Loomba განვითარების ახალ ეტაპზე გადადის - ბრენდი Food Lab-ის გახსნას გეგმავს
Loomba ქართული ჯანსაღი კვების ბრენდია, რომელიც 2022 წელს შეიქმნა და მომხმარებელს ბუნებრივი ინგრედიენტებით დამზადებულ ჯანსაღ სნექებს სთავაზობს. ბრენდის განვითარების, პროდუქციის ასორტიმენტისა და სამომავლო გეგმების შესახებ Business Insider Georgia-ს Loomba-ს თანადამფუძნებელი და დირექტორი, მაშო იოსელიანი ესაუბრა.
როგორია კომპანიის საქმიანობის სპეციფიკა, როდიდან ოპერირებთ ბაზარზე და რას სთავაზობთ მომხმარებელს?
Loomba ქართული ჯანსაღი კვების ბრენდია, რომელიც 2022 წელს შევქმენით ერთი მარტივი იდეით - ყოველდღიურ ცხოვრებაში ადამიანებს არ უნდა უწევდეთ არჩევანის გაკეთება გემოსა და ხარისხს შორის.
დატვირთულ რეჟიმში ხშირად ყველაზე მარტივი არჩევანი ყველაზე ნაკლებად სასარგებლოცაა. სწორედ ამიტომ დავიწყეთ ისეთი პროდუქტების შექმნა, რომლებიც მზადდება ბუნებრივი ინგრედიენტებით, აქვს კარგი კვებითი ღირებულება, მარტივად ერგება თანამედროვე, დატვირთულ ყოველდღიურობას და რაც ყველაზე მნიშვნელოვანია, ნამდვილად გემრიელია.
დღეს Loomba-ს პროდუქცია წარმოდგენილია ქვეყნის წამყვან სავაჭრო ქსელებში, სპეციალიზებულ მაღაზიებში, კაფეებსა და ფიტნესცენტრებში. თუმცა თავიდანვე ჩვენი მიზანი მხოლოდ სნექების წარმოება არ ყოფილა. გვინდოდა შეგვექმნა ბრენდი, რომელიც ადამიანებს ყოველდღიურად უკეთესი არჩევანის გაკეთებას გაუმარტივებს.

როგორია მიმდინარე პროდუქციის ასორტიმენტი და რა პრინციპებით ქმნით პროდუქტებს?
დღეს Loomba-ს ასორტიმენტი აერთიანებს ენერგეტიკულ ბურთებს, შვრიის ბარებსა და გრანოლას. თუმცა ჩვენთვის პროდუქტის შექმნა ინგრედიენტების შერჩევით არ იწყება, არამედ იწყება კითხვით: გვექნებოდა თუ არა სურვილი, ეს პროდუქტი ყოველდღიურად მიგვერთვა?
ვიყენებთ მხოლოდ ბუნებრივ და ხარისხიან ინგრედიენტებს, ხელოვნური დანამატებისა და რაფინირებული შაქრის გარეშე. ჩვენი პროდუქტები მდიდარია ბუნებრივი ცილებით, უჯრედისითა და ჯანსაღი ცხიმებით. მაგალითად, ენერგეტიკული ბურთები მზადდება ფინიკისა და თხილეულისგან, არ შეიცავს დამატებულ შაქარს და სრულად მცენარეულია.
ჩვენთვის ხარისხი მხოლოდ გემოთი არ განისაზღვრება. სწორედ ამიტომ წარმოებაში დანერგილი გვაქვს სურსათის უვნებლობის საერთაშორისო სტანდარტი ISO 22000:2018, რომელიც თითოეული პროდუქტის უსაფრთხოებასა და სტაბილურ ხარისხს უზრუნველყოფს.

რა გამოარჩევს Loomba-ს კონკურენტულ გარემოში და რა არის ბრენდის მთავარი ღირებულება?
დღეს ბაზარზე არაერთი ჯანსაღი პროდუქტი არსებობს, თუმცა ხშირად ადამიანები ფიქრობენ, რომ თუ პროდუქტი ჯანსაღია, აუცილებლად ნაკლებად გემრიელიც იქნება. ჩვენ თავიდანვე გვინდოდა ამ წარმოდგენის შეცვლა.
გვჯერა, რომ ადამიანს არ უნდა უწევდეს არჩევანის გაკეთება გემოსა და ჯანსაღ კვებას შორის. Loomba-ში თითოეული პროდუქტი იქმნება ისე, რომ ერთდროულად იყოს ბუნებრივი, კვებითად დაბალანსებული და ისეთი გემოს მქონე, რომლის გამოც მომხმარებელი ისევ დაგვიბრუნდება.
სწორედ ამიტომ ჩვენი მთავარი ღირებულება ჯანსაღი არჩევანის გამარტივებაა - გვინდა, უკეთესი არჩევანი ადამიანებისთვის ყველაზე ბუნებრივი და ყოველდღიური არჩევანი გახდეს.

რა გეგმები გაქვთ კომპანიის განვითარებისთვის და რას უნდა ელოდოს მომხმარებელი?
უახლოეს პერიოდში ვაგრძელებთ ასორტიმენტის გაფართოებას, ახალ პროდუქტებზე მუშაობასა და გაყიდვის არხების განვითარებას.
თუმცა ჩვენი ყველაზე მნიშვნელოვანი სიახლე წელს Food Lab by Loomba იქნება - სივრცე, სადაც Loomba-ს იდეა გაცილებით ფართოდ გაცოცხლდება. აქ მომხმარებელს მხოლოდ ჩვენი სნექები აღარ დახვდება. შევთავაზებთ საუზმეს, ლანჩს, დესერტებსა და სხვა კერძებს, რომლებიც იმავე ფილოსოფიას დაეფუძნება, რაზეც ბრენდი შევქმენით - ბუნებრივი ინგრედიენტები, დაბალანსებული შემადგენლობა და ისეთი გემო, რომელიც კომპრომისს არ მოითხოვს.

ჩვენთვის ეს უბრალოდ კაფის გახსნა არ არის. ეს არის შემდეგი ნაბიჯი Loomba-ს განვითარებაში. შესაძლებლობა, ადამიანებს ყოველდღიური ჯანსაღი კვების გამოცდილება სრულყოფილი ფორმით შევთავაზოთ.
გრძელვადიან პერსექტივაში კი ჩვენი მიზანია წარმოების მასშტაბის გაზრდა, საქართველოს მასშტაბით გაფართოება და ეტაპობრივად საერთაშორისო ბაზრებზე გასვლა.
სხვა სიახლეები
10 000-ზე მეტი მომხმარებელი ერთ თვეში - როგორ ცვლის JAVIC ავტომობილის მოვლის წესს
16.11.2026.10:00
JAVIC ქართული ავტოტექ პლატფორმაა, რომელიც ავტომობილის მართვასა და მოვლასთან დაკავშირებულ სერვისებს ერთ ციფრულ სივრცეში აერთიანებს. კომპანიას ბოლო ერთი თვის განმავლობაში 10 000-ზე მეტი მომხმარებელი ჰყავდა. პლატფორმის განვითარების, ახალი ფუნქციებისა და სამომავლო გეგმების შესახებ Business Insider Georgia-ს JAVIC-ის თანადამფუძნებელი და დირექტორი ვატო ფაჩულია ესაუბრა.
რა სიახლეები აქვს JAVIC-ს ამ ეტაპზე და რა მიმართულებით ვითარდება კომპანია?
JAVIC-ის შექმნისას ერთი მარტივი კითხვა გვქონდა: რატომ უნდა ეძებოს მძღოლმა თავისი მანქანის შესახებ ინფორმაცია სხვადასხვა ადგილას? ჯარიმას ერთგან ამოწმებ, ტექდათვალიერების თარიღს სხვაგან ეძებ, ზეთი ბოლოს როდის შეცვალე კი შეიძლება საერთოდ აღარ გახსოვდეს. თავიდანვე გვინდოდა, ეს ყველაფერი ერთ აპლიკაციაში მოგვეყარა და მანქანის მოვლა უფრო მარტივი გაგვეხადა.
დღეს JAVIC-ში შეგიძლია დაამატო შენი ავტომობილი, აკონტროლო ჯარიმები და ტექდათვალიერების ვადები, შეინახო სერვისის ისტორია და კითხვები AI ასისტენტს დაუსვა. თუ მანქანის შეძენას აპირებ, VIN კოდით მის ისტორიასაც შეამოწმებ. ჩვენი ამბიციაა, JAVIC საქართველოში ავტომობილის ციფრული მოვლის წამყვანი პლატფორმა გახდეს - როგორც ერთი მანქანის მფლობელისთვის, ისე კომპანიებისთვის, რომლებიც მთელ ავტოპარკს მართავენ.

როგორ განვითარდა სერვისების ერთ სივრცეში გაერთიანების იდეა და რა დაემატა პლატფორმას?
დღეს შეგიძლია ნახო, გაქვს თუ არა გადაუხდელი ჯარიმა და როდემდე შეგიძლია მისი შეღავათით გადახდა. ტექდათვალიერების ვადის მოახლოებისას აპლიკაცია შეგახსენებს, რომ თარიღი არ გამოგრჩეს. შეგიძლია ჩაინიშნო ისიც, როდის შეცვალე ძრავის ან გადაცემათა კოლოფის ზეთი.
სერვისების აღრიცხვას მანქანის გაყიდვის დროსაც აქვს ფასი: მფლობელს შეუძლია JAVIC-ში შექმნილი სერვისის ისტორიის დოკუმენტი მყიდველს გაუზიაროს და აჩვენოს, რა სამუშაოები ჩაუტარდა მანქანას და როდის. ასე მყიდველისთვის უფრო გამჭვირვალე ხდება, როგორ უვლიდნენ ავტომობილს საქართველოში ყოფნის პერიოდში. ეს იმავე პრინციპს ემყარება, რასაც საერთაშორისო პრაქტიკაში დოკუმენტირებული სერვისის ისტორია.
აპში შეგიძლია გადაამოწმო საწვავის ფასები, რუკაზე კი მოძებნო ელექტროდამტენები და ახლომდებარე ავტოსერვისები. გვაქვს AI ასისტენტიც. მაგალითად, თუ დაფაზე უცნობი ინდიკატორი აინთო, შეგიძლია პირდაპირ JAVIC-ს ჰკითხო, რას შეიძლება ნიშნავდეს და რა გადაამოწმო პირველ რიგში.
როგორ გაიზარდა მომხმარებლებისა და პარტნიორების რაოდენობა და რაზეა ყველაზე მაღალი მოთხოვნა?
ბოლო ერთ თვეში JAVIC-ს 10 000-ზე მეტი მომხმარებელი ჰყავდა და მათი რაოდენობა ყოველდღიურად იზრდება. ჩვენთვის ეს კარგი სიგნალია: პრობლემა, რომლის გამოც JAVIC შევქმენით, ბევრ მძღოლს აქვს.
ავტომობილის ისტორიის შემოწმებაში უკვე 10-ზე მეტ იურიდიულ პირს ვემსახურებით. JAVIC-ის სერვისებს აქტიურად იყენებენ ტაქსის კომპანიები, ავტოპარკების მმართველები და სხვა ბიზნესები, რომლებსაც სამი ან მეტი ავტომობილი ჰყავთ. როცა რამდენიმე მანქანაზე ხარ პასუხისმგებელი, თითოეულის ჯარიმების, ტექდათვალიერებისა და სერვისის ვადების ცალ-ცალკე კონტროლს დრო მიაქვს. ერთ სივრცეში მათი ნახვა ამ საქმეს ამარტივებს.
გამოყენების ორი ძირითადი სცენარი იკვეთება: ყიდვამდე მომხმარებელს მანქანის ისტორიის შემოწმება სჭირდება, ყიდვის შემდეგ კი ჯარიმების, ტექდათვალიერებისა და სერვისების კონტროლი. კონკრეტულად რომელ ფუნქციას იყენებენ ყველაზე ხშირად, ზუსტ მონაცემებს მოგვიანებით გავაზიარებთ.
რა გეგმები აქვს კომპანიას განვითარების შემდეგ ეტაპზე?
შემდეგ ეტაპზე გვინდა, მომხმარებელს საჭირო მომსახურების პოვნაც გავუმარტივოთ. მაგალითად, თუ JAVIC ზეთის შეცვლას გახსენებს, იქვე უნდა შეგეძლოს ნახო, სად შეგიძლია მისი შეცვლა. ამ მიმართულებით ახალ ფუნქციებსა და პარტნიორობებზე ვმუშაობთ. დეტალებზე ცოტა მოგვიანებით ვისაუბრებთ.
თუ JAVIC ჯერ არ გამოგიცდიათ, ჩამოტვირთეთ App Store-დან ან Google Play-დან, დაამატეთ თქვენი მანქანა და ნახეთ, როდის გიწევთ ტექდათვალიერება ან ხომ არ გაქვთ გადაუხდელი ჯარიმა.
საბოლოოდ, გვინდა, JAVIC თითოეული მძღოლის ჭკვიანი ავტომეგობარი გახდეს. სახელიც ამას გამოხატავს - Just A Very Intelligent Car. გვინდა, აპს ახსოვდეს ის, რაც შეიძლება შენ გამოგრჩეს, და როცა მანქანაზე კითხვა გაგიჩნდება, დაგეხმაროს იმის გარკვევაში, რა გააკეთო შემდეგ.