას საქართველოს ინოვაციების და ტექნოლოგიების სააგენტოს თავმჯდომარემ, ავთანდილ კასრაძემ განაცხადა.

„ზოგადად, რაღა თქმა უნდა, GITA-ს უკვე ძალიან წარმატებული სტარტაპეკოსისტემა აქვს დღეს ქვეყანაში.

თავს ვიკავებ ხოლმე კონკრეტული სტარტაპების ჩამოთვლისგან, განსაკუთრებით, როცა ვსაუბრობთ შემოსავლებზე, ინვესტიციებზე, იმიტომ, რომ ეს არის კონფიდენციალური. ჩვენ მთლიანად შემიძლია გითხრათ, რომ 800 მილიონს აღემატება უკვე სტარტაპების მიერ დაგენერირებული კერძო კაპიტალი, რაც არის უდიდესი ეფექტი ჩვენი ქვეყნის ეკონომიკაში, თუმცა თვითონ სხვა კუთხით ეკონომიკური ეფექტი, რომელიც ჩვენი ქვეყნის მოქალაქეებმა მიიღეს, არანაკლებ მნიშვნელოვანია.

მაგალითად, მინდა გამოვყო kursi.ge, რომელიც ჩვენს მიერ დაფინანსებული ინოვაციური პლატფორმაა, რამაც ჩვენი დაფინანსების შემდეგ 350 მილიონი ლარი დაუზოგა ჩვენი ქვეყნის მოქალაქეებს. ანუ ვალუტის გადახურდავებისას 350 მილიონზე ნაკლები დაუჯდათ, ვიდრე მათ დაუჯდებოდათ, ეს ქართული სტარტაპი რომ საქართველოში არ ყოფილიყო.

GITA-ს დაფინანსებულმა ერთმა ლარმა 2300 ლარის ეფექტი გააკეთა ჩვენი ქვეყნის ეკონომიკაში.

ასევე მინდა ფაგების მიმართულება გამოვყო - ბიოქიმფარმი, რომელიც სრულიად ინოვაციურ ტექნოლოგიურ პროდუქტს ქმნის, რომელიც ანტიბიოტიკების ჩამნაცვლებელი უნდა გახდეს მთელ მსოფლიოში. უკვე 10-ზე მეტ ქვეყანაში ყიდიან პროდუქტს და მათ შორის ფაგები ჩვენი ქვეყნის მოსახლეობისთვის ძალიან ნაცნობი თემაა, იქედან გამომდინარე, რომ რამდენიმე ათეული წელია უკვე საქართველოში ბაზარზეა. კიდევ უფრო მეტი ინოვაცია და ტექნოლოგიური განვითარება ამ პროცესში...

ასევე მინდა აღვნიშნო CityPay.io, რომელიც ფინანსურ ტექნოლოგიებში არის ძალიან წარმატებული, ასევე კარგონი ლოჯისტიკაში. მოგეხსენებათ, შუა დერეფანი რამდენად მნიშვნელოვანია და კიდევ უფრო დიდ მნიშვნელობას იძენს. აქ უკვე ინოვაციები და ტექნოლოგიები კიდევ უფრო აჩქარებს ამ პროცესს და კიდევ უფრო მიმზიდველს ხდის საერთაშორისო ინვესტიციებისთვის. უკვე რამდენიმე ათეული მილიონი არის ბრუნვა ჩვენი ქვეყნის შიდა ეკონომიკაში ამ ციფრული ტექნოლოგიებით, რომლებიც გამოიყენება ლოჯისტიკის სფეროში.

შესაბამისად, ეს ყველაფერი, რაღა თქმა უნდა, ერთობლიობაში ქმნის ჩვენი ქვეყნის ეკოსისტემას, იმიტომ, რომ არის ხოლმე ზოგადად ასეთი არასწორი აღქმა, რომ აი, ეს სტარტაპები სხვა ქვეყნებისთვის ქმნიან პროდუქტს და საერთაშორისო ბაზრებზე გადიან - საქართველოს რა? აქ არის კონკრეტულად სტარტაპების მნიშვნელოვანი შედეგი, რომელიც ჩვენი ქვეყნის ეკონომიკამ და ჩვენი ქვეყნის მოსახლეობამ მიიღო“, - აცხადებს ავთანდილ კასრაძე.