Sugar Free-მ პროდუქციის ასორტიმენტი გააფართოვა. კომპანიამ მენიუში ახალი დესერტები დაამატა, ხოლო უახლოეს პერიოდში მომხმარებლებს კიდევ არაერთ სიახლეს შესთავაზებს. ამის შესახებ, Business Insider Georgia-ს კომპანიის დამფუძნებელმა, რუსუდან კვანტალიანმა განუცხადა.

როგორია კომპანიის მიმდინარე სიახლეები და რა ახალ პროდუქტებს სთავაზობთ მომხმარებლებს?

მენიუში უკვე დაემატა ახალი ნამცხვრები, ტორტები და ორცხობილები, თუმცა ეს მხოლოდ დასაწყისია - სექტემბრამდე მომხმარებლებს კიდევ არაერთ სიახლეს შევთავაზებთ. განსაკუთრებით სასიხარულოა, რომ ახალი დესერტების უმრავლესობა არა მხოლოდ უშაქრო, არამედ უგლუტენო და კეტო-მეგობრულიც არის, რაც საშუალებას გვაძლევს, კიდევ უფრო ფართო აუდიტორიის საჭიროებებს ვუპასუხოთ.

რამდენად იზრდება უშაქრო პროდუქტებზე მოთხოვნა და როგორ შეიცვალა მომხმარებლის ინტერესები ბოლო წლებში?

თუ რამდენიმე წლის წინ ჩვენი მომხმარებლების ძირითადი ინტერესი მხოლოდ უშაქრო დესერტებისკენ იყო მიმართული, დღეს განსაკუთრებით გაიზარდა მოთხოვნა უგლუტენო და კეტო მეგობრულ პროდუქტებზეც. მომხმარებლები სულ უფრო მეტ ყურადღებას აქცევენ პროდუქტის შემადგენლობას, კვებით ღირებულებასა და გამოყენებული ინგრედიენტების ხარისხს. ეს ტენდენცია ჩვენთვის დამატებითი მოტივაციაა, მუდმივად განვაახლოთ ასორტიმენტი და შევქმნათ პროდუქტები, რომლებიც ერთდროულად ჯანსაღი და მაღალი ხარისხის არის, ამასთან, გემოვნური თვალსაზრისითაც გამორჩეულია.

როგორია კომპანიის ხედვა რეგიონული განვითარების მიმართულებით? გეგმავთ თუ არა ფიზიკური ობიექტების ან სადისტრიბუციო ქსელის გაფართოებას თბილისის ფარგლებს გარეთ?

ამ ეტაპზე ჩვენი პრიორიტეტი თბილისში პოზიციების კიდევ უფრო გაძლიერებაა. სწორედ ამიტომ უახლოეს პერიოდში Sugar Free-ს მესამე ფილიალი დიღომში გაიხსნება, რაც კიდევ უფრო მეტ მომხმარებელს მისცემს შესაძლებლობას, ჩვენი პროდუქცია სახლთან უფრო ახლოს შეიძინოს. რაც შეეხება რეგიონებს, ეს მიმართულება ჩვენი სამომავლო განვითარების გეგმებშია, თუმცა კონკრეტული გადაწყვეტილება ან ვადები ამ ეტაპზე ჯერ არ გვაქვს.

რა არის კომპანიის მთავარი პრიორიტეტები 2026 წლის დარჩენილი პერიოდისთვის და რა მიზნები გაქვთ როგორც ადგილობრივ, ისე საერთაშორისო ბაზრებზე?

ვაგრძელებთ მუშაობას პროდუქციის განვითარებასა და მომხმარებლის გამოცდილების გაუმჯობესებაზე. ჩვენი გრძელვადიანი მიზანია, Sugar Free იქცეს რეგიონში ერთ-ერთ ყველაზე ძლიერ, ინოვაციურ და სანდო ბრენდად ჯანსაღი დესერტების მიმართულებით.

ინფორმაციისთვის, Sugar Free ბაზარზე დაახლოებით ოთხი წელია ოპერირებს და ამჟამად ორ ფილიალს აერთიანებს: ა. ყაზბეგის გამზირის №30-სა და დიმიტრი მირცხულავას №6-ში.