2026 წლის პირველი ნახევარი „მაგნუს დაზღვევისთვის“ განვითარების, ახალი შესაძლებლობებისა და მომხმარებელთა საჭიროებებზე მორგებული სერვისების გაძლიერების მიმართულებით აქტიური აღმოჩნდა. განსაკუთრებით გაიზარდა მოთხოვნა სამოგზაურო დაზღვევასა და საერთაშორისო გადაადგილებასთან დაკავშირებულ პროდუქტებზე, მათ შორის „მწვანე ბარათზე“. „მაგნუს დაზღვევის“ განვითარების გეგმებზე და 2026 წლის მოლოდინებზე Business Insider Georgia-ს კომპანიის აღმასრულებელი დირექტორი მაია კახიანი ესაუბრა.

როგორ შეაფასებდით მაგნუსის საქმიანობის პირველ 6 თვეს - რა არის ის მთავარი შედეგები და მიღწევები, რომლითაც ამ პერიოდს გამოარჩევდით?

2026 წლის პირველი ექვსი თვე ჩვენი კომპანიისთვის საკმაოდ დინამიკური და საინტერესო პერიოდი იყო. ჩვენი მთავარი მიზანი იყო როგორც საცალო, ასევე კორპორატიული მიმართულებების გაძლიერება და მომხმარებლებისთვის ხარისხიანი და მოქნილი სადაზღვევო სერვისის შეთავაზება.

განსაკუთრებით გამოვყოფდი იმ მიმართულებებს, რომლებზეც ბოლო პერიოდში მოთხოვნა მნიშვნელოვნად გაიზარდა. ერთ-ერთი ასეთი პროდუქტია „მწვანე ბარათი“ (Green Card) - ავტოსატრანსპორტო საშუალებების დაზღვევა საზღვარგარეთ გადაადგილებისას. საქართველოს მოქალაქეებისთვის თურქეთსა და ევროპის ქვეყნებში ავტომობილით გადაადგილება სულ უფრო აქტუალური ხდება, შესაბამისად, აღნიშნული პროდუქტი საკმაოდ მოთხოვნადია.

ასევე, მნიშვნელოვანი სიახლე გახდა საქართველოში შემომსვლელი უცხოელი მოქალაქეებისთვის სამოგზაურო დაზღვევის სავალდებულო მოთხოვნის ამოქმედება 2026 წლის იანვრიდან. ამან კიდევ უფრო გაზარდა ყურადღება სამოგზაურო დაზღვევის მიმართულების მიმართ და ჩვენთვისაც საინტერესო ახალი შესაძლებლობა შექმნა.

ზოგადად, ამ ექვს თვეს შევაფასებდი როგორც განვითარების, ახალი შესაძლებლობების აღმოჩენისა და კომპანიის პოზიციონირების გაძლიერების პერიოდს.

როგორ შეაფასებდით სადაზღვევო ბაზარზე არსებულ ძირითად ტენდენციებს?

სადაზღვევო ბაზარი დღეს უფრო მეტად მომხმარებლის საჭიროებებზეა ორიენტირებული. მომხმარებლებისთვის მნიშვნელოვანია არა მხოლოდ პოლისის ფასი, არამედ პირობების გამჭვირვალობა, სწრაფი მომსახურება და კონკრეტულ საჭიროებაზე მორგებული პროდუქტი.

ვხედავთ ინტერესის ზრდას როგორც კორპორატიული, ისე საცალო დაზღვევის მიმართულებით. განსაკუთრებით აქტუალურია სამოგზაურო დაზღვევა, ჯანმრთელობის დაზღვევა და საერთაშორისო გადაადგილებასთან დაკავშირებული პროდუქტები, მათ შორის „მწვანე ბარათი“.

მიგვაჩნია, რომ ბაზრის შემდგომ განვითარებაში მნიშვნელოვან როლს შეასრულებს მომხმარებლის სადაზღვევო ცნობიერების ზრდაც.

რა იქნება თქვენი მთავარი მიზანი წლის დარჩენილ პერიოდში და რა მიმართულებებით ელოდებით ყველაზე მნიშვნელოვან პროგრესს?

წლის მეორე ნახევარში ჩვენი მთავარი მიზანი იქნება მომსახურების ხარისხის კიდევ უფრო გაუმჯობესება, მომხმარებელთა ბაზის ზრდა და კორპორატიული მიმართულების გაძლიერება.

ასევე, ვაპირებთ კომპანიის განვითარებას - მათ შორის გუნდის გაფართოებას და ახალი ფილიალების დამატებას. ჩვენი მიზანია, ზრდასთან ერთად „მაგნუსმა“ შეინარჩუნოს ის ინდივიდუალური და პროფესიონალური მიდგომა, რომელიც ჩვენთვის ერთ-ერთი მთავარი პრიორიტეტია.

საბოლოოდ, როგორი მოლოდინი გაქვთ 2026 წლის შედეგებთან დაკავშირებით და თქვენი ხედვით, რა უნდა იყოს წლის მთავარი შედეგი კომპანიისთვის, ხომ არ გეგმავთ ახალი პროდუქტების/მიმართულებების განვითარებას?

2026 წლის შედეგებთან დაკავშირებით პოზიტიური მოლოდინი გვაქვს. ჩვენთვის წლის მთავარი შედეგი იქნება სტაბილური ზრდა, მომხმარებელთა ნდობის კიდევ უფრო გაძლიერება და ბაზარზე პოზიციების გამყარება.

რაც შეეხება ახალ პროდუქტებს, მუდმივად ვაკვირდებით ბაზრის ცვლილებებსა და მომხმარებელთა საჭიროებებს. შესაბამისად, მომავალშიც ვაპირებთ ისეთი ახალი მიმართულებების განვითარებას, რომლებიც უპასუხებს ბაზრის მოთხოვნებს.