„ქართველი მენეჯერების ყველაზე დიდ შეცდომას ჰქვია „მე რომ შენხელა ვიყავი“, – ამის შესახებ ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას კომპანია „ფლომასტერის“ დამფუძნებელმა, ალექსანდრე ჯეჯელავამ განაცხადა. მისი განმარტებით, მილენიალი ხელმძღვანელები ხშირად უშედეგოდ ცდილობენ ახალგაზრდა, „ჯენ ზი“ თაობის თანამშრომლებს ისე დაავალონ საქმე და ისეთი გარემო შეუქმნან, როგორიც თავად, წლების წინ მოუნდებოდათ, რაც თანამედროვე ბიზნესრეალობაში აღარ მუშაობს.

„ყველაზე დიდ შეცდომას ჰქვია: „მე რომ შენხელა ვიყავი...“ ეს ფრაზა მშობლობის შესახებ ერთ-ერთ წიგნში შემხვდა, სადაც ეწერა, რომ ამ სიტყვებს მიღმა რაც კი მოჰყვება, ყველაფერი ტყუილია. მე ზუსტად იგივეს გადმოვტანდი მენეჯერობაზეც. რეალურად, შენ როგორ გახსოვს, რას აკეთებდი ან რას ფიქრობდი, მაგალითად, 21 წლის ასაკში  - ეს მოგონება შენს ცნობიერებაში უკვე მილიონჯერ არის შეცვლილი და გადაკეთებული. შეგნებულად კი არ ტყუი, უბრალოდ, შენს მეხსიერებას ასე ახსოვს - წარსულის მხოლოდ საუკეთესო, იდეალური ვერსია შემოგრჩა.

დღესდღეობით მენეჯერების უმეტესობა მილენიალია, ანუ 1981-დან 1996 წლამდე დაბადებული ადამიანები (თუ ამერიკული კატეგორიზაციით ვისაუბრებთ). ტრადიციულად, მენეჯერი მილენიალია, ხოლო ახალი თანამშრომელი, რომელიც კომპანიაში მოდის „ჯენ ზი“. ამასობაში ეს „ჯენ ზიებიც“ უკვე 29-30 წლისანი გახდნენ.

ეს მილენიალი მენეჯერი ხშირად ცდილობს, ახალ თანამშრომელს ისე დახვდეს, როგორც თავად ისურვებდა, რომ დახვედროდნენ; ისე დაავალოს საქმე, როგორც თვითონ გაუხარდებოდა და ზუსტად ისეთი სამუშაო გარემო შეუქმნას... მაგრამ, პირდაპირ რომ ვთქვათ, ეს მიდგომა ასე აღარ მუშაობს.

მეც კარგად მახსოვს, როდესაც მუშაობა დავიწყე (მე „X თაობის“ წარმომადგენელი ვარ), ჩემი ერთ-ერთი პირველი და ხანგრძლივი სამსახური ეროვნული ბანკი იყო. იქ ჩემი წინა თაობის, ანუ „ბეიბი ბუმერების“ წარმომადგენლები მუშაობდნენ. ყველაფერი, რასაც ისინი მირჩევდნენ და მასწავლიდნენ, ფაქტობრივად სრულიად აცდენილი იყო ჩემს რეალობას თუნდაც ტექნოლოგიების გამოყენების, ოპერატიულად გადაწყვეტილებების მიღებისა თუ ცვლილებების შეტანის ნაწილში.

ამიტომ, ჩემი მთავარი რჩევა იქნებოდა - ნუ ჩათვლით, რომ ადამიანი, რომელიც თქვენთან სამუშაოდ მოდის, თქვენნაირია. კი ბატონო, მასაც ორი თვალი და ორი ყური აქვს, ადამიანია, აქვს ფასეულობები, უყვარს ოჯახი, მაგრამ ზუსტად მანდ მთავრდება მსგავსება და იწყება ძალიან დიდი განსხვავებები“, - აცხადებს ჯეჯელავა.