„ია და ბავშვები“ არის არაფორმალური განათლების ცენტრი, რომელიც გაიხსნა პროექტ „აწარმოე საქართველოს“ ფარგლებში. ცენტრი ბაზარზე 2025 წლიდან ოპერირებს. მეტი ინფორმაციისთვის, Business Insider Georgia კომპანიის დამფუძნებელსა და დირექტორს ია აფციაურს ესაუბრა.

როგორია კომპანიის საქმიანობის სპეციფიკა, როდიდან ოპერირებთ ბაზარზე და რას სთავაზობთ მომხმარებლებს?

„ია და ბავშვები“ არის არაფორმალური განათლების ცენტრი, რომელიც გაიხსნა პროექტ „აწარმოე საქართველოს“ ფარგლებში, მიკრომეწარმეობის მხარდაჭერის სახელმწიფო პროგრამით. განათლების თანამედროვე სივრცე, რომელიც ბავშვების ჰოლისტურ განვითარებაზეა ორიენტირებული. ცენტრი ბაზარზე ოპერირებს 2025 წლიდან და მომხმარებლებს სთავაზობს როგორც აკადემიური, ისე ემოციური და სოციალური უნარების განვითარების პროგრამებს. ცენტრში ინტეგრირებულია სხვადასხვა მიმართულება - შემეცნებითი კლუბები, არტთერაპია, მენტალური არითმეტიკა, ჭადრაკი, უცხო ენები, შემოქმედებითი და საგანმანათლებლო აქტივობები (2+ ასაკიდან), სხვადასხვა თემატური პროექტები და ვორქშოფები, მშობელთა კლუბი და ა.შ. რომლებიც თითოეული ბავშვის ინდივიდუალურ საჭიროებებსა და ინტერესებზეა მორგებული. განსაკუთრებული ყურადღება ეთმობა უსაფრთხო, მხარდამჭერი და მეგობრული გარემოს შექმნას, სადაც ბავშვი თავს თავისუფლად და დაფასებულად გრძნობს.

ცენტრის კონცეფციაზე მუშაობის პროცესში ჩვენი მთავარი ღირებულება ბავშვების სიყვარული იყო. არ მინდოდა, რომ "ია და ბავშვები" ყოფილიყო უბრალოდ მორიგი "წრეების" ცენტრი. ჩემი მიზანი იყო განათლების ბაზარზე შემეტანა მეტად მნიშვნელოვანი, ემოციურ კავშირსა და ინდივიდუალურ მიდგომაზე დაფუძნებული გამოცდილება: ურთიერთობა, როგორც საგანმანათლებლო ინსტრუმენტი.

როგორ აფასებთ მოთხოვნას ზოგადი თვალსაზრისით? რამდენად მზარდია ტენდენცია?

დღეს მშობლების მხრიდან მნიშვნელოვნად იზრდება ინტერესი ისეთი საგანმანათლებლო სივრცეების მიმართ, რომლებიც მხოლოდ აკადემიურ ცოდნაზე არ არის ორიენტირებული და ბავშვის ემოციურ, სოციალურ და კოგნიტურ განვითარებასაც თანაბარ მნიშვნელობას ანიჭებს. თანამედროვე გარემო და სწრაფად ცვალებადი რეალობა მშობლებს უბიძგებს, შვილებისთვის შეარჩიონ სივრცეები, სადაც ბავშვები შეძლებენ არა მხოლოდ სწავლას, არამედ კომუნიკაციის, შემოქმედებითი აზროვნებისა და დამოუკიდებელი უნარების განვითარებასაც. სწორედ ამიტომ, არაფორმალური განათლების მიმართულება მზარდ ტენდენციად გვესახება და მოთხოვნა წლიდან წლამდე მატულობს. ეს არ არის ინვესტიცია, რომელიც სწრაფ ან გარანტირებულ მოგებას გვპირდება; ეს არის ინვესტიცია ადამიანურ კაპიტალში, ემოციებსა და მომავალში, რაც დიდ პასუხისმგებლობას ნიშნავს. აკეთო საქმე, რომელიც გიყვარს, ბევრად მეტ მოტივაციას და ძალისხმევას აღმოგაჩენინებს საკუთარ თავში, ვიდრე მხოლოდ სამეწარმეო საქმიანობა.

რას მიიჩნევთ კომპანიის კონკურენტულ უპირატესობად?

„ია და ბავშვების“ მთავარი კონკურენტული უპირატესობა თითოეული ბავშვის მიმართ ინდივიდუალური, ჰუმანური და ზრუნვაზე დაფუძნებული მიდგომაა. განსაკუთრებულ მნიშვნელობას ვანიჭებთ ნდობაზე, მხარდაჭერასა და კეთილგანწყობაზე დაფუძნებულ კომუნიკაციას, რაც თითოეული ადამიანისათვის კომფორტულ და მშვიდ ატმოსფეროს ქმნის. ამასთანავე, კომპანიის ერთ-ერთ უმნიშვნელოვანეს ღირებულებას პროფესიონალებისგან დაკომპლექტებული გუნდი წარმოადგენს - ადამიანები, რომლებიც არა მხოლოდ საკუთარ სფეროში კვალიფიციურები არიან, არამედ ბავშვებთან ურთიერთობაში განსაკუთრებული პასუხისმგებლობით, სითბოთი და ემპათიით გამოირჩევიან. ამასთანავე, ვცდილობთ, ჩვენი სერვისები და პროგრამები ფასობრივად ხელმისაწვდომი იყოს ბევრი ოჯახისთვის, რადგან მიგვაჩნია, რომ ხარისხიან და მზრუნველ საგანმანათლებლო გარემოზე წვდომა მაქსიმალურად მრავალ ბავშვს უნდა ჰქონდეს. 

როგორია სამომავლო გეგმები და განვითარების ხედვა?

კომპანიის განვითარების ხედვა მრავალფუნქციური საგანმანათლებლო ეკოსისტემის შექმნას უკავშირდება - სივრცის, რომელიც კიდევ უფრო მეტ ბავშვსა და ოჯახს მისცემს შესაძლებლობას, მიიღონ ხარისხიანი, თანამედროვე და ემოციურად მხარდამჭერი სერვისები.

ცენტრში უახლოეს პერიოდში იგეგმება პროგრამებისა და მიმართულებების გაფართოება. გვინდა, ბავშვებს შევთავაზოთ ისეთი თანამედროვე და პრაქტიკულად მნიშვნელოვანი აქტივობები, როგორიცაა STEM განათლება, ფინანსური წიგნიერება, ციფრული და ტექნოლოგიური უნარების განვითარება, შემოქმედებითი და კვლევითი პროექტები, სოციალური და ემოციური უნარების გაძლიერებაზე ორიენტირებული პროგრამები. ასევე, განსაკუთრებულ ყურადღებას ვუთმობთ არაფორმალური განათლების თანამედროვე მეთოდების დანერგვას, რათა სასწავლო პროცესი ბავშვებისთვის უფრო საინტერესო, პრაქტიკული და ინტერაქტიული გახდეს. აქვე, განვითარების მნიშვნელოვანი ნაწილი იქნება „მშობლების კლუბის“ გაფართოებაც - სივრცის, სადაც მშობლებს ექნებათ შესაძლებლობა, მიიღონ პროფესიონალური მხარდაჭერა, დაესწრონ სხვადასხვა თემატურ შეხვედრებს, ტრენინგებსა და ვორქშოფებს ბავშვის განვითარების, აღზრდისა და ფსიქოემოციური კეთილდღეობის მიმართულებით.

კომპანიის გრძელვადიანი მიზანია შექმნას სივრცე, სადაც ბავშვი, მშობელი და მასწავლებელი ერთიანი, ურთიერთპატივისცემასა და მხარდაჭერაზე დაფუძნებული საზოგადოების ნაწილად იგრძნობენ თავს. ჩვენთვის მნიშვნელოვანია, რომ „ია და ბავშვები“ ასოცირდებოდეს არა მხოლოდ განათლებასთან, არამედ სითბოსთან, ნდობასთან, ზრუნვასთან და იმ პოზიტიურ გამოცდილებასთან, რომელიც თითოეული ოჯახის ყოველდღიურობის მნიშვნელოვან ნაწილად იქცევა.