„უნიკი“ ქართული ბრენდია, რომელიც პატარებისთვის კომფორტულ სამოსსა და ფეხსაცმელს ქმნის და ბაზარზე უკვე 7 წელია ოპერირებს. კომპანია მომხმარებელთა მოთხოვნის შესაბამისად ავითარებს ასორტიმენტს, განსაკუთრებულ ყურადღებას უთმობს საზეიმო სამოსის მიმართულებას და სამომავლოდ შოურუმისა და მასტერკლასების სივრცის მოწყობას გეგმავს. ამის შესახებ Business Insider Georgia-ს ბრენდის დამფუძნებელმა, მაგდა ზაქარიაშვილმა განუცხადა.

„თავდაპირველად პატარა ასაკის ბავშვებისთვის განკუთვნილ ტანსაცმელს ვკერავდით - ძირითადად კომბინიზონებსა და ბოდეებს. თუმცა, მომხმარებელთა მოთხოვნამ გვაჩვენა, რომ ინტერესი შედარებით დიდი ასაკის ბავშვებისთვის განკუთვნილ სამოსზეც იყო, რის შემდეგაც უფრო აქტიურად განვავითარეთ გამოსასვლელი და საზეიმო ტანსაცმლის მიმართულება. დღეს სწორედ ეს ხაზი გამოირჩევა მაღალი მოთხოვნითა და გაყიდვებით.

თავიდან ძირითადად ბამბის ქსოვილებს ვიყენებდით და ისეთ სამოსს ვქმნიდით, რომლის ჩაცმაც ბავშვს როგორც სახლში, ისე გარეთ შეეძლო. ამ მიმართულებას კვლავ ვინარჩუნებთ, თუმცა ამჟამად უფრო მეტად საზეიმო ტანსაცმელზე ვართ ორიენტირებული. შეკვეთებს ხშირად ვიღებთ საბავშვო ბაღის ღონისძიებებისთვის, კონცერტებისთვის, დაბადების დღეებისა და სხვა განსაკუთრებული შემთხვევებისთვის.

ჩინური ბაზრის გააქტიურების შემდეგ მსგავსი პროდუქციის გაყიდვები გარკვეულწილად შემცირდა, რადგან მომხმარებლებს ტანსაცმლის შედარებით ხელმისაწვდომ ფასად გამოწერის შესაძლებლობა გაუჩნდათ. ამ პირობებში მნიშვნელოვანია მათ ისეთი პროდუქტი შევთავაზოთ, რომელიც ინდივიდუალური დიზაინითა და ექსკლუზიურობით გამოირჩევა. ვფიქრობ, ამ მიმართულების განვითარება წარმატებით შევძელით - გასულ და მიმდინარე წელს არაერთ საბავშვო ბაღთან ვითანამშრომლეთ და საზეიმო ღონისძიებებისთვის განკუთვნილი სამოსი შევკერეთ.

პროდუქციის გამორჩეულობისთვის ქსოვილების ნაწილს საზღვარგარეთიდან ექსკლუზიურად ვიწერთ, ნაწილს კი ადგილობრივ ბაზარზე ვყიდულობთ. უცხოელი მომწოდებლებისგან ისეთი მასალებიც ჩამოგვაქვს, რომლებიც ჩვენს კოლექციებს ინდივიდუალურობას სძენს და მომხმარებლებისთვის განსხვავებული დიზაინის შეთავაზების შესაძლებლობას გვაძლევს“, - აცხადებს ბრენდის დამფუძნებელი.

სამომავლოდ „უნიკი“ არსებული სივრცის სრულფასოვან შოურუმად გარდაქმნასა და მასტერკლასების მიმართულების განვითარებას გეგმავს.

„მომხმარებლებს გამრეკელის მისამართზე ვიღებთ, ხოლო თარხნიშვილის ქუჩაზე მდებარე ატელიეში მათ ზომების აღებისა და ტანსაცმლის ადგილზე დათვალიერების შესაძლებლობა აქვთ. სამომავლოდ გვინდა, არსებული სივრცე სრულფასოვან შოურუმად ვაქციოთ, სადაც ვიზიტორები პროდუქციის ნახვასა და მზა სამოსის შეძენასაც შეძლებენ. ასევე, ვგეგმავთ ტანსაცმლის გარკვეული მარაგის შექმნას და მასტერკლასების მიმართულების განვითარებას.

ბავშვები, რომლებიც ატელიეში ზომების ასაღებად ან ტანსაცმლის მოსარგებად მოდიან, ხშირად სივრციდან წასვლას აღარ ჩქარობენ. ეს გვაძლევს მოტივაციას, მათთვის შემოქმედებითი და სახალისო აქტივობებიც შევქმნათ. გვინდა, შოურუმი მყუდრო და საინტერესო სივრცედ ჩამოვაყალიბოთ, სადაც ბავშვებს მასტერკლასებში მონაწილეობის შესაძლებლობა ექნებათ.

გარდა ამისა, მომხმარებლებს ფოტოსესიის სერვისსაც ვთავაზობთ. ფოტოგადაღება ჩვენს სივრცეში იმართება, ბავშვებისთვის ჩვენს ტანსაცმელს ვარჩევთ, ფოტოებს კი ჩვენი ფოტოგრაფი იღებს. ამ სერვისის განვითარებას მომავალშიც ვგეგმავთ“, - ამბობს მაგდა ზაქარიაშვილი.