ქართული ღვინის საერთაშორისო ბაზარზე წარმოჩენის მიმართულებით „მეღვინეობა ჯობავამ“ კიდევ ერთი ნაბიჯი გადადგა - კომპანიის ღვინოები გერმანულ ონლაინ პლატფორმა VINELLO-ს შეთავაზებებს დაემატა. ამის შესახებ Business Insider Georgia-ს კომპანიის PR-ისა და კომუნიკაციების ხელმძღვანელმა, ლიზი მეგრელიშვილმა განუცხადა.

„მეღვინეობა ჯობავას“ ღვინოები გერმანიაში დაფუძნებული საერთაშორისო ონლაინ ღვინის მაღაზია VINELLO-ს ასორტიმენტს დაემატა. პლატფორმის მიწოდების ქსელი მსოფლიოს 33 ქვეყანას მოიცავს, რაც მომხმარებლებს საშუალებას აძლევს, ქართული ღვინო ონლაინ შეუკვეთონ და სასურველ მისამართზე მიიღონ.

მიწოდება ხელმისაწვდომია როგორც ევროპის ქვეყნებში, მათ შორის გერმანიაში, საფრანგეთში, იტალიასა და ესპანეთში, ისე იაპონიაში, ავსტრალიაში, ახალ ზელანდიასა და არგენტინაში. VINELLO-ზე წარმოდგენა მეღვინეობისთვის საერთაშორისო გაყიდვების დამატებითი არხია, რომელიც სხვადასხვა ქვეყანაში მცხოვრებ მომხმარებლებთან წვდომას აფართოებს.

პლატფორმაზე მეღვინეობის მრავალფეროვანი ასორტიმენტია წარმოდგენილი - თეთრი, წითელი და ვარდისფერი ღვინოები, მათ შორის კლასიკური მეთოდით, ქვევრში და მუხის კასრში დაყენებული ღვინოები. არჩევანს ჭაჭის ორი სახეობაც ავსებს.

საერთაშორისო აუდიტორიასთან კომუნიკაციისას მნიშვნელოვანია, რომ ღვინის მიმართ ინტერესი მისი შეძენის რეალურმა შესაძლებლობამ გაამყაროს. VINELLO-ს მეშვეობით ჩვენი ღვინოების 33 ქვეყანაში ხელმისაწვდომობა ბრენდის ცნობადობის გაზრდის ახალ შესაძლებლობას გვაძლევს. გვსურს, უფრო მეტმა ადამიანმა გაიცნოს „მეღვინეობა ჯობავა“, აღმოაჩინოს ჩვენი ღვინოების მრავალფეროვნება და მათი მეშვეობით მეტი შეიტყოს ქართული მეღვინეობის შესახებ“, - ამბობს „მეღვინეობა ჯობავას“ PR-ისა და კომუნიკაციების ხელმძღვანელი ლიზი მეგრელიშვილი.

ღვინოების სრული ასორტიმენტისა და შეკვეთის შესახებ ინფორმაცია ხელმისაწვდომია VINELLO-ოს „მეღვინეობა ჯობავას“ გვერდზე.